Read tshiluba Yelemiya 51 Bible Online

Yelemiya 51 - tshiluba bible

Yelemiya 51

¹Yehowa udi wamba ne, Monai, nembishile ba mu Babulona ne badi bashikame mu Lebe-kamai tshihehele tshidi tshibashi-ha.

²Nentumine Bena Babulona bahehudi balualua kubahehula, nebashiye buloba buabo butuhu; bua mu dituku dia makenga abo nebabaluishe ku nseke yonso.

³Muena buta anane buta buandi kudi udi umunanyina buta bukuabo, ne kudi muluishi udi udimanyika ku mpala kuandi muluate tshibalu tshiandi tshia nvita. Kanutudi bansongalume bandi luse kadi nubutule bena nvita bandi bonso.

⁴Nebadishinde hanshi hafue mu buloba bua Bena Kasada, basompoke mu misesu ya misoko yabu.

⁵Bualu bua Nzambi wabo, Yehowa wa misumba, kena mushiye Bena Isalele anyi Bena Yuda bua kuikalabo bakashi bu ba mu lufuila nansha buloba buabo buikale bûle tente ne malu mabi akenzelabo wa Tshijila wa Isalele.

⁶Numuke mu Babulona, nunyenge, muntu yonso asungile muoyo wandi; kanufu nʼandi mu bubi buandi, bualu bua etshi ntshikondo tshia disombuela dia Yehowa, yeye neabafute difutu diabo.

⁷Babulona wakadi luhanza lua or mu tshianza tshia Yehowa, luakakuatshisha ba ha buloba bonso maluvu a malu mabi andi, ba mu bisamba bia bantu bakuma nvinyo yandi, nunku ba mu bisamba ebi bakuhala.

⁸Babulona wakushimbuka lukasa, wakubutudibua, numuashile muadi! Numuangatshile buanga bua kulaba ha mputa handi; bumue disama diandi nedishihe.

⁹Tuakadi kushikisha disama dia Babulona, kadi disama diandi kadiena dishika. Tumulekele, tuye bietu muntu ku buloba buandi, muntu ku buloba buandi; bualu bua kulumbulula kuandi kudi kufika tô ne mu diulu, kudi kubandishibua tô ne ku matutu.

¹⁰Yehowa wakulesha bantu dibingishibua dietu, luai, tuye kuambila ba mu Siona, bu mudi Yehowa Nzambi wetu mutuenzele!

¹¹Sakishai mikete, kuatai ngabu bikole; Bualu bua Yehowa wakusonsola mitshima ya banfumu ba Bena Madai, bualu bua yeye wakuhangidisha bua kubutula Babulona; bua edi ndisombuela dia Yehowa, disombuela didiye nʼadi bua ntempelo wandi.

¹²Bishai dibendela dia nvita bua bashimbule ngumbu ya Babulona, nanukilai bua kutentekela musoko, nutekeku batentekedi, nubalamine bua kubakuata; bualu bua Yehowa wakuhangidisha ne wakuenza dî diakambeye bualu bua bantu badi bashikame mu Babulona.

¹³Wewe udi mushikame hetu ne misulu ya mai ya bungi, udi ne luhetu lua bungi, nshikidilu webe wakumana kufika, luhetu luwakuangata ku buihi ludi luamba kujimina.

¹⁴Yehowa wa misumba wakuditshiha nkayandi ne, Nenkûshe ne bantu tente, bavulangana bu mukumbi, ne bobo nebakuele mbila bua bakukutamba bukole.

¹⁵Nyeye wakafuka buloba ku bukole buandi, wakajadika bintu bionso bidimu ku meji andi, wakavungulula diulu ne lungenyi luandi.

¹⁶Hambeye dî diandi, diyoyo dia mai a bungi didi mu diulu, yeye udi ubandisha dibungi didi difuma kunfudilu kua buloba. Udi wenzela nvula miele ya nvula, udi uhehesha mpehele idiye uhatula mu bibutshilu biandi.

¹⁷Muntu yonso wakulua muhote udi kayi ne meji, mufudi yonso wa biamu bia or wakufuishibua bundu bua tshifuanyikishi tshiakufuleye, bualu bua mpingu yandi idi bintu bia kudinga nʼabi bantu, kamuena muhuya munda muai.

¹⁸Idi bintu bia hatuhu bia kudinga nʼabi bantu, halua tshikondo tshiabi tshia kufua, nebijimine.

¹⁹Yehowa, Luseke lua Buhianyi bua Yakoba, kena bu bintu ebi, kadi yeye udi mufuki wa bintu bionso; Bena Isalele ntshisamba tshia buhianyi buandi, Yehowa wa misumba ndina diandi.

²⁰Wewe udi tshilonda tshianyi ne bielelu bianyi bia nvita, nentshibule nʼabi ba mu bisamba bia bantu bituha, nembutule nʼabi makelenge;

²¹nenkose nʼabi tubalu ne badi benda ha nyima hatu bituha, nentshibule nʼabi makalu a mata bituha, nenkose nʼabi badi bendahu;

²²nenkose nʼabi mulume ne mukashi bituha, nenkose nʼabi muntu mununu ne nsongalume bituha. Nenkose nʼabi nsongalume ne mushikankunde utshidi kamama bituha;

²³nenkose nʼabi mulami wa mikoko ne mikoko yandi bituha, nenkose nʼabi tshidime ne ngombe yandi bituha; nenkose nʼabi ba-gouverneur ne miloho yabo bituha.

