Read tshiluba Yehezekele 36 Bible Online

Yehezekele 36 - tshiluba bible

Yehezekele 36

¹Wewe kabidi, muana wa muntu, ambila mikuna ya mu Isalele dî dia baprofete, uyambile ne. Nuenu mikuna ya mu Isalele, unvuai dî dia Yehowa!

²Mukelenge Yehowa udi wamba ne, bualu bua badi nʼenu lukuna bakunuseka ne, Aka! Mikuna yaya ya kale yakulua buhianyi buetu;

³nunku uyambile ne, Mukelenge Yehowa udi Wamba ne, Bualu bua bakunubutula, bakununyanga ku nseke yonso, bua nuenu nuikale buhianyi bua bisamba bikuabo bia bantu, ne bualu bua bakutela mena enu kudi bena musoko, ne bakunsonguela munkatshi mua bantu;

⁴bua malu â, nuenu mikuna ya mu Isalele, unvuai dî dia Mukelenge Yehowa! Mukelenge Yehowa udi wamhila mikuna mile ne mikuna mikese, bihongo ne bibanda, miaba yakubutuka ne misoko yakushala bikulu, biakulua bu tshintu tshia kunyengabo ne kusekabo kudi bisamba bikuabo bidi binunyunguluka.

⁵Nunku Mukelenge Yehowa udi wamba ne, Bulelela, nakuamba dî mu kahia ka mukau wanyi bua kuhisha nʼadi ba mu bisamba bikuabo bia bantu, ne bua kuhisha nʼadi ba mu buloba buonso bua Edome, badi badisunguila buloba buanyi bu buhianyi buabo, benza nunku ne disanka dinene ne mitshima ya lukuna, bua kubukuata bu tshintu tshidibo banyenga.

⁶Bua malu â, amba biebe mei ebe bualu bua buloba bua Isalele, ambila mikuna minene ne mikuna mikese, bihongo ne bibanda ne, Mukelenge Yehowa udi wamba ne, Monai, nakuamba dî mu mukau wanyi ne mu tshiji tshianyi tshikole, bualu bua nuakufuishibua bundu kudi ba mu bisamba bia bantu.

⁷Nunku Mukelenge Yehowa udi wamba ne, Nakubisha tshianza tshianyi bua kuditshiha ne, Ba mu bisamba bidi binunyunguluka nebadituadile bundu buabo.

⁸Kadi nuenu, mikuna ya mu Isalele, nenuele ntonga yenu, nenukuamine bantu banyi Bena Isalele mamuma enu, bualu bua bobo nebalueku tshituha tshihi.

⁹Tangilai bienu, ndi ku luseke luenu, nempingane kunudi, ne nebadime buloba buenu, nebakunemu maminu.

¹⁰Nennuvudishe ba bungi, nuenu bonso ba mu tshisamba tshia Bena Isalele; misoko neyikale ne bantu, nebibake mu miaba yakadi mibutuke.

¹¹Nenvudishe bantu ne bimuna bia bungi; nebivulangane, nebilele bana ba bungi; nenjadike ba bungi munkatshi muenu bu muakadi bualu buenu diambedi, nennuenzele bienzedi bimpe bihite bia mu matuku enu a ku tshibangidilu; nunku nenumanye ne, Meme ndi Yehowa.

¹²Nengendeshe bantu ha mutu heńu kabidi, bantu banyi Bena Isalele mene; nebanuangate bu bintu biabo, nenuikale buhianyi buabo ne kanuena nubashiya kabayi ne bana kabidi.

¹³Mukelenge Yehowa udi wamba ne, Bualu bua bantu badi bakuambila ne, Wewe buloba bua Isalele udi mudi wa bantu, udi unyenga bana baledibue kudi bantu bebe kabidi,

¹⁴nunku kuena udia kabidi bantu, kuena unyenga kabidi bana baledibue kudibo. Mukelenge Yehowa udi wamba dî edi.

¹⁵Mukelenge Yehowa udi wamba ne, Tshiena ngitabusha bua wewe kunvua kabidi mei a bihendu adi ba mu bisamba bia bantu bamba bua bualu buebe, ne kuena wikala ne bualu bua kuitabusha bihendu bia bantu ba bende kabidi, ne kuena ulenduisha ba mu tshisamba tshiebe kabidi.

¹⁶Dî dia Yehowa diakalua kundi kabidi ne,

¹⁷Muana wa muntu, hakadi Bena Isalele bashikama mu buloba buabo, bakabunyanga ne bilele biabo ne bienzedi biabo. Bilele biabo biakadi ku mpala kuanyi bu bukoya bua mukashi utshidi ku katshetshi.

