Read tshiluba Lewitiki 14 Bible Online

Lewitiki 14 - tshiluba bible

Lewitiki 14

²Eu udi mukenji wa muena nsudi mu dituku didibo bamulengesha, nebalue handi kudi muakuidi,

³ne muakuidi neaye biandi ku butshika bua tshitudilu, ne muakuidi neatangile, ne bikala disama dia muena nsudi dishike,

⁴neambile bantu bua bamuangatshile nyunyu ibidi idi miakane ne mitshi ya cèdre ne bintu bikunze-kunzû, ne mabeshi a hisopa;

⁵muakuidi neambile bantu bua bashihele nyunyu umue mu tshivuadi tshia dima ha mutu ha mai adi ahueka.

⁶Yeye neangate nyunyu utshidi ne muoyo ne mitshi ya cèdre ne bintu bikunze-kunzû ne mabeshi a hisopa, nealue bintu ebi ne nyunyu utshidi ne muoyo mu mashi a nyunyu wakashihabo ha mutu ha mai adi ahueka,

⁷yeye neamiamine mashi hamʼbidi ha muena nsudi udiye musue kulengesha misangu muanda mutekete, neambile bantu ne, Muntu eu udi muakane, nealekele nyunyu utshidi ne muoyo mu tshisuku.

⁸Muntu udi musue kudilengesha neuvuwe bilulu biandi, neabeye nsuki yandi yonso, neadioweshe ne mai, yeye neikale muakane; ku nyima nealue biandi mu tshitudilu, kadi neashikame ku mbelu kua ntenta wandi matuku muanda mutekete.

⁹Halua dituku dia muanda mutekete, yeye neabeye nsuki yandi yonso idi ku mutu wandi ne muedi wandi ne makiki andi ne miosa yandi yonso, neuvuwe bilulu biandi, neoweshe mubidi wandi ne mai, neikale muakane.

¹⁰Halua dituku dia muanda mutekete, yeye neangate bana balume ba mikoko babidi badi kabayi ne tshilema ne muana mukashi wa mukoko wa tshidimu tshimue udi kayi ne tshilema ne bituha bisatu bia dikumi bia épha[4] bia bukula bubotesha bu mulambu wa bukula busangisha ne manyi ne dikoho[5] dia manyi.

¹¹Muakuidi udi ulengesha muntu neashikike muntu udiye musue kulengesha ne bintu ebi ku mpala kua Yehowa ku mbelu kua ntenta wa kusangakena.

¹²Muakuidi neangate umue wa bana balume ba mikoko, neamufile bu mulambu wa disambuka dia mikenji, ne dikoho dia manyi, neabinyukule bu mulambu udibo banyukula ku mpala kua Yehowa;

¹³yeye neashihe muana mulume wa mukoko kudibo bashihela milambu ya kubindila nʼai bubi ne mulambu ya kuosha ha kahia mu nsubu wa tshitendelelu, mulambu wa disatu buka dia mikenji udi mulambu wa muakuidi bu mudi mulambu wa kubuikila nʼau bubi bua bantu, etshi ntshintu tshia tshijila.

¹⁴Muakuidi neangate mashi a mulambu wa disambuka dia mikenji, nealabe mashi ku lusongo lua ditshu dia ku tshianza tshia balume dia muntu udiye musue kulengesha, ne ku tshiala tshia ku tshianza tshiandi tshia balume, ne ku muanʼa dikasa munene wa ku tshianza tshia balume.

¹⁵Muakuidi neangate dikoho[6] dia manyi, nele munda mua tshianza tshiandi tshia bakashi,

¹⁶neafue munu wandi wa ku tshianza tshia balume mu manyi adi mu tshianza tshiandi tshia bakashi, neamiamine manyi ne munu wandi misangu muanda mutekete ku mpala kua Yehowa.