²⁴Yehowa udi wamba ne, Nenfute Babulona ne bonso ba mu buloba bua Bena Kasada difutu ku mesu kuenu, bua malu mabi abo onso akuenzabo mu Siona.

²⁵Yehowa udi wamba ne, Mona, ndi nʼebe tshilumbu, wewe mukuna munene udi ubutula mikuabo, udi ubutula buloba buonso. Nengolole tshianza tshianyi bua kukukengesha, nenkûmushe munkatshi mua mabue a mulu bua kukubunguluisha hanshi, nenkuvuishe bu mukuna wakadi muhia kahia kau kajima.

²⁶Yehowa udi wamba ne, Kabena bumusha dibue kûdi bua kuditeka ku ditumba dia nsubu, anyi bua kuditeka ku bishimikidi bia nsubu; kadi newikale hatuhu tshiendelele.

²⁷Bishai dibendela mu buloba, elai mpungi munkatshi mua bisamba bia bantu, nulongolole bisamba ebi bua kuyabi kuluangana nʼandi nvita, nubikile ba mu makelenge a Alalata ne Mini ne Ashekenaza bua kuluangana nʼandi; nusungule kapitene kanene bua kuluangana nʼandi, nutume tubalu tua nvita bu bungi bua mikumbi idi ibisha masala.

²⁸Nulongolole ba mu bisamba bia bantu bua kuluangana nʼandi, bakelenge ba Bena Madai, ba-gouvemeur babo ne miloho yabo yonso, nulongolole buloba bujima budibo bakokesha.

²⁹Buloba budi buzakala, budi ne dikenga, bualu bua malu adi Yehowa muhangidishe bua kuenzela Babulona adi majalame, bua kuvuisheye buloba bua Babulona bu tshikisu, kakuyi muntu mushikamemu to.

³⁰Bena nvita ba mu Babulona bakulekela kuluangana, badi bashala mu mpangu yabo ya mabue, bukole buaho buakashika, bakulua bu bakashi; nsubu yandi idi mikuate kahia, biamu bia ku bibi biandi biakutshibuka.

³¹Muena mikanda udi unyema bua kusangakaneye ne mukuabo, messager udi unyema bua kusangakaneye ne mukuabo, bua kumanyisha mukelenge wa Babulona ne, Musoko webe udi munyengibue ku nseke yonso;

³²bakunyenga bisabukilu bionso, bakuosha masele a mu bitotshi ne kahia, buowa budi bukuata bena mata bonso.

³³Bualu bua Yehowa wa misumba, Nzambi wa Isalele, udi wamba ne, Muana mukashi wa Babulona udi bu tshishihuidi mu tshikondo tshidibo bashihula blé, hahita musangu muihi, tshidimu tshia kuhuola bintu biandi netshifike.

³⁴Nebukadenesâ, mukelenge wa Babulona, wakundia, wakundiata munda mua makasa andi, wakunvuisha bu dilonga didi munda mutuhu, wakummina bu mudi nyama munene wenza, wakûsha matama andi tente ne bia kudia bianyi bia nse, wakunsukasha.

³⁵Ba mu Siona bambe biabo ne, Dikenga diakutukengeshabo nʼadi dikale hamʼbidi ha Babulona! Bena Yelushalema bambe biabo ne, Mashi etu ikale hamʼbidi ha ba mu buloba bua Bena Kasada.

³⁶Nunku Yehowa udi wamba ne, Monai, nennuakuile tshilumbu tshienu, nennusombuele; nenkamishe mai andi manene, nengumishe mushimi wandi wa mai.

³⁷Babulona neikale anu mishiki ya nsubu minyanguke, muaba udi mibuabua nushikame, tshintu tshidi tshikemesha bantu ne tshidibo babangila, kakuyi muntu wushikamamu.

³⁸Nebakungule diatshimue bu nkungulu ya nyama ya ntambue, ne bakenge bu bana ba nyama ya ntambue.

³⁹Yehowa udi wamba ne, Huiwuabo luya lua nvinyo, nembalongoluele bidia bia disanka, nembakuatshishe maluvu, bua basanke biabo, balale tulu tua tshiendelele, kabayi batabale.

⁴⁰Nendue nʼabo ku tshishihelu bu bana ba mikoko, bu mudibo balueku ne bimpanga ne mpumbu ya mbushi.

⁴¹Tangila muakunyengabo Sheshaka, muakukuatabo butumbi bua bonso ba ha buloba! Tangila muakulua Babulona tshintu tshia kukemesha ba mu bisamba bia bantu!

⁴²Mai manene akabanda ha mutu ha Babulona, wakubuikidibua ne kuelangana kua mambuanka a bungi.

⁴³Misoko yabo yakushala bikulu, buloba bûme, ne tshihela tshia lusenga, buloba budi kabuyi ne bantu bashikamemu, budi kabuyi ne muana wa muntu uhitshilamu kabidi.

