Read tshiluba Yehezekele 25 Bible Online

Yehezekele 25 - tshiluba bible

Yehezekele 25

¹Dî dia Yehowa diakalua kundi ne,

²Muana wa muntu, tangisha mpala webe kudi Bena Amona, ubadiule.

³Ambila Bena Amona ne, Unvuai dî dia Mukelenge Yehowa. Mukelenge Yehowa utu wamba ne, Bualu bua nuakela tshibingu ne, O! kudi nsubu wanyi wa tshijila hakamunyangabo, ne ku buloba bua Isalele hakabubutulabo, ne kudi Bena Yuda hakayabo mu buhika;

⁴bua malu â nennufile mu bianza bia bantu ba ku luseke lua esete bu bintu biabo, ne bobo nebashimike ntenta yabo munkatshi muenu, nebashikame munkatshi muenu; nebadie mamuma enu, nebanue mabele enu.

⁵Nenvuishe Laba bu tshikumbi tshia tumelo, ne misoko ya Bena Amona bu mpangu ya mikoko; hashishe nenumanye ne, Meme ndi Yehowa.

⁶Bualu bua Mukelenge Yehowa udi wamba ne, Bualu bua nuakututa bikashi, nuakutua mikumu hanshi ne nuakusanka ne lukuna luonso lua mu mitshima yenu bua malu akukuata buloba bua Isalele,

⁷nunku, tangilai, uakuolola tshianza tshianyi hamʼbidi henu, nennufile kudi ba mu bisamba bia bantu bu tshintu tshidibo banyenga; nennûmushe munkatshi mua bantu bakuabo, nennujimishe munkatshi mua maloba makuabo; nennushihe; nenumanye ne, Meme ndi Yehowa.

⁸Mukelenge Yehowa udi wamba ne, Bualu bua ba mu Moaba ne ba mu Seî badi bamba ne, Monai, ba mu tshisamba tshia Bena Yuda bakulua bu bisamba bikuabo bionso,

⁹nunku nengunzulule luseke lua Moaba, lua ku misoko idi ku matshika a buloba tô ne ku Bete-yishimota, Bâla-meona ne Kîyata-yalima, butumbi bua buloba ebu.

¹⁰Nenfile Bena Moaba ne Bena Amona kabidi kudi ba ku luseke lua esete bu bintu biabo, bua kababavuluki munkatshi mua bisamba bia bantu.

¹¹Nendumbuluishe Bena Moaba; nebamanye ne, Meme ndi Yehowa.

¹²Mukelenge Yehowa udi wamba ne, Bualu bua ba mu Edome bakenzela ba mu tshisamba tshia Bena Yuda bibi hakadisombuelabo kudibo, ne bakadivuishila dihila ditambe bukole hakadisombuelabo,

¹³nunku Mukelenge Yehowa udi wamba ne, Nengolole tshianza tshianyi kudi Bena Edome, nengumushemu bantu ne nyama, nenvuishe buloba ebu tshikulu; ku Temana tô ne ku Dedana nebafue ku muele wa nvita.

¹⁴Nendisombuele kudi Bena Edome ku tshianza tshia bantu banyi Bena Isalele, ne bobo nebenzele Bena Edome bu mudi tshiji tshianyi ne bu mudi tshiji tshianyi tshikole; Mukelenge Yehowa udi wamba ne, Nebamanye kudisombuela kuanyi.

¹⁵Mukelenge Yehowa udi wamba ne, Bualu bua Bena Peleshete bakenzela Bena Isalele bibi hakadisombuelabo kudibo, hakadisombuela ne lukuna mu mitshima yabo bua kubabutula ne lukuna ludi kaluyi lushika;

¹⁶nunku Mukelenge Yehowa udi wamba ne, Nengolole tshianza tshianyi kudi Bena Peleshete; nembutule Bena Kelete; nenshihe difuka dia bantu badi bashala ku muelelu wa mai manene.

¹⁷Nendisombuele kudibo ne kusombuela kukole, nembabele ne tshiji tshianyi tshikole; nebamanye ne, Meme ndi Yehowa hanashikisha kudisombuela kudibo.