¹⁷Muakuidi nealabe manyi adi ashala mu tshianza tshiandi ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshiandi tshia ku tshianza tshia balume ne ku muanʼa dikasa munene wa ku tshianza tshia balume ha mutu ha mashi a mulambu wa disambuka dia mikenji,

¹⁸manyi adi ashala mu tshianza tshia muakuidi, nêle ha mutu ha muntu udiye musue kulengesha, muakuidi neafile mulambu wa kubuikila nʼau bubi buandi ku mpala kua Yehowa.

¹⁹Muakuidi neafile mulambu wa kubuikila nʼau bubi, neabuikile bubi bua muntu udiye musue kulengesha ku bubi buandi ku nyima yeye neashihe mulambu wa kuosha ha kahia,

²⁰muakuidi neafile mulambu wa kuosha ha kahia ne mulambu wa bukula ha tshioshelu, muakuidi neamubuikidile bubi buandi, ne yeye neikale muakane.

²¹Bikaleye muntu muhele udi kayi mua kusangisha bintu ebi bionso, neangate muana mulume wa mukoko umue bu mulambu wa disambuka dia mikenji bua kunyukula kudi Yehowa bua kumubuikidila nʼau bubi buandi, ne tshituha tshimue tshia dikumi tshia épha[7] tshia bukula bubotesha busangisha ne manyi ne dikoho dia manyi

²²ne nyunyu ya nkutshi ibidi anyi mputu nyunyu ibidi, bu bintu bidiye mua kuangata, nyunyu umue neikale bu mulambu wa kubuikila nʼau bubi ne mukuabo bu mulambu wa kuosha ha kahia.

²³Halua dituku dia muanda mukulu, nealue ne bintu bia kudilengesha nʼabi kudi muakuidi ku mbelu kua ntenta wa kusangakena ku mpala kua Yehowa,

²⁴muakuidi neangate muana wa mukoko wa mulambu wa disambuka dia mikenji ne dikoho dia manyi, ne muakuidi neabinyukule bu mulambu udibo banyukula ku mpala kua Yehowa.

²⁵Yeye neashihe muana wa mukoko wa mulambu wa disambuka dia mikenji, ne muakuidi neangate mashi makuabo a mulambu wa disambuka dia mikenji, nealabe ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshia ku tshianza tshia balume ne ku muanʼa dikasa munene wa ku tshianza tshia balume.

²⁶Muakuidi nêle manyi munda mua tshianza tshiandi tshia bakashi,

²⁷muakuidi neamiamine ne munu wandi wa ku tshianza tshia balume manyi adi mu tshianza tshiandi tshia bakashi misangu muanda mutekete ku mpala kua Yehowa,

²⁸muakuidi nealabe manyi adi mu tshianza tshiandi tshia bakashi ku lusongo lua ditshu dia ku tshianza tshia balume dia muntu udiye musue kulengesha ne ku tshiala tshiandi tshia ku tshianza tshia balume ne ku muanʼa dikasa munene wa ku tshia nza tshia balume, ha mutu ha mashi a mulambu wa disambuka dia mikenji,

²⁹manyi adi ashala mu tshianza tshia muakuidi, yeye neaele ha mutu ha muntu udiye musue kulengesha, bua kumubuikidila disambuka diandi ku mpala kua Yehowa.

³⁰Neafile umue wa nyunyu wa nkutshi anyi wa mputu nyunyu udiye mua kuangata

³¹umue wa mulambu wa kubuikila nʼau bubi ne mukuabo wa mulambu wa kuosha ha kahia ne mulambu wa bukula, muakuidi neafile mulambu wa kubuikila nʼau bubi bua muntu udiye musue kulengesha ku mpala kua Yehowa.

³²Eu udi mukenji wa muena nsudi udi kayi mua kusangisha bintu bia mushinga mukole bia kudilengesha nʼabi.

³³Yehowa wakambila Mose ne Alona ne,

³⁴Hanualua mu buloba bundi musue kunuha bu buhianyi buenu ne hanateka disama dia nsudi mu nsubu wa mu buloba bua buhianyi buenu,

³⁵nunku muena nsubu nealue biandi, neambile muakuidi ne, Ndi ngelangana meji ne ditoba dia disama didi mu nsubu muanyi.

