Read tshiluba Lewitiki 19 Bible Online

Lewitiki 19 - tshiluba bible

Lewitiki 19

¹Yehowa wakambila Mose ne,

²Wambile Bena Isalele ne, Nuikale bantu ba tshijila bualu bua meme Yehowa, Nzambi wenu, ndi wa tshijila.

³Muntu yonso atshine tatuʼandi ne mamuʼandi, nuvuluke matuku a lumingu ndi Yehowa, Nzambi wenu.

⁴Kanukudimunyi mitshima yenu kudi mpingu, kanudienzedi mpingu ne tshiamu tshiakengululabo mu kahia ndi Yehowa, Nzambi wenu.

⁵Hanualua ne mulambu wa kubisha nʼau ditalala kudi Yehowa, nûfile ne mutshima udiye mua kuitabusha.

⁶Nenudie mulambu dituku dinudi nûfila ne makelela kabidi, biashala tshintu tô ne dituku disatu nebatshioshe mu kahia.

⁷Biatshidiabo dituku disatu, bualu ebu budi bubi, tshiena ngitabusha mulambu,

⁸muntu yonso udi ûdia neadituadile bubi buandi, bualu bua yeye wakuona tshintu tshijila tshia Yehowa, nebumushe muntu au munkatshi mua bana babo.

⁹Hanuahuola bintu binuakakuna mu buloba, kanuhuodi ku matengu a madimi, kanusangishi bintu bionso binudi nuhuola.

¹⁰Kanusangishi tumuma tuonso ludi mu madimi enu, kanuambudi tumuma tuakahona hanshi mu madimi enu, nushiye bintu ebi bia kukuatshisha nʼabi bahele ne benyi meme ndi Yehowa, Nzambi wenu.

¹¹Kanuibi, kanudingidianganyi, kanushimianganyi.

¹²Kanuditshihi ne mashina ne dina dianyi, kanutedi dina dianyi tshitelatela, meme ndi Yehowa.

¹³Kanukengeshi mukuenu, kanuibi bintu biandi, kanushadi ne difutu dia muena mudimu butuku tô ne dinda.

¹⁴Kanuhendi muena mahaha, kanuteki tshintu tshia ku lenduisha nʼatshi muntu mufofo, kadi nuenu nutshine Nzambi wenu meme ndi Yehowa.

¹⁵Kanuenji bibi hanualumbulula tshilumbu, kanunemekedi muntu muhele, kanutumbishi muntu munene, kadi nulumbulule bilumbu bia muena mutumba nʼenu ne buakane mu mutshima.

¹⁶Kanuendakanyi bu bena mukoso munkatshi mua bantu benu, kanuhuwi bikala muena mutumba nʼenu mikuata kudi tshilumbu meme ndi Yehowa.

¹⁷Kuikadi ne lukuna mu mutshima kudi muanʼenu, kadi ubele muena mutumba nʼebe, bua wewe kutuadi bubi bua bualu buandi.

¹⁸Kudisombuedi, kuikadi ne lukuna kudi bana ba bana benu, kadi sua mukuenu bu mûdi mudisue, meme ndi Yehowa.

¹⁹Nutumikile mei anyi. Kanubueshakanyi bimuna bienu, kanukunyi ntete ya mishindu ibidi mu budimi bumue, kanuluatshi bilulu bikuma ne munda mashilangane.

²⁰Muntu yonso udi ulala ne mukashi muhika, udi mubangila kudi mulume, udi kayi muanze kuhikudibua, nebabakengeshe bubidi buabo, kabena babashiha bualu bua yeye kakadi muhikudibue.

²¹Mulume eu nealue ne mulambu wa kubuikila nʼau disambuka diandi dia mikenji kudi Yehowa, ku mushiku wa mbelu wa ntenta wa kusangakena, neafile tshimpanga tshia mulambu wa kubuikila nʼau disambuka diandi dia mikenji.

²²Muakuidi neafile mulambu wa kumubuikidila nʼau bubi buakenzeye ku mpala kua Yehowa, ne bubi buandi buakenzeye nebuikale bubuikidibue.

²³Hanuahuola mu buloba ne hanuakuna mitshi ya mamuma, kunudi mamuma a mitshi tô bidimu bisatu.

²⁴Kadi halua tshidimu tshinai, nujidile mamuma onso a mu tshidimu atshi bua kutendelela nʼau Yehowa.

²⁵Halua tshidimu tshitanu, nudi mua kudia mamuma ne kuendulula nʼau mushinga meme ndi Yehowa, Nzambi wenu.

²⁶Kanudi tshintu ne mashi atshi, kanutempi mbuku, kanuenji bilengulengu.

²⁷Kanubeyi nsuki yenu biketu, kanuhungi miedi yenu ku bihanga.

²⁸Kanutahi mputu hamʼbidi henu bua kujinga nʼai bantu bafue, kanutahi nsalu hamʼbidi henu meme ndi Yehowa.

²⁹Kuendeshi muanʼebe mukashi masandi, malu a masandi neikale mu buloba, ne buloba nebukale ne malu mabi tente.

³⁰Uvuluke matuku a lumingu, wakale ne ditshina mu nsubu wanyi meme ndi Yehowa.

³¹Kanubuelakanyi ne bena mulongo anyi batempi ba mbuku, kanubakebi, kunudionyi kudibo meme ndi Yehowa, Nzambi wenu.

³²Uleshe kanemu kudi muntu udi ne nsuki yandi mitoke tô, unemeke muntu mununu, utshine Nzambi webe meme ndi Yehowa.

³³Biashikama muenyi mu buloba buenu, kanumuenzedi bibi.

³⁴Muenyi udi ushikama munkatshi muenu ikale bu muntu udi muledibue mu nsubu yenu, numusue bu munudi badisue, bualu bua nuenu nuakadi benyi mu buloba bua Ejipitu meme ndi Yehowa, Nzambi wenu.

³⁵Kanuenji bubi hanualumbulula bilumbu, anyi hanuidikisha bule bua bintu anyi bujitu buabi anyi bungi buabi.

³⁶Nuikale ne bihimu bimpe ne bihiminu bimpe, nuikale ne épha[8] muimpe ne hin[9] muimpe meme ndi Yehowa, Nzambi wenu, wakantaha tula mu buloba bua Ejipitu.

³⁷Nutumikile mei anyi onso ne mikenji yanyi yonso, nubienze, meme ndi Yehowa.