Read tshiluba Yehezekele 1 Bible Online

Yehezekele 1 - tshiluba bible

Yehezekele 1

¹Mu tshidimu tshia makumi asatu, mu ngondo muinai, mu dituku ditanu dia ngondo, hanakadi munkatshi mua bahika ku muelelu wa musulu wa Kebâ, diulu diakabuluka, ne nakamona bikena kumona bia Nzambi.

²Mu dituku ditanu dia ngondo, mu tshidimu tshitanu tshia buhika bua Mukelenge Yehoyakina,

³dî dia Yehowa diakalua kudi Yehezekele muakuidi, muana wa Buzi, mu buloba bua Bena Kasada, ku muelelu wa musulu wa Kebâ; tshianza tshia Yehowa tshiakadi hamʼbidi handi ha muaba au.

⁴Nakamona, ekumona! Nkunde mukole wakahatuka ku luseke lua ku nôde ne ditutu dinene; kahia kakadi kakenyakenya ne dinkenke diakadi ku nseke yadi yonso; munkatshi muadi ne munkatshi mua kahia muakadi bu tshiamu tshiakadi tshikenka bikole.

⁵Munkatshi muadi muakahatuka tshinfuanyi tshia bifukibue binai bidi ne muoyo.[1] Tshinfuanyi tshiabi tshiakadi nunku: Biakadi ne tshifuanyikishi tshia muntu.

⁶Buonso buabi biakadi ne mpala inai ne mahuahua anai.

⁷Mikolo yabi yakadi milulame; munda mua makasa abi muakadi bu munda mua mukono wa lukungulu lua ngombe, akakenka bu tshiamu tshia mitaku tshinonoke.

⁸Muinshi mua mahuahua abi, ku nseke yabi inai, muakadi bianza bia muntu. Buonso buabi binai biakadi ne mpala yabi ne mahuahua abi nunku:

⁹mahuahua abi akadi matuangane, dihuahua dimue dituangane ne dihuahua dikuabo; mpala yabi kayakandamuka hakadibi biya, kadi tshifukibue ne tshifukibue tshiakaya ku mpala mu nshila mululame.

¹⁰Bua binfuanyi bia mpala yabi nakamona ne buonso buabi binai biakadi ne mpala wa muntu ne mpala wa nyama wa ntambue ku luseke lua tshianza tshia balume, ne mpala wa ngombe ne mpala wa nyunyu wa mukanku ku luseke lua tshianza tshia bakashi.

¹¹Mahuahua a buonso buabi binai akadi mabaluluke mulu, mahuahua abidi a tshinga tshifukibue akadi nuluangane ne a tshifukibue tshikuabo, ne mahuahua makuabo abidi akabuikila mubidi watshi.

¹²Buonso buabi biakaya ku mpala; kuonso kuakasua nyuma yabi kuya biakaya; kabiakandamuka hakadibi biya.

¹³Munkatshi mua bifukibue bidi ne muoyo muakamueneka bintu bu makala a kahia akadi atema, bifuanangane ne bimunyi bitambakane munkatshi mua bifukibua; kahia kakakenka bikole ne nuele ya nvula yakahatuka munkatshi mua kahia.

¹⁴Bifukibue bidi ne muoyo biakanyema ne biakalukila kabidi bu mudi muele wa nvula umueneka ku mesu hahenyau.

¹⁵Hanakadi ntangila bifukibue bidi ne muoyo, ekumona, hanshi ha buloba ne hehi ne tshifukibue ne, tshifukibue hakadi nkata wa dikalu.

¹⁶Mibidi ya nkata ya mukulu yakadi bu ya dibue dia chrysolithe; buonso buai inai yakadi ne tshinfuanyi tshimue, ne dilamakashibua mai diakadi dimueneka bu mudi nkata muela munda mua mukuabo.

¹⁷Hakayayi, yakaya mu nshila mitangile ku nseke yai inai, kayakatshunguluka hakayayi nansha.

¹⁸Nkata yakadi ne tukanu, ne hanakayimona, ekumona, nkata yonso inai yakadi ne mesu nseke yonso.

¹⁹Hakaya bifukibue bidi ne muoyo ku muaba mukuabo, nkata yakaya n abi diakamue; hakajuka bifukibue hanshi, nkata yakajuka nʼabi diakamue.

²⁰Kuonso kuakasua nyuma kuya, yakamulonda; bualu hua nyuma wa bifukibue bidi ne muoyo wakadi munda mua nkata kabidi.

²¹Hakaya bifukibue ebi, nkata yakaya, hakimana bifukibue ebi talalâ, nkata ai yakimana kabidi; hakajuka difukibue ebi hanshi, nkata yakajuka nʼabi diakamue; bualu bua nyuma wa bifukibue bidi ne muoyo wakadi munda mua nkata.

²²Ha mutu ha bifukibue bidi ne muoyo hakadi tshinfuanyi tshia diulu, tshiakadi tshikenka bu dibue dinene dia nvula, ne tshiakabaluluka ha mutu habi.

²³Muinshi mua diulu edi mahuahua abi akadi mabaluluke, mahuahua abidi a tshifukibue tshikuabo matuangane ne mahuahua abidi a tshifukibue tshikuabo, ne mahuahua makuabo abidi a tshifukibue ne tshifukibue akabuikila mubidi watshi.

²⁴Hakayabi, nakunvua tshiona tshia mahuahua abi bu tshiona tshia mai manene makole, bu tshiona tshia dî dia Mutambe Bunene wa mu Diulu, tshiona tshia tshintompantompa tshia misumba ya masalayi. Hakimanabi talalâ, biakabuikila mahuahua.

²⁵Dî diakadiku difume mu diulu diakadi ha mutu habi. Hakimanabi talalâ, biakabuikila mahuahua abi.

²⁶Ha mutu ha diulu diakadi ha mutu habi hakadi tshinfuanyi tshia nkuasa wa bukelenge, muikale ne mubidi wa dibue dia saphir; ne ha tshinfuanyi tshia nkuasa wa bukelenge hakadi tshinfuanyi tshia mundi mushikame mulu amu.

²⁷Nakatangila ku tshinfuanyi tshia tshifuka tshiandi tô ne ku mutu tshintu bu tshiamu tshikunze tshinonoke, bu tshinfuanyi tshia kahia kanyunguluke nseke yonso; ku tshinfuanyi tshia tshifuka tshiandi tô ne kuinshi nakatangila tshintu bu kahia kakadi kela nsase nseke yonso,

²⁸tshifuana muanzankongolo udi umueneka mu matutu mu dituku didi nvula uloka; ke muakadi tshinfuanyi tshia kukenka kukole kuakamunyunguluka. Etshi tshiakadi tshinfuanyi tshia butumbi bua Yehowa tshiakamueneka kundi. Hanakatshimona, nakatua mpala wanyi hanshi, nakunvua dî dia mukuabo wakadi wakula.