¹⁸Bua malu â nakabahongoluela tshiji tshianyi tshikole bualu bua mashi akadibo bamatshisha ha buloba ne bualu bua bakabunyanga ne mpingu yabo.

¹⁹Nakabamuangalasha munkatshi mua bisamba bia bantu, ne bakatangadishibua munkatshi mua maloba makuabo; nakabalumbuluisha bu muakadi bilele biabo bibi ne bienzedi biabo.

²⁰Hakafikabo munkatshi mua bisamba abi kuakayabo, bakanyanga dina dianyi dia tshijila; bualu bua bantu bakuabo bakamba bua bualu buabo ne, Aba mbantu ba Yehowa, bakaluhuka mu buloba buandi.

²¹Kadi nakasua bantu bonso banemeke dina dianyi dia tshijila, diakadi Bena Isalele banyanga munkatshi mua bisamba bia bantu kuakayabo.

²²Nunku ambila Bena Isalele ne, Yehowa udi wamba ne, Tshiena ngenza malu â bua bualu buenu, nuenu Bena Isalele, kadi ndi ngenza bualu bua dina dianyi dia tshijila dinuakanyanga munkatshi mua bisamba abi munuakaya.

²³Mukelenge Yehowa udi wamba ne, Nenjidile dina dianyi dinene diakanyangabo munkatshi mua bisamba bia bantu, dinuakanyanga bienu mene munkatshi muabo; ne ba mu bisamba abi nebamanye ne, Meme ndi Yehowa, hanadimuenesha bu Wa Tshijila ku mpala kuabo ku bienzedi bindi nnuenzela.

²⁴Bua nennuhatule munkatshi mua bisamba bia bantu, nennusangishe bua kunûmusha munkatshi mua maloba makuabo, nendue nʼenu mu buloba buenu mene.

²⁵Nennumiamine mai matoke tô, nenuikale bakane; nennulengeshe ku bukoya buenu buonso ne ku mpingu yenu yonso.

²⁶Nennuhe mutshima muhia-muhia kabidi, nenteke nyuma muhia-muhia munda muenu; nengumushe mutshima udi bu dibue munda muenu, nennuhe mutshima wa buntu.

²⁷Nenteke Nyuma wanyi munda muenu, nennuendeshe mu mikenji yanyi mifunda, nenutumikile mikenji yanyi, nengenze.

²⁸Nenushikame mu buloba bunakaha batatu benu; nenuikale bantu banyi, meme nengikale Nzambi wenu.

²⁹Neanuhandishe ku malu enu onso a bukoya. Nembikile maminu enu bua kuluau, nengakumbashe, ne tshiena ntuma tshiole tshikuabo munkatshi muenu.

³⁰Nenkumbashe mamuma ku mitshi ne bia kudia mu madimi, bua kabanuhendi kabidi kudi ba munkatshi mua bisamba bia bantu bualu bua tshiole.

³¹Hashishe nenumuke bilele Dienu bibi, ne bienzedi bienu biakadi kabiyi biakane; malu enu mabi ne a bundu neanutonde mene.

³²Mukelenge Yehowa udi wamba ne, Numanye muanda eu ne, Tshiena ngenza malu â bua bualu buenu, nukuatshike bundu, nudihuekeshe bua bienzedi bienu, nuenu Bena Isalele.

³³Mukelenge Yehowa udi wamba ne, Mu dituku dindi nnulengesha ku malu mabi enu onso, nenjadike bantu mu misoko yenu, nebibake kabidi miaba yakadi bikulu.

³⁴Nebadime buloba buakadi bubutula diambedi, kabuena bushala bubutula ku mesu kua bonso badi bahitshilaku.

³⁵Bantu nebambe ne, Buloba ebu buakadi bubutula diambedi buakulua bu budimi bua Edene; misoko yakadi minyanguke ne mibutula ne yakadi bikulu yakalua misoko ya ngumbu idi ne bantu bashikamemu.

³⁶Hashishe ba mu bisamba bidibo bashiye binunyunguluka nebamanye ne, Meme Yehowa nakuibaka misoko yakadi bikulu, nakujadika kabidi miaha yakadi mibutuke. Meme Yehowa nakuamba di edi, ne meme nendienze.

³⁷Mukelenge Yehowa udi wamba ne, Nengitabushe kabidi bua Bena Isalele bandombe bua mbenzele muanda eu wa kubakumbashila bantu bua bikale ba bungi bu tshisumbu tshia mikoko,

³⁸bu tshisumbu tshia mikoko yakajidilabo bu milambu ya kufila kudi Yehowa, bu tshisumbu tshia mikoko ya mu Yelushalema mu bikondo bia bidia biabo bia disanka, nunku misoko yakadi bikulu diambedi neyule tente ne bisumbu bia bantu; nunku nebamanye ne, Meme ndi Yehowa.