Read tshiluba Lewitiki 11 Bible Online

Lewitiki 11 - tshiluba bible

Lewitiki 11

¹Yehowa wakambila Mose ne Alona ne,

²Nuambile Bena Isalele ne, Ebi mbintu bidi ne muoyo binudi mua kudia munkatshi mua nyama yonso idi ha buloba.

³Nyama yonso idi ne mikono mihanduluke ne idi ihingishilula bintu mukana ibidia kabidi, nudi mua kudia nyama ei.

⁴Kadi kanudi nyama mikuabo idi ihingishilula bintu mukana, anyi idi ne mikono mihanduluke kamelo, bualu bua kadi kahingishilula bintu mukana, kabidia, kadi kakena ne mikono mihanduluke, kakena kakane kunudi.

⁵Kabundi ka mputu kakena kakane kunudi, bualu bua kadi kahingishilula bintu mukana, kadi kakena ne mikono mihanduluke.

⁶Nsenji kena muakane kunudi bualu bua udi uhingishilula bintu mukana, kadi kena ne mikono mihanduluke.

⁷Ngulube kena muakane kunudi, bualu bua udi ne mikono mihanduluke, kadi kena uhingishilula bintu mukana.

⁸Kanudi munyinyi wa nyama ei, kanulengi tshianza hamʼbidi hai, kayena miakane kunudi.

⁹Nudi mua kudia bintu ebi bia mu mai bintu bidi ne mialala ne mabamba bidi mu mai manene ne mu misulu.

¹⁰Kadi bintu bionso bia mu mai budi kabiyi ne mialala ne mabamba, bidi mu mai manene anyi mu misulu, bidi bibi kunudi,

¹¹nebikale bibi kunudi, kanudi munyinyi wa bintu ebi, ne mibidi mifue yabi neyikale bu bintu bibi kunudi.

¹²Bintu bionso bia mu mai bidi kabiyi ne mialala ne mabamba nebikale bintu bibi kunudi.

¹³Nyunyu ei idi mibi kunudi, kanudi nyunyu ei nyunyu wa mukanku ne nyunyu wa gypaête ne nyunyu wa orfraie,

¹⁴ne nyunyu wa milan mufike ne wa milan mukunze

¹⁵ne mushindu wonso wa tshikololo

¹⁶ne nyunyu wa autriche ne nyunyu wa chat-huant ne nyunyu wa mouette ne wa nkumbikumbi

¹⁷ne nyunyu wa tshihungulu ne nyunyu wa choutte ne nyunyu wa ibis,

¹⁸ne nyunyu wa pélican ne nyunyu mutoke utu wadia bintu bibole ne nyunyu wa cormoran

¹⁹ne nyunyu wa cigogne ne nyunyu wa ya héron ne nyunyu wa huppe ne nyunyu wa mudima.

²⁰Bintu bionso bidi ne mahuahua bidi bienda ne mikolo mai bidi bibi kunudi.

²¹Kadi nudi mua kudia bintu bionso bidi ne mahuahua bidi bienda ne mikolo mai bituhike ha buloba,

²²nudi mua kudia mikumbi ne nsua ne bintunte ne mintuntu.

²³Kadi bintu bikuabo bidi ne mahuahua ne bidi ne mikolo mai bidi bibi kunudi.

²⁴Muntu yonso udi ulenga tshianza hamʼbidi ha bintu ebi neikale ne bukoya tô ne dilolo;

²⁵muntu yonso udi utuala tshituha tshia mubidi mufue wa bintu ebi, neuvuwe bilulu biandi, neikale ne bukoya tô ne dilolo.

²⁶Nyama yonso idi ne mikono mihanduluke ne idi kayiyi mihingishilula bintu mukana udi mubi kunudi, muntu yonso udi ulenga tshianza hamʼbidi hai neikale ne bukoya.

²⁷Nyama yonso udi wenda ne makama udi mubi kunudi, muntu yonso udi ulenga tshianza hamʼbidi hai neikale ne bukoya tô ne dilolo.

