Read tshiluba Lewitiki 10 Bible Online

Lewitiki 10 - tshiluba bible

Lewitiki 10

¹Nadaba ne Abihu, bana balume ba Alona, bakangata malonga a kahia, muntu dilonga diandi muntu dilonga diandi, bakatekamu kahia, bakelahu musenga wa manananshi, bakalua ne kahia kakadi kakayi tshijila ku mpala kua Yehowa, hakadiye kayi mubambile.

²Kahia bakahatuka kudi Yehowa, kakabosha, bakafua ku mpala kua Yehowa.

³Nunku Mose wakambila Alona ne, Ebu mbualu bakamba Yehowa ne, Nenjidibue kudi bantu balualua ha buihi nʼanyi, nentumbishibue ku mesu kua bantu bonso Alona wakahuwa talalâ.

⁴Mose wakabikila Mishaele ne Elesafana, bana balume ba Uziele, tatu mukuabo wa Alona, wakabambila ne, Luai ha buihi, numushe bana benu ku mpala kua muaba wa tshijila, yai nʼabo ku nyima kua tshitudilu.

⁵Nunku bakalua ha buihi, bakabatuala mu bikowelu biabo ku nyima kua tshitudilu, bu muakamba Mose.

⁶Mose wakambila Alona ne Eleazâ ne Itama ne, Kanutudi bifulu ku mitu yenu, kanuhandi bilulu bienu, bua kanufu bienu, ne bua tshiji tshia Yehowa katshilu kudi bantu bonso, kadi bana benu, tshisamba tshionso tshia Bena Isalele, badile bualu bua kahia kakatemesha Yehowa.

⁷Nuenu kanumuki ku mbelu kua ntenta wa kusambakena bua kanufu nansha, bualu bua manyi akela Yehowa adi hamʼbidi henu Bakenza bu muakamba Mose.

⁸Yehowa wakambila Alona ne,

⁹Wewe ne bana bebe balume, kanunu nvinyo ne bintu bikole bia kunua hanuahuola mu ntenta wa kusambakena bua kanufu bienu. Mukenji eu newikale kunudi bikondo bienu bionso tshiendelele.

¹⁰Nuenu nenujingulule bidi tshijila ne bidi kabiyi tshijila, ne bidi binyanguke ne bidi biakane.

¹¹Nuenu nuyishe Bena Isalele mikenji yonso yakabamanyisha Yehowa mukana mua Mose.

¹²Mose wakambila Alona ne Eleaza ne Itama, bana bandi balume bakadi bashala, ne, Nuangate mulambu wa bukula udi ushala munkatshi mua milambu idibo boshila Yehowa ha kahia, nûdie ne bintu bidi kabiyi ne luevene hehi ne tshioshelu, bualu bua tshintu etshi ntshintu tshia tshijila,

¹³nenudie mu muaba wa tshijila, bualu bua etshi ntshintu tshiebe ne tshia bana bebe balume munkatshi mua milambu idibo boshila Yehowa ha kahia, bualu bua Yehowa wakangambila nunku.

¹⁴Kadi wewe ne bana bebe balume ne bana bebe bakashi nenudie tshiadi tshia kunyukulabo ne tshibelu tshia kukuhabo ebi mbintu biebe ne bia bana bebe balume munkatshi mua milambu ya kuvuisha nʼai ditalala ya Bena Isalele.

¹⁵Nebalue ne tshibelu tshidibo bakuha ne tshiadi tshidibo banyukula hohamue ne dianyi dia milambu ya kuosha ha kahia ku mesu kua Yehowa etshi ntshintu tshiebe ne tshia bana bebe balume tshiendelele, bu muakamba Yehowa.

¹⁶Mose wakakebakeba mbushi wa mulambu wa kubuikila nʼau bubi, ne monai, bakamana kuwosha! Yeye wakadi ne Eleazâ ne Itamâ, bana balume ba Alona bakadi bashala, tshiji, wakamba ne,

¹⁷Bualu kai nuenu kanuena banze kudia mulambu wa kubuikila nʼau bubi mu nsubu wa tshitendelelu, ntshintu tshia tshijila, tshiakanuha Yehowa bua kumusha nʼatshi bubi bua bantu ne bua kubabuikidila nʼatshi bubi buabo ku mesu kua Yehowa?

¹⁸Tangilai, kabena balue ne mashi a mulambu mu nsubu munda mua tshitendelelu; nuakadi kûdia mu nsubu wa tshitendelelu, bu munakamba.

¹⁹Alona wakambila Mose ne, Tangila, bakulua lelu ne mulambu wa kubuikila nʼau bubi buabo, ne mulambu wabo wa kuosha ha kahia ku mesu kua Yehowa, malu au onso akunkuata! Bu meme muebe mulambu wa kubuikila nʼqu bubi bua bantu lelu, bualu ebu buakadi kuikala buimpe ku mesu kua Yehowa, anyi?

²⁰Hakunvua Mose mei au, bualu ebu buakadi buimpe ku mesu kuandi.