Read tshiluba Muadi 3 Bible Online

Muadi 3 - tshiluba bible

Muadi 3

¹Meme ndi muntu wakumona dikenga ku mulangala wa tshiji tshiandi.

²Yeye wakundombela ne wakungendesha mu mîdima, kakungendesha mu munya.

³Bulelela, wakunkengesha ne tshianza tshiandi ku musangu ne ku musangu dinda tô ne ku dilolo matuku onso.

⁴Wakumanyisha munyinyi wa mubidi wanyi ne dikoba dianyi; wakutshibula mifuba yanyi.

⁵Wakungomekela ntatu, wakunnyungulula ne kanyinganyinga kakole.

⁶Wakunshikika mu miaba ya midima bu mudi bantu bakafua kale.

⁷Wakunnyungulula ne lumbu, nunku tshiena mua kuhatuka; wakunemesha bujitu bua hamʼbidi hanyi.

⁸Bulelela, banadila, hanakeba dikuatshisha, udi ukanda kulomba kuanyi.

⁹Yeye wakujika nshila yanyi ne mabue masonga, wakukuonyangasha nshila yanyi.

¹⁰Yeye udi bu nkashama kundi udi ungalamina, bu nyama wa ntambue ungalamina mu tshisuku.

¹¹Yeye wakunsesuisha mu nshila wanyi, wakumpanda bihese bihese; wakunshiya nkenga.

¹²Wakunana buta buandi, waku nteka kulu bu tshidikishilu tshia kuasa mukete.

¹³Wakasa mutshima wanyi mikete ya mu musaka wandi.

¹⁴Nakulua bu tshintu tshidibo baseka kudi bantu bonso, ne bu musambu udibo bimba matuku onso.

¹⁵Wakungusha tente ne nyongangandu, wakungukutshisha ne bululu.

¹⁶Wakutshibula menu anyi ne nsoka mikese; wakumbuikila ne butue bua kahia.

¹⁷Wakûmusha ditalala dia mu mutshima wanyi, wakuditeka kule; nakuhua diakalengele muoyo.

¹⁸Nunku nakuamba hanyi ne, Bukole buanyi buakujimina, ne ditekemena dianyi kudi Yehowa diakujimina.

¹⁹Uvuluke dikenga dianyi ne kanyinganyinga kanyi, bidi bu nyongangandu ne bintu bia bululu kundi.

²⁰Mutshima wanyi utshidi ubivuluka, udi unema bujitu munda muanyi.

²¹Ndi nvuluka muanda eu, nunku ntshidi ne ditekemena ne:

²²Malu makane a Yehowa kaena ashika tshiendelele, ne luse luandi kaluena luhanga;

²³bidi bihia-bihia ku dinda ku dinda, bujalami buebe budi butamba bunene!

²⁴Mutshima wanyi udi wamba ne, Yehowa udi buhianyi buanyi, nunku ndi ne ditekemena dianyi kudiye.

²⁵Yehowa udi ne luse kudi badi bamuindila, kudi muetu udi umukeba.

²⁶Bidi bimpe bua muntu atekemene ne indile biandi luhandu lua Yehowa talalâ.

²⁷Bidi bimpe bua muntu ambule biandi mutshi wa tshikokedi mu bunsongalume buandi.

²⁸Ashikame biandi nkayandi ahuwe talalâ, bualu bua bakûteka ha nshingu bandi.

²⁹Atue mishiku yandi mu buloba, bua bumue ditekemena nedikaleku.

³⁰Afile ditama diandi kudi udi umututa; ukutshishibue tente ne bihendu.

³¹Bualu bua Mukelenge kena wihata muntu tshiendelele.

³²Kadi hamukengesheye, neamufuile luse bu mudi divulangana dia dinanga diandi.

³³Bualu bua kena usanka bua kubakengesha, anyi bua kunyingalasha mitshima ya bukua bantu.