²⁸Muntu yonso udi utuala mubidi mufue wa nyama ei, neuvuwe bilulu biandi, neikale ne bu koya tô ne dilolo, nyama ei idi mibi kunudi.

²⁹Bintu ebi bidi bibi munkatshi mua bintu bidi bidikoka hanshi ha buloba bibulebule ne mpuka ne dibemba

³⁰ne musodi ne tshiula ne lungonyonyi.

³¹Bintu ebi bidi bibi kunudi munkatshi mua bintu bidi bidikoka hanshi, muntu yonso udi ubilenga tshianza hadibi bifue yeye neikale ne bukoya tô ne dilolo

³²Bikala bintu ebi bifue ne biahonabi ha tshintu, tshintu atshi netshikale ne bukoya, nansha dilonga nansha bilulu nansha biseba nansha tshibombi nansha tshintu tshikuabo tshidibo benza nʼatshi mudimu, nebatshiteke mu mai, netshikale ne bukoya tô ne dilolo, nunku netshikale tshitoke tô.

³³Biahona bintu ebi mu tshivuadi tshia dima, netshikale ne bukoya, nebatshishihe.

³⁴Bintu bionso bia kudia bidi bituangana ne mai akadi mu bintu ebi nebikale ne bukoya, ne mai a kunua onso akadi mu bintu ebi neikale ne bukoya.

³⁵Biahona tshituha tshia mibidi mufue ya bintu ebi ha tshintu, tshintu atshi netshikale ne bukoya, nansha nfulu nansha bivuadi, nebanshihe, bidi ne bukoya, nebikale bibi kunudi.

³⁶Kadi mpokolo wa mai anyi dina dia mai diakumbulabo didi ne mai a bungi, mai au neikale malengele, kudi bintu bionso bidi bituangana ne mibidi yabi mufue nebikale ne bukoya.

³⁷Biahona tshituha tshia mubidi yabi mufue ha bintu bidibo bakuna mu buloba, bintu ebi nebikale bilengele.

³⁸Bielabo mai ha bintu ebi bia kukuna ne biahona tshituha tshia mubidi yabi mufue ha mutu habi, bintu ebi nebikale ne bukoya kunudi.

³⁹Biafua nyama wa munkatshi mua nyama mudi mua kudia, mundi yonso udi ulenga tshianza tshiandi hamʼbidi handi neikale ne bukoya tô ne dilolo.

⁴⁰Muntu udi udia munyinyi wandi neuvuwe bilulu, neikale ne bukoya tô ne dilolo, ne mundi udi utuala mubidi wandi mufue neuvuwe bilulu biandi, neikale ne bukoya tô ne dilolo.

⁴¹Bintu bionso bidi bidikoka hanshi ha buloba bidi bibi, kanudi bintu ebi.

⁴²Bintu bionso bidi bidikoka hanshi ne mafu, anyi bintu bidi bienda ne mikolo mai, kanudi bintu ebi bionso bidi bidikoka hanshi ha buloba, bualu bua bintu ebi bidi bibi.

⁴³Kanudionyi ne bintu bidi bidikoka hanshi ha buloba, kanudienzedi bibi ne bintu bidi ne bukoya, kanudinyangi ne bintu ebi.

⁴⁴Bualu bua meme ndi Yehowa, Nzambi wenu; nunku nudilengeshe, nuikale bantu ba tshijila bualu bua meme ndi wa tshijila, kanudinyangi ne bintu bidi bidikoka hanshi ha buloba

⁴⁵Bualu bua meme ndi Yehowa wakanuhatula mu buloba bua Ejipitu bua kuikala Nzambi wenu; nuenu nuikale bantu ba tshijila bualu bua meme ndi wa tshijila.

⁴⁶Eu udi mukenji wa nyama ne wa nyunyu ne wa bintu bidi bienda mu mai ne bintu bionso bidi bidikoka hanshi ha buloba,

⁴⁷bua kutahulula bintu bibi ne bintu bimpe, ne bintu bidi ne muoyo binudi mua kudia ne bintu bidi ne muoyo binudi kanuyi mua kudia.