Read tshiluba Yehezekele 38 Bible Online

Yehezekele 38 - tshiluba bible

Yehezekele 38

¹Dî dia Yehowa diakalua kundi ne,

²Muana wa muntu, tangisha mpala webe kudi Gogo wa buloba bua Magoga, mukokeshi wa mu Losha,[13] Mesheke ne Tubala, umudiule ne mei ebe a buprofete.

³Amba biebe ne, Mukelenge Yehowa udi wamba ne, Ndi nʼebe tshilumbu, wewe Gogo, mukokeshi wa Losha, Mesheke ne Tubala.

⁴Nenkuimanyike, nenteke ndobo mu mbanga yebe; nenkutume ku nvita ne masalayi ebe onso, tubalu tuebe ne bena tubalu bebe, buonso buabo baluatshishe bivualu bia biamu, tshisumbu tshinene tshia masalayi mambule ngabu wa ha tshiadi ne ngabu wa ku diboko, ne buonso buabo bakuate miele ya nvita mu bianza: biabo.

⁵Ba mu Pelasa, Kusha ne Puta nebikaleku, buonso buabo bikale ne ngabu ne bifulu bia tshiamu,

⁶ne ba mu Gomê ne bisumbu biandi bionso bia bantu; Bena Togâma ne bisumbu biabo bionso, bafume ku miaba ya kunfudilu kua luseke lua ku nôde; bantu ba bungi nebikale nʼebe.

⁷Longolola bintu biebe bionso, imana ne malu onso malongolola, wewe wikaleku ne bisumbu biebe bionso bia masalayi biakudisangisha nʼebe, ushaleku bua kuenza mundi nkuambila.

⁸Hahita matuku a bungi, nebakubikile bua kuluangana; kunshikidilu kua bidimu ubange kuya bua kuluisha bena buloba bakuhanduka ku kubutuka kua muele wa nvita, tshisamba tshia bantu badibo bahatula munkatshi mua bisamba bia bungi bia bantu; bakabasangisha ha mikuna ya mu Isalele yakadi mibutuke ne dibutuka dia tshiendelele diambedi, kadi idi ne bantu bashikamehu mpindiu bakuhatulabo munkatshi mua bisamba bia bungi bia bantu, buonso buabo bashikamehu kabayi ne bualu budi bubahumbisha.

⁹Wewe bandaku, lua bu tshihuhu tshinene, ikala bu ditutu didi dibuikila buloba, wewe ne bisumbu biebe Ma masalayi, ne bantu ba bungi badi nʼenu.

¹⁰Mukelenge Yehowa udi wamba ne, Mu dituku adi meji neabuele mu mutshima webe, ne wewe neuhangidishe kuenza bualu bubi.

¹¹Newambe ne, Nembandeku bua kuluisha ba mu misoko idi mu mpata; nenye kuluangana ne bantu aba badi bashikame talalâ, kabayi ne bualu budi bubahumbisha, buonso buabo badi bashikameku kabayi ne ngumbu, anyi nkanu ne bibi.

¹²Neuhangidishe bua kuhaula ne kunyenga bintu biabo ku bukole, bua kuhingasha tshianza tshiebe kabidi ku bihela bidi ne bantu bashikamemu mpindiu bua kubinyanga, bua kuluishamu bantu aba bakahatulabo munkatshi mua bisamba bia bantu, bakamana kuangata bimuna ne luhetu, badi bashikame munkatshi mua buloba.

¹³Sheba ne Dedana ne bangendʼa mushinga ba ku Tâshishi ne bana babo banene nebakuele dikonka ne, Wakulua biebe bua kuhaula bantu aba, anyi? Wakusangisha bisumbu biebe bia masalayi bua kunyenga bintu biabo, ne bua kuya ne biamu bia argent ne bia or ne bimuna ne luhetu ne bintu biwakunyenga, anyi?

¹⁴Bua malu â, muana wa muntu, amba mei ebe a buprofete, ambila Gogo ne, Mukelenge Yehowa udi wamba ne, Mu dituku didi bantu banyi Bena Isalele bashikameku kabayi ne bualu budi bubahumbisha, wewe kuena mumanye muanda eu, anyi?

¹⁵Wewe neufume ku muaba webe wa kunfudilu kua nôde, wewe ne bantu ba bungi, buonso buabo babande ha nyima ha tubalu, tshisumbu tshinene tshia bantu ne tshisumbu tshinene tshia masalayi.

¹⁶Neulue kuluisha bantu banyi Bena Isalele, bu ditutu didi dibuikila buloba. Mu matuku a kunshikidilu, nenkutume bua kuluangana ne ba mu buloba buanyi, bua ba mu bisamba bia bantu bammanye meme, hanamuenesha tshijila tshianyi ku mesu kuabo ku bienzedi bindi nkuenzela wewe, Gogo.

¹⁷Mukelenge Yehowa udi wamba ne, Wewe kuena muntu unakambila bantu malu ebe mu matuku a kale, bantu banyi baprofete ba Bena Isalele, bakadi bamba mei abo mu matuku au tô ne ku bidimu bia bungi, babalesha mundualua nʼebe bua wewe kubaluisha, anyi?

¹⁸Mukelenge Yehowa udi wamba ne, Mu dituku adi dialua Gogo kuluangana ne ba mu buloba bua Isalele, tshiji tshianyi tshikole netshinunke tô ne mu diulu dianyi.

¹⁹Mu mukau wanyi ne mu kahia ka tshiji tshianyi tshikole nakamba ne, Mu dituku adi kuzakala kunene nekuikale mu buloba bua Isalele;

²⁰ne bua muanda eu mishiha ya mu mai manene ne nyunyu ya mulu ne nyama ya mu mpata ne bintu bionso bidi bidikoka hanshi ne bantu bonso badi ha buloba nebizakale ku mpala kuanyi, ne mikuna yonso neyuhuke, ne bibungubungu nebibumbuke, ne ngumbu yonso neyishimbuke.

²¹Mukelenge Yehowa udi wamba ne, Nembikile muele wa nvita bua kuluangana nʼandi ha mikuna yanyi yonso; muele wa muntu yonso neukebe kutaha muanʼabo ne muntu.

²²Nemmulumbuluishe ne bihuhu ne mashi, nemmulokeshile ne bisumbu biandi bia masalayi ne bantu badi nʼandi nvula udi uhuka bikole, ne mabue manene a nvula, kahia ne soufre.

²³Nemmueneshe bunene buanyi ne tshijila tshianyi, nendimanyishe ku mesu kua bisamba bia bungi bia bantu. Nunku nebamanye ne, Meme ndi Yehowa.