Read tshiluba Yeshaya 58 Bible Online

Yeshaya 58 - tshiluba bible

Yeshaya 58

¹Bandisha dî diebe bikole, kudikandi nansha, bandisha dî diebe bu dî dia mpungi, manyisha bantu banyi kushiha kuabo kua mikenji ne bana ba Yakoba mihi yabo.

²Kadi badi bakeba lungenyi kundi ku dituku ku dituku, badi ne disanka bua kumanyabo nshila yanyi, bu mudi bantu badi benza malu adi makane, ne badi kabayi balekela kulonda mikenji ya Nzambi wabo benza; badi bandomba mikenji idi mua kuyuisha buakane, badi basanka bua kusemena ha buihi ne Nzambi.

³Badi bakonka ne, Tuakajila bia kudia, kuakututangila munyi? Tuakunyingalasha mitshima yetu, wewe wakulengulula muanda eu munyi? Tangilai, mu dituku dinudi nujila bia kudia nudi milonda anu malu adi mitshima yenu misue kuenza, nudi nukengesha bena mudimu benu bonso.

⁴Monai, nudi nujila bia kudia bua kuikala ne diyoyo ne difuilangana, bua kutuangana ne bisusu bia bantu babi. Kujila kua bia kudia bu kuenu dituku edi kakuena mua kunvuisha dî dienu mu diulu.

⁵Kujila aku kua bia kudia nkujila kunakusungula, ndituku dia kunyingalasha mutshima wandi, anyi? Kudi bua muntu kuinama mutu wandi bu disele, bua kuadisha bilulu bikayabala ne butue muinshi muandi, anyi? Neubikile bualu ebu ne, Kujila kua bia kudia, ne dituku didi disankisha Yehowa, anyi?

⁶Eku kakuena kujila kua bia kudia kunakusungula, anyi? Mbua kusulula nkanu ya malu mabi, mbua kusulula majita adi asuika mutshi wa tshikokedi, mbua kulekela bakengeshibue, ne mbua kutshibula mutshi wa tshikokedi wonso.

⁷Eku kakuena kufila kua bia kudia biebe kudi badi ne nzala, ne bua kulua ne bahele badi kabayi ne muaba wa kushikama mu nsubu muebe, anyi? Eku kakuena kuluatshisha kua udi ne butaka tshilulu hawamutangila butaka, ne bua wewe kusokomi kudi muanʼenu wa mashi amue, anyi?

⁸Nunku munya webe neutshie bu mudi kabundubundu katshia, ne kusangala kuebe nekumueneke lukasa. Buakane buebe mu tshilumbu nebudianjile ku mpala kuebe, ne butumbi bua Yehowa nebukulame ku nyima,

⁹Hashishe wewe neumubikile, ne Yehowa neitabe kudi; neumudidile, ne yeye neakuitabe ne, Ndiku. Biûmusha mutshi wa tshikokedi munkatshi muenu; biûmusha kufunkuna kua munu kua dihetu, ne kuamba kua mei mabi;

¹⁰biwafila tshidi mutshima webe musue kudi badi ne nzala, biwakutshisha kujinga kua badi ne dikenga, hashishe munya webe neutemene mu mîdima, ne mufitu webe neulue bu munda munya.

¹¹Yehowa neakulombele matuku onso, neaukutshishe[55] muoyo webe mu tshikondo tshia munanga, neakoleshe mifuba yebe. Wewe newikale bu budimi budibo bamiamina mai, bu mushimi wa mai udi mai au kâyi akama.

¹²Bamue ba bantu bebe nebase tshiakabidi mu miaba yakadi nushale bikulu; wewe neubishe kabidi bishimikidi biakashimikabo mu bikondo bia bungi bia diambedi. Nebakubikile ne, Muibaki wa ngumbu yakushimbuka, muhingashi wa misesu ya kushikamamu.

¹³Biwalukisha dikasa diebe bua kadinyangi dituku dia Lumingu, bua wewe kuenji malu adi mutshima webe musue kuenza mu dituku dianyi dia tshijila; biwabikila dituku dia Lumingu ne, Dituku dia disanka, ne dituku dia tshijila dia Yehowa ne, Dituku dia butumbi; biwatumbisha dituku edi, kuyi ulonda nshila yebe, kuyi ukeba malu adi mutshima webe musue, kuyi wamba mei a hatuhu;

¹⁴nunku newikale ne disanka mu Yehowa, ne meme nenkuendeshe ha mutu ha mikuna ya ha buloba. Nenkudishe ne buhianyi bua Yakoba, tatu webe, bualu bua mukana mua Yehowa muakuamba nunku.