³⁴Bualu bua badiatabo bena lukanu bonso ha buloba munda mua makasa,

³⁵hasesukabo ku kulumbulula kuakane kua muntu ku mesu kua Mutambe Bunene wa mu diulu,

³⁶hanyangabo tshilumbu tshia muntu ne kulumbulula kubi, Mukelenge kena witabusha malu â.

³⁷Muntu kai udi mua kuela dî ne, Bualu buenjibue, bikata Mukelenge kayi muanze kuela dî diandi?

³⁸Makenga ne masanka kabiena bifuma kudi Mutambe Bunene wa mu Diulu, anyi?

³⁹Nunku bualu kai muntu utshidi ne muoyo udi utontolola hamukengeshabo bua malu mabi andi?

⁴⁰Tukebulule mu mitshima yetu, tumanye nshila itudi tuendela, tuhingane kudi Yehowa kabidi.

⁴¹Tubandishe mitshima yetu ne bianza diatshimue kudi Nzambi wa mu diulu.

⁴²Tuakushiha mikenji yebe ne tuakukutombokela; wewe kuakutubuikidila mibi yetu.

⁴³Wewe wakudibuikila ne tshiji, wakutuihata mu nshila, wakushiha bantu kuyi mubafile luse.

⁴⁴Wakudibuikila ne ditutu, nunku kakuena mutendelelu udi mua kufika kûdi.

⁴⁵Wakutuvuisha bu tshintu tshia hatuhu tshidibo bimasha munkatshi mua ba ba buloba.

⁴⁶Bena lukuna betu bonso bakubulula mukana muabo bua kutuhenda.

⁴⁷Buowa ne dijimba bidi ku mpala kuetu, diyoyo ne kubutuka kabidi.

⁴⁸Mesu anyi adi ahatula binsonshi bu misulu ya mai bualu bua kubutuka kua muana mukashi wa bana betu.

⁴⁹Mesu anyi adi uhuekesha binsonshi, bidi kabiyi bikama, kabiyi bikeha,

⁵⁰tô ne hatangila Yehowa wa mu diulu hanshi, hamoneye malu â.

⁵¹Mutshima wanyi udi unyingalala bua malu adi mesu anyi amone, bualu bua bana bakashi bonso ba mu musoko wanyi.

⁵²Bena lukuna banyi bakunkina hatuhu, kahayi ne tshilumbu tshia kumbanda nʼatshi, bakungihata bu mudibo bihata nyunyu.

⁵³Bakungela mu tshina bua kujimisha muoyo wanyi, bakuela mabue ha mutu banyi.

⁵⁴Mai akahita ha mutu banyi; nakamba ne, Ndi mujimine.

⁵⁵Yehowa, nakabikila dina diebe, hanakadi mu ndondo wa tshina atshi.

⁵⁶Wewe wakunvua dî dianyi ne, Kujibiki matshu ebe ku kuhumuna kuanyi, ku muedi wanyi mene.

⁵⁷Wewe wakasemena ha buihi nʼanyi mu dituku dinakukubikila; wakamba ne, Kutshinyi nansha.

⁵⁸Wewe, Mukelenge, wakungakuila ku bilumbu bia mu mutshima wanyi; wakuhikula muoyo wanyi.

⁵⁹Wewe, Mukelenge, wakumona malu mabi akungenzelabo; wewe ukose tshilumbu tshianyi.

⁶⁰Wewe wakumona disombuela diabo ne bifufu biabo bionso bidibo bangelela.

⁶¹Yehowa, wakumpua bihendu biabo ne bifufu biabo bionso bidibo bangelela,

⁶²mei adi ahatuka mukana mua bambanda ne kunjiana kuabo dituku dijima.

⁶³Tangila hashikamabo, hajukabo; meme ndi musambu udibo bimba.

⁶⁴Yehowa, wewe ne ubafute difutu bu mudi mudimu wa bianza biabo.

⁶⁵Neubahe mitshima mikole, mulau webe newikale hamʼbidi habo.

⁶⁶Yehowa, wewe ne ubihate ne tshiji, nembabutule bua kabikadi miunshi mua diulu.