Read tshiluba Lewitiki 4 Bible Online

Lewitiki 4 - tshiluba bible

Lewitiki 4

¹Yehowa wakambila Mose ne,

²Wambile Bena Isalele ne, Bienza muntu bualu bubi ku mpukahuka budi Yehowa uhidia,

³bienza muakuidi muela manyi ha mutu bualu bubi budi buhisha bantu, yeye nealele mulambu wa muana wa ngombe udi kayi ne tshitema kudi Yehowa, bu mulambu wa kubuikidila nʼau bubi buandi.

⁴Nealue ne muana wa ngombe ku mbelu kua ntenta wa kusangakena ku mesu kua Yehowa, neatenteke tshianza tshiandi ha mutu ha muana wa ngombe, neashihe muana wa ngombe ku mesu kua Yehowa.

⁵Muakuidi muela manyi ha mutu neangate mashi makuabo a muana wa ngombe, nealue nʼau mu ntenta wa kusangakena,

⁶muakuidi neafue munu wandi mu mashi, neamiamine mashi misangu muanda mutekete ku mpala kua tshilulu tshikudika tshidi hankatshi ha nsubu wa tshitendelelu ku mesu kua Yehowa.

⁷Muakuidi nealabe mashi ku nsengu ya ku tshioshelu tshia musenga wa manananshi tshidi mu ntenta wa kusangakena ku mesu kua Yehowa, neahongolole mashi onso a muana wa ngombe ku tshitaka tshia tshioshelu tshia kahia tshidi ku mbelu kua ntenta wa kusangakena.

⁸Yeye neamushe dianyi dionso dia muana wa ngombe wa mulambu wa kubuikila nʼau bubi ne dianyi didi ha mutu ha bintu bia munda,

⁹tumuma tubidi ne dianyi didi ha mutu hatu hehi ne bituntuku bia bibelu ne lukutu lua mutshima ne lua tumuma neanumushe,

¹⁰bu mudibo bumusha dianyi dia muana wa ngombe wa mulambu wa kuikisha nʼau ditalala, muakuidi neabioshe ha tshioshelu tshia kahia.

¹¹Tshiseba tshia muana wa ngombe ne munyinyi wandi wonso ne mutu wandi ne bioku biandi ne bintu bia munda ne tuma tuandi

¹²ne mubidi wandi mujima, neabituale ku butshika bua tshitudilu ku muaba muteke kudibo bela butue, neabioshe ha nkunyi ne kahia, yeye neabioshile kudibo bela butue.

¹³Bienza Bena Isalele bonso bualu bubi, ne bikala bualu ebu busokome ku mesu kuabo, bienzabo bualu budi Yehowa uhidia ne biahilabo,

¹⁴ne hamanyabo bualu bubi buakenzabo, bantu bonso ba mu tshisumbu tshia Bena Isalele nebafile muana mulume wa ngombe bu mulambu wa kubuikila nʼau bubi, balue nʼandi ku mbelu kua ntenta wa kusangakena.

¹⁵Bakulu ba mu tshisumbu tshia Bena Isalele nebatentekashe bianza biabo ha mutu ha muana mulume wa ngombe ku mesu kua Yehowa, nebashihe muana mulume wa ngombe ku mesu kua Yehowa.

¹⁶Muakuidi nealue ne mashi makuabo a muana mulume wa ngombe ku nsubu wa tshitendelelu,

¹⁷muakuidi nealue munu wandi mu mashi, neamiamine misangu muanda mutekete ku mpala kua tshilulu tshikudika ku mesu kua Yehowa.

¹⁸Nealabe mashi ku nsengu ya ku tshioshelu tshidi mu ntenta wa kusangakena ku mesu kua Yehowa, yeye neahongolole mashi onso ku tshitaku tshia tshioshelu tshia kahia tshidi ku mbelu kua ntenta wa kusangakena.

¹⁹Neumushe dianyi dionso, neadioshe ha tshioshelu.

²⁰Yeye nênze nunku ne muana mulume wa ngombe, bu muakenzeye ne muana mulume wa ngombe wa mulambu wa kubuikila nʼau bubi bua bantu, muakuidi neafile mulambu wa kubuikila nʼau bubi buabo nunku, ne bubi buabo nebuikale bubuikidibue.

²¹Yeye neatuale muana mulume wa ngombe ku butshika bua tshitudilu, neamuoshe ha kahia bu muakenzeye ne muana mulume wa ngombe wa kumudilu eu udi mulambu wa kubuikila nʼau bubi bua bantu bonso.

²²Bienza mukokeshi wa bantu bualu bubi ku mpukahuka budi Yehowa uhidia ne biahilabo,

²³ne hamanyeye bualu bubi buakenzeye, neafue mpumbu wa mbushi udi kayi ne tshilema bu mulambu wandi,

²⁴neatenteke tshianza tshiandi ha mutu ha mbushi, neamushihe kudibo bashihela mulambu wa kuosha ha kahia ku mesu kua Yehowa, eu udi mulambu wa kubuikila nʼau bubi.

²⁵Muakuidi nealue munu wandi mu mashi makuabo a mulambu, nealabe ku nsengu ya ku tshioshelu tshia kahia, neahongolole mashi makuabo ku tshitaku tshia tshioshelu tshia kahia.

²⁶Neoshe dianyi dionso ha tshioshelu, bu muakenzeye ne dianyi dia mulambu wa kuikisha nʼau ditalala, muakuidi neafue mulambu wa ku buikila nʼau bubi buandi ne bubi buandi nebuikale bubuikidibue.

²⁷Bienza Muena Isalele bualu bubi ku mpukahuka budi Yehowa uhidia ne biahileye,

²⁸ne hamanyeye bualu bubi buakenzeye, yeye neafile mukashi wa mbushi udi kayi ne tshilema bu mulambu wa bubi buakenzeye.

²⁹Yeye neatenteke tshianza tshiandi ha mutu ha mbushi wa mulambu wandi, neamushihe kudibo bashihela mulambu wa kuosha ha kahia.

³⁰Muakuidi neafue munu wandi mu mashi makuabo, nealabe ku nsengu ya ku tshioshelu tshia kahia, neahongolole mashi makuabo ku tshiaku tshia tshioshelu.

³¹Neumushe dianyi dionso bu muakenzeye ne mulambu wa kuvuisha nʼau ditalala, muakuidi neadioshe ha tshioshelu bu tshintu tshidi tshitue dihembu kudi Yehowa, muakuidi neafile mulambu wa kubuikila nʼau bubi buandi, ne bubi buandi nebuikale bubuikidibue.

³²Bialueye ne muana wa mukoko bu mulambu wa kubindila nʼau bubi, nealue biandi ne mukashi wa mukoko udi kauyi ne tshilema.

³³Yeye neatenteke tshianza tshiandi ha mutu ha mukoko wa mulambu wandi, neanshihe kudibo bashihela mulambu wa kuosha ha kahia.

³⁴Muakuidi neafue munu wandi mu mashi makuabo, neâlabe ku nsengu ya ku tshioshelu tshia kahia, neahongolole mashi onso makuabo ku tshitaku tshia tshioshelu.

³⁵Neumushe dianyi dionso bu muakenzeye ne mulambu wa kuvuisha nʼau ditalala, muakuidi neadioshe ha tshioshelu bu muakenzeye ne milambu ya kuosha ha kahia, muakuidi neafile mulambu wa kubuikila nʼau bubi buandi, ne bubi buandi nebuikale bubuikidibue.