Read tshiluba Yelemiya 39 Bible Online

Yelemiya 39 - tshiluba bible

Yelemiya 39

¹Malu au akenzeka hakanyengabo Yelushalema. Mu tshidimu tshia tshitema tshia bukokeshi bua Sedekiya, mukelenge wa Yuda, mu ngondo wa dikumi, Nebukadenesâ, mukelenge wa Babulona, wakalua ne masalayi andi onso bua kuluisha Bena Yelushalema, ne bakautshintshimika.

²Mu tshidimu tshia dikumi ne tshimue tshia bukokeshi bua Sedekiya, mu ngondo muinai, ne mu dituku dia tshitema dia mu ngondo eu, bakashimbula tshituha tshia lumbu lua musoko.

³Mu tshikondo atshi baminyampala ba mukelenge wa Babulona hakabuela mu musoko, bakashikama hehi ne tshibi tshia hankatshinkatshi ha lumbu lua musoko. Menʼabo akadi Nêgala-shalesê, Samagâ-Nebo, Sâsekima, kapita ka Bantu Batungula, Nêgala-shalesê, kapita ka Bena Meji, ne baminyampala bakuabo bonso ba mukelenge wa Babulona.

⁴Hakabatuma mukelenge Sedekiya, mukelenge wa Yuda, ne bena nvita bandi bonso, bakanyema, bakaluhuka mu musoko butuku, bakayila mu nshila wa tshibidi tshia mukelenge, bahitshila mu tshibi tshiakadi hankatshi ha ngumbu ibidi, bakayila mu nshila wa ku tshibanda tshia Alabâ.

⁵Kadi masalayi a Bena Kasada akabalonda ku nyima, akabihata, akaheta Sedekiya mu mpata wa Yeleko. Hakamukuatau, akalua nʼandi kudi Nebukadenesâ, mukelenge wa Babulona, ku Libela mu buloba hua Hamata; ne yeye wakamulumbuluisha.

⁶Mu diba adi mukelenge wa Babulona wakashiha bana balume ba Sedekiya ku mesu kuandi mu Libela. Mukelenge wa Babulona wakashiha bantu banene ba mu Yuda bonso kabidi.

⁷Wakashiha mesu a Sedekiya, wakamusuika ne nkanu bua kuyeye nʼandi ku Babulona.

⁸Bena Kasada bakosha nsubu wa mukelenge ne nsubu ya bantu ba hatuhu ne kahia, bakashimbula ngumbu ya Yelushalema.

⁹Hashishe Nebuzaladana, kapitene ka bansentedi ba masalayi, wakaya ne bantu bakashala mu musoko mu buhika ku Babulona, ne bakadi badifila kudiye, ne bantu bonso bakadi bashala.

¹⁰Kadi Nebuzaladana, kapitene ka bansentedi, wakashiya bantu bahele bakadi kabayi ne tshintu mu buloba bua Yuda, ne wakabaha madimi a tumuma tua nvinyo ne madimi makuabo diatshimue.

¹¹Nebukadenesâ, mukelenge wa Babulona, wakelela Nebuzaladana, kapitene ka bansentedi, mukenji bualu bua Yelemiya ne,

¹²Umukuate, umulame, kumuenzedi bualu bubi; kadi umuenzele anu bu mudiye ukuambila.

¹³Nunku Nebuzaladana, kapitene ka bansentedi, ne Nebushazabana, kapita ka Bantu Batungula, Nêgala-shalesê, kapita ka Bena Meji, ne tupitene tunene tua mukelenge wa Babulona

¹⁴bakatuma bantu, bakumushe Yelemiya mu tshitendelu tshia balami ba nsubu wa lukanu, bakamufila mu bianza bia Gedaliya, muana wa Ahikama, muana wa Shafana, bua yeye amufile ku nsubu kuandi. Nunku Yelemiya wakashikama munkatshi mua bantu bakuabo.

¹⁵Dî dia Yehowa diakalua kudi Yelemiya hakadiye musuika mu tshiendelu tshia balami ba nsubu wa lukanu ne,

¹⁶Ya Wambile Ebede-meleke, Muena Atiopa, ne, Yehowa wa misumba, Nzambi wa Isalele, udi wamba ne, Mona, nenshikishe mei anyi onso anakuamba bua musoko eu bua kuwenzela malu mabi, kembua kuwenzela malu mimpe; neashikishibue ku mpala kuebe dituku adi.

¹⁷Kadi Yehowa udi wamba ne Nenkuhandishe mu dituku adi, kuena ufidibua mu bianza bia bantu aha baudi utshina.

¹⁸Yehowa udi wamba ne, Nenkusungile bushuwa, wewe kuena ushihibua ku muele wa nvita, kadi muoyo webe newikale kûdi bu tshintu tshilenga mu nvita, bualu bua wewe wakungeyemena.