³⁶Muakuidi nele dî diandi bua kumusha bintu bionso bia mu nsubu diambedi muakuidi kayi muanze kubuela bua kutangila disama, bua bintu bionso bia mu nsubu kabilu bu bintu bidi kabiyi biakane, ku nyima muakuidi neabuele bua kutangila mu nsubu.

³⁷Yeye neatangile hadi disama, ne biamueneka disama mu bimanu bia nsubu milongo mifike ne milongo mikunze, ne bielanganeye meji ne bintu ebi biakubuela munda mua tshimanu mene mene,

³⁸muakuidi neahatuke ku mushiku wa mbelu wa nsubu, neinshile bibi bia nsubu matuku muanda mutekete.

³⁹Muakuidi neahingane dituku dia muanda mutekete, neatangile kabidi, ne bikala disama ditampakane mu bimanu bia nsubu,

⁴⁰muakuidi nêle di bua kumusha mabue akadi ne disama, nebêle mu muaba udi kauyi muakane ku butshika bua musoko,

⁴¹nebakuone munda mua nsubu, nebêle bintu bidibo bakuona ku butshika bua musoko mu muaba udi kauyi muakane,

⁴²nebangate mabue makuabo, nebâbueshe mu miaba ya makuabo, nebajinguile makuabo mu miaba yakadi makuabo.

⁴³Biamueneka disama mu nsubu kabidi hashikisheye kumusha mabue ne kukuona munda mua nsubu ne hajinguileye makuabo,

⁴⁴muakuidi nealue bua kutangila, ne bikala disama ditampakane mu nsubu, edi ndisama dia nsudi didi mu nsubu, nsubu kena muakane.

⁴⁵Yeye neuhule nsubu ne mabue a nsubu ne mabaya ne bionso biakajinguileye nʼabi nsubu, nebabituale ku butshika bua musoko ku muaba udi kauyi muakane.

⁴⁶Biabuela muntu mu nsubu mu matuku akinshileye bibi, yeye neikale bu muntu udi kayi muakane tô ne dilolo.

⁴⁷Muntu udi ulala mu nsubu neuvuwe bilulu biandi, ne muntu udi udia bidia mu nsubu neuvuwe bilulu biandi.

⁴⁸Bialua muakuidi ne hatangileye ne disama kadiena ditampakana mu nsubu hashikishabo kumujinguila, muakuidi neambile bantu ne, Nsubu eu udi muakane bualu bua disama diakashika.

⁴⁹Yeye neangate bintu bia kulengesha nʼabi nsubu nyunyu ibidi ne mitshi ya cêdre ne bintu bikunze ne mabeshi a hisopa,

⁵⁰neashihele umue wa nyunyu mu tshivuadi tshia dima ha mutu ha mai adi ahueka,

⁵¹neangate mitshi ya cêdre ne mabeshi a hisopa ne bintu bikunze ne nyunyu utshidi ne muoyo, neafue bintu ebi mu mashi a nyunyu wakashiheye ne mu mai adi ahueka, neâmiamine ku nsubu misangu muanda mutekete.

⁵²Yeye nealengeshe nsubu ne mashi a nyunyu ne mai adi ahueka ne nyunyu utshidi ne muoyo ne mitshi ya cêdre ne mabeshi a hisopa ne bintu bikunze,

⁵³kadi yeye nealekele nyunyu utshidi ne muoyo mu tshisuku ku butshika bua musoko, nealengeshe nsubu nunku, ne nsubu neikale muakane.

⁵⁴Eu udi mukenji wa disama dia nsudi

⁵⁵dia mu tshilulu anyi dia mu nsubu,

⁵⁶ne wa tshiuja kabidi anyi wa tshilamulamu anyi wa ditoba ditoke,

⁵⁷bua kubalesha hadi bintu kabiyi biakane ne hadibi biakane eu udi mukenji wa disama dia nsudi.