⁴⁴Nenkengeshe Bele mu Babulona, nempatule bintu biakumineye mukana muandi. Bena lukanu ba mu bisamba bia bantu kabena baya mu bisumbu kudiye kabidi, e, lumbu lua Babulona luakushimbuka.

⁴⁵Bantu banyi, luhukai munkatshi muandi! Muntu yonso adisungile ku tshiji tshikole tshia Yehowa.

⁴⁶Mitshima yenu kayiteketshi, ne kanutshinyi bienu, bua ngumu mudi nunyua mu buloba ebu. Bualu bua lumu lukuabo nelulue mu tshidimu tshimue, ne lukuabo nelulue mu tshidimu tshikuabo; diyoyo nedikale mu buloba, mukokeshi udi ufuilangana ne mukokeshi mukuabo.

⁴⁷Nunku, tangilai, mu matuku alualua, nenkengeshe mpingu misonga ya mu Babulona, ne ba mu buloba buandi bonso nebafuishibue bundu; bantu bandi bashihibue bonso nebahone hanshi munkatshi mua buloba buandi.

⁴⁸Yehowa udi wamba ne, Mu diba adi diulu ne buloba ne bintu bionso bidimu nebimbe misambu ya disanka bua kubutuka kua Babulona; bualu bua bamubutudi nebafike kudiye bafume ku luseke lua nôde.

⁴⁹Budi Babulona nʼabu mbua kuhona bualu bua Bena Isalele bashihibue, bu muakahoneshibua ba ha buloba bujima bua Babulona atumbishibue.

⁵⁰Nuenu, bakuhanduka ku muele wa nvita, yai bienu, kanuimanyi talalâ! Nuvuluke Yehowa ku miaba yenu ya kule, nuelangane meji a Yelushalema mu mitshima yenu.

⁵¹Tuakufuishibua bundu, bualu bua tuakunvua bihendu; bundu buakutukuata ku mesu, bualu bua bantu ba bende bakubuela mu miaba ya tshijila ya nsubu wa Yehowa.

⁵²Yehowa udi wamba ne, Nunku, monai matuku alualua analumbuluisha mpingu yandi misonga, ne bantu badibo bataha mputa nebatue mikemu mu buloba buandi buonso.

⁵³Yehowa udi wamba ne, Nansha biabanda Babulona tô ne mu diulu, nansha biakolesheye muaba wandi mukole kulu mene, bahaudi nebabike kudiye ba tume kundi meme.

⁵⁴Unvuai! Tshiona tshia muadi tshifume ku Babulona, tshiona tshia kubutuka kunene kufume ku buloba bua Bena Kasada!

⁵⁵Bualu bua Yehowa udi ubutula Babulona, udi uhuwisha dî diandi dinene. Badi baluangana nʼandi badi bela mbila bu tshiona tshia mai a bungi, mutoyi wa mei abo udi ubandaku.

⁵⁶Bualu bua bashihianganyi bakumana kufika ku Babulona, badi bakuata bena nvita bandi, badi batshibula mata abo bituha, bualu bua Yehowa udi Nzambi wa busombuedi, yeye neabasombuele bulelela.

⁵⁷Mukelenge udibo babikila ne, Yehowa wa misumba, udi wamba ne, Nenkuatshishe baminyampala bandi ne bena meji bandi maluvu, ba-gouverneur bandi, miloho yandi, bena nvita bandi bakole muomumue; nebalale tulu tua tshiendelele, kabena batabala kabidi.

⁵⁸Yehowa wa misumba udi wamba ne, Ngumbu minene ya Babulona nevishimbudibue kashidi, ne bibi biandi bile nebioshibue ne kahia; nunku bantu badi bakuata mudimu hatuhu, ne bisamba bia bantu bidi biditatshisha anu bua kumona midimu yabo mihie mu kahia.

⁵⁹Edi ndî diakela nʼadi Yelemiya muprofete mukenji kudi Selaya, muana wa Neliya, muana wa Mâseya, hakaya Selaya mu Babulona ne Sedekiya, mukelenge wa Yuda, mu tshidimu tshinai tshia bukokeshi buandi; Selaya wakadi kahita ka bena mudimu ba mu nsubu wa mukelenge.

⁶⁰Yelemiya wakafunda makenga onso akadi alua kudi Babulona mu mukunda, mei â onso mene akafundibua Babulona.

⁶¹Yelemiya wakambila Selaya ne, Hawafika ku Babulona, kuhangi kubala mei â onso,

⁶²wambe biebe ne, Wewe Yehowa, wakuamba dî diebe bualu bua muaba eu ne, Nengubutule bua mundi anyi nyama kabishikamimu, kadi newikale bikulu tshiendelele.

⁶³Hawashikisha kubala mukunda eu, usuikeku dibue, uwele mu bunene bua musulu wa Pelata.

⁶⁴Amba kabidi ne, Babulona neadine nunku, kena ubika kabidi, bualu bua malu makole andualua kumutumina; nebabange bikole. Tô ne aha hadi mei a Yelemiya.