Read tshiluba Yelemiya 22 Bible Online

Yelemiya 22 - tshiluba bible

Yelemiya 22

¹Yehowa wakamba ne, Uhueke biebe ku nsubu wa mukelenge wa Yuda,

²wambileku ne, Unvuai dî dia Yehowa, wewe mukelenge wa Yuda, udi mushikame mu nkuasa wa bukelenge wa Davidi, wewe mene, ne bena mudimu bebe, ne bantu bebe badi babuela ku bibi ebi bia ku musoko.

³Yehowa udi wamba ne Lumbululai bilumbu ne kulumbulula kuakane ne enzai bienzedi biakane; nuhandishe udi ne bintu biandi bi nyengibue mu bianza bia mumukengeshi. Kanubenzedi bibi, kanukengeshi nansha muenyi nansha muanʼa nshiya nansha mukashi wa mulufuila; kanumatshishi mashi a muntu udi kayi ne bualu hanshi mumuaba eu.

⁴Bua binuatumikila mei â bulelela, nunku banfumu badi bashikame mu nkuasa wa bukelenge wa Davidi nebabuele mu bibi bia ku nsubu eu, benda mu makalu ne ha nyima ha tubalu, bobo, bena mudimu babo ne bantu babo.

⁵Yehowa udi wamba ne, Kadi binuahidia kunvua mei â, ndi nditshiha nkayanyi ne, Nsubu eu neabutuke kabutu.

⁶Bualu bua Yehowa udi wamba bua tshiota tshia mukelenge wa Yuda ne, Wewe udi kundi bu Gilada, ne bu mutu wa Lebanona, kadi bulelela, nenkuvuishe bu tshihela, ne musoko udi kauyi ne bantu.

⁷Nendongolole babutudi bua kubutulabo, muntu ne muntu ne bielelu bia nvita mu bianza biandi; bobo nebatahe mitshi yebe ya cédre idi itamba buimpe, nebayele mu kahia.

⁸Ba mu bisamba bia bungi nebahitshile hehi ne musoko eu, muntu yonso ne muena mutumba nʼandi nebakonkangane ne, Yehowa wakuenzela musoko eu munene nunku bua tshinyi?

⁹Mu diba adi nebabakudimune ne, Bualu bua bakashiha tshihungidi tshia Yehowa Nzambi wabo, bakatendelela nzambi mikuabo, ne bakayikuatshila mudimu.

¹⁰Kanuashidi muntu eu mufue muadi, kanumujingi; kadi nudile bikole bua muntu udi uya kukuabo, bualu bua kena uhingana kabidi, kena umona buloba buakamulelabo.

¹¹Bua Yehowa udi wamba bualu bua Shaluma, muana wa Yoshiya, mukelenge wa Yuda, wakakokesha mu muaba wa Yoshiya tatu wandi ne wakaluhuka mu muaba eu, ne, Yeye kena uhingana kabidi;

¹²kadi neafuile ku muaba wikalabo baye nʼandi mu buhika, kena umona buloba ebu kabidi.

¹³Mulau wikale kudi muntu udi wasa nsubu wandi ku malu mabi, ne udi ulongolola nsubu idi munda mua nsubu ku kulumbulula kubi; udi wenzesha muena mutumba nʼandi mudimu udi kauyi ne difutu, ne kena umuha difutu;

¹⁴udi wamba ne, Nendiashile nsubu munene udi ne nsubu mikuabo minene munda, udi utekamu madidishi a bungi; udi uteka mabaya a cèdre ku bisasa, udi ulabahu mukubu mukunzekunvû.

¹⁵Wewe neumanye mua kukokesha bakuabo bualu bua udi ukeba kubahita mu kuasa kua mabaya a cèdre, anyi? Tatu webe kakadia, kakanua, hakakoseye bilumbu bimpe ne hakenzeye biakane, anyi? Mu diba adi wakadi ne diakalengele.

¹⁶Yeye wakalumbulula bilumbu bia bahele ne bakengi; nunku wakadi ne diakalengele. Yehowa udi ukonka ne, Bualu ebu kabuena bukuatshisha muntu bua kummanya, anyi?

¹⁷Kadi mesu ebe ne mutshima webe bidi anu ku luhetu lûdi muangate ku mashimi, ne ku kumatshisha kua mashi a badi kabayi ne bualu, ne ku kunyenga kua bintu ne ku kukengesha kua bakuabo.

¹⁸Nunku Yehowa udi wamba bua Yehoyakima, muana wa Yoshiya, mukelenge wa Yuda ne, Kabena bamuashila muadi, badila ne, Aka, muanʼetu mulume! Aka, muanʼetu mukashi! Kabena bamujinga ne, Aka, mukelenge wetu! Anyi ne, Aka, butumbi buandi!

¹⁹Nebamujike bu mudibo bajika nyama wa mpunda, bamukoke hanshi ne bamuimashe ha nyima ha bibi bia ku Yelushalema.

²⁰Banda mukuna wa Lebanona, washilahu muadi; bisha dî diebe mu Bashana; muadi webe ufume ku Abalima, bualu bua bakubutula banangi bebe bonso.

²¹Nakakuambila dî hawakadi ne diakalengele diebe; kadi wewe wakamba ne, Tshiena ngunvua nansha. Etshi tshiakadi tshilele tshiebe tshia ku buana buebe ne wewe kuakutumikila dî dianyi.

²²Luhehele neludie balami bebe ba mikoko bonso, ne banangi bebe nebabuele mu buhika. Bulelela, mu diba adi neukuatshike bundu, neutshinyishibue bua malu mabi ebe onso.

²³Wewe udi mushikame ha mukuna wa Lebanona, udi wibaka disua diebe mu mitshi ya cèdre, mona bu muwajinga kufuidibua luse halua didinyenga kukukuata, bu kanyinganyinga ka mukashi udi wamba kulela!

²⁴Yehowa udi wamba ne, Bu mundi bianyi ne muoyo, bu wewe Yekoniya, muana wa Yehoyakima, mukelenge wa Yuda, muikale kakanu ka tshimanyishilu ka ku tshianza tshianyi tshia balume, nakadi kukukohola.

²⁵Nenkufile mu bianza bia badi bakeba muoyo webe ne mu bianza bia bantu baudi utshina, mu bianza bia Nebukadenesâ, mukelenge wa Babulona, ne mu bianza bia Bena Kasada.

²⁶Nenkutume wewe ne mamu webe wakakulela mu buloba bukuabo, munuakadi kanuyi baledibue, nenufuilemu.

²⁷Kadi kamina nuhingana kabidi ku buloba budi mitshima yenu ijinga bua kuhingana.

²⁸Muntu eu Yekoniya udi bu mulondo mufue udibo bahetula, anyi? Udi bu mulondo udi kauyi usankisha muntu, anyi? Nunku bua tshinyi badi babihata, yeye ne bana bandi, badi babatuma mu buloba budibo kabayi bamanye?

²⁹Wewe buloba, buloba, buloba, unvua dî dia Yehowa!

³⁰Yehowa udi wamba ne, Funda muntu eu bu muntu udi kayi ushala ne muana, bu muntu udi kayi uheta diakalengele mu matuku andi; bualu hua kakuena kuikala kabidi muana wa munkatshi mua bana bandi waheta diakalengele, washikama biandi mu nkuasa wa bukelenge wa Davidi, wakokesha kabidi mu buloba bua Yuda.