Read tshiluba Yehezekele 10 Bible Online

Yehezekele 10 - tshiluba bible

Yehezekele 10

¹Hashishe nakatangila, ekumona! Mu diulu diakadi ha mutu ha bakeluba muakamueneka tshinfuanyi tshia nkuasa wa bukelenge, muikale ne mubidi wa dibue dia saphir.

²Yehowa wakambila muntu wakadi muluate bivualu bia lin ne, Buela munkatshi mua nkata idi inyunguluka muinshi mua bakeluba, ûsha bianza biebe tente ne makala a kahia matema adi hankatshi ha bakeluba, wamuangalashe ha mutu ha musoko. Nunku yeye wakabuelamu ku mesu kuanyi.

³Hakabuela muntu eu, bakeluba bakadi bimana ku luseke lua nsubu lua ku tshianza tshia balume, ne ditutu diakusha tshiendelu tshia munda mua nsubu.

⁴Bualu bua butumbi bua Yehowa buakumuka ku mitu kua bakeluba, buakaya ku mbelu kua nsubu; nsubu wakula tente ne ditutu, ne tshiendelu tshiakula tente ne dinkenke dia butumbi bua Yehowa.

⁵Tshiona tshia mahuahua a bakeluba tshiakunvuibua tô ne ku tshiendelu tshia ha mbelu ha nsubu, tshikale tshikole bu dî dia Nzambi Mutambe Bukole hakuleye.

⁶Hakambileye muntu wakadi muluate tshivualu tshia lin ne, Angata kahia kakuabo ka munkatshi mua nkata idi inyunguluka, ku muaba wa hankatshi ha bakeluba, muntu eu wakabuelamu, wakimana hehi ne nkata mukuabo.

⁷Mukeluba mukuabo wakolola tshianza tshiandi ku kahia kakadi hankatshi ha bakeluba bakuabo, wakangata dikala diaku, wakaditeka mu bianza bia muntu wakadi muluate tshivualu tshia lin, ne yeye wakadiangata, wakaluhuka nʼadi.

⁸Munkatshi mua bakeluba muakamueneka tshinfuanyi tshia tshianza tshia muntu muinshi mua mahuahua abo.

⁹Nakatangila kabidi, ekumona! Nkata inai yakadiku hehi ne bakeluba, nkata umue hehi ne mukeluba umue, nkata mukuabo hehi ne mukeluba mukuabo; nkata yakadi ne mubidi bu wa dibue dia chrysolithe.

¹⁰Nkata yonso inai yakadi ne tshinfuanyi tshimue, bu mudi nkata umue muikale munda mua mukuabo.

¹¹Hakayayi, yakaya mu nshila yonso kuakatangila nseke yai inai, kayakatshunguluka hakayayi, hualu bua yakayila mu nshila kuakatangishayi mpala yai; kayakanyunguluka hakayayi.

¹²Mibidi mijima ya bakeluba banai, nyima yabo, bianza biabo, ne mahuahua abo ne nkata kabidi muomumue, biakadi biule tente ne mesu ku nseke yonso.

¹³Nakunvua babikila nkata ai ne, Nkata idi inyunguluka bu nvunde.

¹⁴Mukeluba yonso wakadi ne mpala inai: mpala wa kumudilu wakadi mpala wa mukeluba mene, muibidi wakadi wa muntu, muisatu wakadi wa nyama wa ntambue ne muinai wakadi wa nyunyu wa mukanku.

¹⁵Bakeluba bakabanda mulu. Bakadi bifukibue bidi ne muoyo binakamona ku muelelu wa musulu wa Kebâ.

¹⁶Hakaya bakeluba, nkata yakaya nʼabo diatshimue; ne hakolola bakeluba mahuahua abo bua kubuka ha buloba, nkata kayakumuka ku miaba yai ya hehi nʼabo.

¹⁷Hakimanabo, nkata ai yakimana kabidi; hakabandabo mulu, nkata ai yakabanda nʼabo; bualu bua nyuma wa bifukibue wakadi munda muai.

¹⁸Butumbi bua Yehowa buakumuka ku mbelu kua nsubu, buakimana ha mitu ha bakeluba.

¹⁹Bakeluba bakolola mahuahua abo, bakabuka ha buloba, bakabanda mulu ku mesu kuanyi, ne nkata yakashala hehi nʼabo hakayabo nunku. Bakimana ku tshibi tshia nsubu wa Yehowa tshia ku luseke lua esete; butumbi bua Nzambi wa Isalele buakadi ba mitu habo.

²⁰Ebi biakadi bifukihue bidi ne muoyo binakamona muinshi mua Nzambi wa Isalele ku muelelu wa musulu wa Kebâ; nakamanya ne badi bakeluba.

²¹Mukeluba yonso wakadi ne mpala inai ne mahuahua anai; ne muinshi mua mahuahua abo muakadi tshinfuanyi tshia bianza bia muntu.

²²Eu mmuanda wa binfuanyi bia mpala yabo: biakadi mpala inakamona ku muelelu wa musulu wa Kebâ; buonso buabo bakaya ku mpala mu nshila mululame.