Read tshiluba Yeshaya 54 Bible Online

Yeshaya 54 - tshiluba bible

Yeshaya 54

¹Imba biebe, wewe mukashi wa nkumba, wewe udi kuyi mulele; bandisha mei ebe mu kuimba kua misambu, wela dî dikole, wewe udi kuyi muikale ne didinyenga dia ha kulela! Bualu bua Yehowa udi wamba ne, Bana ba mukashi udi mushale hatuhu badi bahita bana ba mukashi mubaka bungi.

²Vundisha muaba wa ntenta webe, bavungulule bilulu bikudika bia mu nsubu muebe; kababihihishi nansha, lungakasha mionshi ya ntenta webe, hohela mitondo.

³Bualu bua wewe neubaluluke ku tshianza tshia balume ne ku tshianza tshia bakashi; tunkanunuma tuebe netuhiane buhianyi bua bisamba bia bantu, nebashikame mu misoko yakadi bikulu.

⁴Nzambi webe udi wamba ne, Kutshinyi; bualu bua bundu kabuena bukukuata; kubuandakanyi, bualu bua kabena bakufuisha bundu. Bualu bua wewe neuhue bundu bua bunsongakashi buebe muoyo; kuena uvuluka kabidi tshihendu tshiakakuhendabo nʼatshi hawakadi mukashi wa mu lufuila.

⁵Bua Mufuki webe udi bayebe, Yehowa wa misumba ndina diandi. Wa Tshijila wa Isalele udi Muhikudi webe; nebamubikile ne, Nzambi wa buloba buonso.

⁶Bualu bua Yehowa wakumbikila bu mukashi mulekedibue ne munyingalashibue mu mutshima wandi, bu mukashi mubakibue mu bunsongakashi buandi hamuhidiabo.

⁷Yehowa Muhikudi webe udi wamba ne, Nakukulekela katuha kihi, kadi nenkuhingashe kundi ne luse lunene.

⁸Mu tshiji tshitamba hukole nakasokoka mpala wanyi kûdi katuha kihi kadi mu dinanga dia tshiendelele nenkufuile luse.

⁹Bua bualu ebu budi bu muakadi matuku a Noa kundi; bua bu munakadi tshiha bua mai a nvula mu matuku a Noa ne, Kaena alua ha buloba kabidi, nunku nakuditshiha ne, Tshiena nkuata nʼebe tshiji kabidi, tshiena nkubela.

¹⁰Bualu bua mikuna mile idi mua kumuka, ne mikuna mihuekele idi mua kuzakashibua, kadi dinanga dianyi kadiena diumuka kûdi, ne tshihungidi tshianyi tshia ditalala katshiena tshiumushibua, mudi Yehowa udi ukufuila luse wamba.

¹¹Yehowa udi wamba ne, Wewe udibo bakengesha, udibo basumpakasha ne tshihehele, udi kuyi musambibue, mona, nenteke mabue ebe munkatshi mua mabue a antimoine,[49] nenshimike bishimikidi biebe ne mabue a saphir.[50]

¹²Nengase bibumba bia mu nsubu yebe ne mabue a rubis,[51] nengase bibi bia musoko webe ne mabue a escarboucle,[52] ne ngumbu yebe yonso idi ikunyunguluka ne mabue a mushinga mukole.

¹³Bana bebe bonso nebikale bayidi ba Yehowa; ditalala dia bana bebe nedikale dinene.

¹⁴Nebakushimike mu buakane; wewe newikale mu muaba ûdi ushiya makenga kule, bualu bua kuena wikala ne bualu bua kutshina; ne buowa nebushale kule nʼebe, bualu bua kabuena bulua ha buihi nʼebe.

¹⁵Mona, biakutekela muntu diyoyo, kadiena difuma kundi; muntu yonso udi ukulekela diyoyo neabutuke bua bualu buebe.

¹⁶Tangila, nakufuka mutudi wa biamu udi uhuhisha kadilu ka makala ne udi uhatula tshielelu tshia nvita tshiakanangane ne mudimu watshi; ne nakufuka muhaudi bua kuhauleye;

¹⁷kakuena tshielelu tshia nvita tshidibo batula bua kukuluisha nʼatshi tshidi mua kuikala ne diakalengele; wewe neutuishe ludimi luonso ludibo babandisha bua kukubanda nʼalu mu tshilumbu. Ebu mbuhianyi bua badi bakuatshila Yehowa mudimu, ne eku nkubingishibua kuabo kudi kufuma kundi.