Read tshiluba Yelemiya 26 Bible Online

Yelemiya 26 - tshiluba bible

Yelemiya 26

¹Ku tshibangidilu tshia bukokeshi bua Yehoyakima, muana wa Yoshiya, mukelenge wa Yuda, dî edi dia Yehowa diakalua kudi Yelemiya ne,

²Yehowa udi wamba ne, Imana biebe mu tshiendelu tshia mu nsubu wa Yehowa, wambile ba mu misoko yonso ya mu Yuda badi balua kutendelela mu nsubu wa Yehowa mei onso andi nkuambila; kukosolodi dî dimue nansha.

³Bumue nebakunvuile, bua buonso buabo, muntu ne muntu, balukile, balekele kuenda mu nshila wabo mubi, bua meme nkudimune mutshima wanyi bua makenga andi mpangidisha kubakengesha nʼau bua bienzedi biabo bibi.

⁴Ubambile ne, Yehowa udi wamba ne, Binuahidia kunvua mei anyi, bua kuenda bienu mu mikenji inakuteka ku mpala kuenu,

⁵ne bua kunvua bienu mei a bantu banyi baprofete bandi nnutumina, njuka hanyi dinda dinda bua kubatuma kunudi, kadi kanuakubunvuila;

⁶nunku nenvuishe nsubu eu bu Shilo, ne musoko eu newikale wa mulau kudi bisamba bionso bia ha buloba.

⁷Bakuidi ne baprofete ne bantu bonso bakunvua Yelemiya wamba mei â mu nsubu wa Yehowa.

⁸Hakashikisha Yelemiya kuamba mei onso akamuambila Yehowa bua kuambileye bonso, bakuidi ne baprofete ne bantu bonso bakamukuata, bamba ne, Wewe neufue bulelela.

⁹Bualu kai wakuamba dî edi mu dina dia Yehowa ne, Nsubu eu neikale bu Shilo, ne musoko eu newikale bu muaba wa hatuhu, kauyi ne bantu? Bantu bonso bakunguila Yelemiya tshisumbu mu nsubu wa Yehowa.

¹⁰Hakunvua baminyampala ba mu Yuda lumu lua malu â, bakafuma mu nsubu wa mukelenge, bakabanda ku nsubu wa Yehowa; bakashikama ku mbelu kua tshibi tshihia-tshihia tshia mu nsubu wa Yehowa.

¹¹Mu diba adi bakuidi ne baprofete bakambila baminyampala ne bantu bonso ne, Muntu eu udi ne bualu bua kufua; bualu bua yeye wakuamba mei mabi bua musoko eu, bu munuakunvua ku matshu enu.

¹²Hashishe Yelemiya wakambila bakokeshi ne bantu ba hatuhu bonso ne, Yehowa wakuntuma bua kuamba mei a kuhisha nʼau nsubu eu ne mei a onso anuakunvua.

¹³Nunku nulengeshe nshila yenu ne bienzedi bienu bibi, nutumikile dî dia Yehowa, Nzambi wenu; ne Yehowa neakudimune mutshima wandi bua makenga akuambeye bua kunutumina.

¹⁴Kadi monai, meme ndi anu mu bianza bienu, nungenzele malu onso adi mimpe ku mesu kuenu.

¹⁵Kadi numanye bienu bualu ebu bimpe ne, Binuanshiha, nenuteke mashi a muntu udi kayi ne bualu hamʼbidi henu ne ha musoko eu ne hamʼbidi ha bena musoko; bualu bua Yehowa wakuntuma kunudi bulelela bua kunuambila mei â onso mu matshu enu.

¹⁶Hashishe baminyampala ne bantu bonso bakambila bakuidi ne baprofete ne, Muntu eu kena ne bualu bua kufua, bualu bua yeye wakutuambila dî mu dina dia Yehowa, Nzambi wetu.

¹⁷Mu diba adi bakulu bakuabo ba mu buloba bakajuka ku mpala kua bantu, bakamba ne,

¹⁸Mika, Muena Molesheta, wakambila bantu dî dia Nzambi mu matuku a Hezikiya, mukelenge wa Yuda. Yeye wakambila Bena Yuda bonso ne, Yehowa wa misumba udi wamba ne, Nebabundulule Siona bu mudibo babundulula budimi, Yelushalema nealue anu bikulu, ne mukuna wa ntempelo newikale bu mukuna mu ditu.

¹⁹Hezikiya, mukelenge wa Yuda, ne ba mu Yuda bonso bakamushiha, anyi? Hezikiya kakatshina Yehowa, kakasengelela Yehowa bua kumuha diakalengele, anyi? Ne Yehowa kakakudimuna mutshima wandi bua makenga akadiye musue kubatumina, anyi? Nunku tuetu tudi tuamba kudivuishila dikenga dinene.

²⁰Muntu mukuabo wakadiku kabidi, wakamba dî mu dina dia Yehowa, dina diandi Uliya, muana wa Shemaya wa ku Kîyata-yalima. Yeye wakamba mei bua kuhisha nʼau musoko eu ne buloba ebu bu muakadi mei onso akamba Yelemiya.

²¹Hakunvua mukelenge Yehoyakima mei andi ne bena bukitu bandi bonso ne baminyampala bandi bonso, mukelenge wakakeba kumushiha. Kadi hakunvua Uliya lumu elu, wakatshina, wakanyemena ku Ejipitu.

²²Mukelenge Yehoyakima wakatuma bantu ku Ejipitu, Elenatana, muana wa Akabo, ne bantu hakuabo nʼandi,

²³bakakuata Uliya, hakumuka nʼandi mu Ejipitu, bakalua nʼandi kudi mukelenge Yehoyakima, wakamushiha ne muele wa nvita, wakela tshitalu tshiandi mu nkita ya bantu ba hatuhu.

²⁴Kadi tshianza tshia Ahikama, muana wa Shafana, tshiakadi tshikuatshisha Yelemiya, bua kabamufidi mu bianza bia bantu bua bobo bamushihe.