Read tshiluba Yelemiya 16 Bible Online

Yelemiya 16 - tshiluba bible

Yelemiya 16

¹Dî dia Yehowa diakalua kundi ne,

²Wewe kubaki mukashi, kuledi bana ba balume anyi bana ba bakashi ku muaba eu.

³Bualu bua Yehowa udi wamba bua bana ba balume ne bana ba bakashi bakaledibua mu muaba eu, ne bua bamamu hakabalela ne bua batatu bakabalelesha mu buloba ebu, ne.

⁴Bobo nebafue ne lufu lua masama mabi, bantu kabena babashila muadi ne kabena babajika; nebikale bu tunvi ha buloba. Nebashihibue ku muele wa nvita ne ku tshiole; bitalu biabo nebikale bia kudia bia nyunyu ya mulu ne bia nyama ya ha buloba.

⁵Bua Yehowa udi wamba ne, Kubuedi mu nsubu wa madilu, kuyimu bua kubajinga anyi kubashila muadi, bualu bua nakûmusha ditalala dianyi, nduse luanyi lujalame kudi bantu aba.

⁶Ne bantu banene ne bantu bahuekele nebafue mu buloba ebu; kabena bajikibua, bakuabo kabena babajinga anyi baditaha mputa bualu buabo, anyi badibeya nsuki bualu buabo.

⁷Kabena mua kuhesha bena madilu bidia bua kubasamba bua bafue baho; kabena mua kubahesha luhanza lua kubasamba nʼalu bua lufu lua batatuʼabo anyi lua bamamuʼabo.

⁸Wewe kubuedi mu nsubu mudi bidia bia disanka bua kushikama nʼabo, bua kudia nʼabo ne bua kunua nʼabo.

⁹Bualu bua Yehowa wa misumba, Nzambi wa Isalele, udi wamba ne, Monai, nendekeshe di dia tuseku ne di dia disanka, dî dia mubaki wa mukashi ne dia mukashi udiye ubaka mu muaba eu, ku mesu kuebe ne mu matuku ebe.

¹⁰Mu diba edi, hawalesha bantu aba mei â onso, nebakukonke ne, Yehowa wakuamba mei â onso bua kutuhisha nʼau bualu kai? Tuakuhambuka kudi kunyi? Tuakuenzela Yehowa Nzambi wetu bubi kai?

¹¹Nunku neubambile ne, Yehowa udi wamba ne, Bualu bua batatu benu bakundekela, bakulonda nzambi ya bende, bakuyikuatshila mudimu, bakuyitendelela, bakundekela ne kabakutumikila mikenji yanyi.

¹²Nuenu kabidi nuakuhita batatu benu kuenza malu mabi; bua, monai munudi nuenda, muntu ne muntu, mu tshitshu tshia mutshima wandi mubi, kayi ungunvuila.

¹³Bua malu â nennuihate mu buloba ebu bua kunutuma ku buloba bunudi kanuyi banze kumanya, nansha nuenu nansha batatu benu; ne mu muaba wawa nenukuatshile nzambi mikuabo mudimu munya ne butuku; bualu bua tshiena nnulesha diakalengele.

¹⁴Nunku Yehowa udi wamba ne, Monai, matuku nealue ikalabo kabayi bamba kabidi ne, Bu mudi Yehowa ne muoyo wakaluhula Bena Isalele mu buloba bua Ejipitu;

¹⁵kadi nebambe ne, Bu mudi Yehowa ne muoyo wakaluhula Bena Isalele mu buloba bua ku node ne ku maloba onso kuakabihateye. Nendue nʼabo kabidi mu buloba bunakaha bankambua babo.

¹⁶Yehowa udi wamba ne, Monai, nentume di bua kubikila bilembi bia minyinyi ya mu mai bia bungi, nebibakuate; ku nyima nembikile bilembi bia nyama bia bungi, ne biobi nebibakebe ku mikuna mile yonso ne ku mikuna mikese ne munkatshi mua mena a mu mabue.

¹⁷Bualu bua mesu anyi adi amona nshila yabo yonso, kayena misokoma kundi, ne mibi yabo kayena misokoma ku mesu kuanyi.

¹⁸Nendianjile kubafuta dikenga dia musangu muibidi bua malu mabi abo ne bua mibi yabo, bualu bua bakunyanga buloba buanyi ne bitalu bia bintu biabo bibi, ne bakûsha buhianyi buanyi tente ne malu abo a bundu.

¹⁹Wewe Yehowa, bukole buanyi ne musoko wanyi mukoleshibue ne ngumbu, tshinyemenu tshianyi mu dituku dia dikenga, ba mu bisamba bia bantu nebalue kûdi, bafume kunfudilu kua buloba, bamba ne, Batatu betu bakahiana anu mashimi ne malu a hatuhu adi kâyi mua kubakuatshisha.

²⁰Muntu neadisongele mpingu idi kayiyi nzambi, anyi?

²¹Nunku, Monai, nembamanyishe, musangu eu umue nembamanyishe tshianza tshianyi ne bukole buanyi; nebamanye ne, Dina dianyi didi Yehowa.