Read tshiluba Yehezekele 45 Bible Online

Yehezekele 45 - tshiluba bible

Yehezekele 45

¹Hanuatahuluila bantu buloba ebu bua kubaha mahianyi abo, nudianjile kufila tshituha tshiabu kudi Yehowa bu tshintu tshiandi tshia tshijila; bule buatshi buikale coudées binunu makumi abidi ne bitanu, butshiama buatshi buikale coudées binunu makumi abidi; tshikale buloba bua tshijila ku nseke yatshi yonso.

²Tshinga tshituha tshia buloba ebu bua tshijila tshikale luhangu lua kuasamu ntempelo, bule bualu coudées nkama itanu ne butshiama bualu coudées nkama itanu, nseke yalu ikale muomumue; bashiye muaba mutuhu numunyunguluke, coudées makumi atanu ku nseke yau yonso.

³Idikisha tshituha tshikuabo tshia buloba ebu bua tshijila, bule buatshi coudées binunu makumi abidi ne bitanu, butshiama buatshi coudées binunu dikumi, bu muaba wa tshitendelelu, buloba buhite tshijila.

⁴Netshikale luseke lua tshijila lua buloba; netshikale buloba bua bakuidi badi bakuata mudimu mu tshitendelelu ne badi basemena hehi ne Yehowa bua kumukuatshila mudimu; netshikale muaba wa kuashila bakuidi nsubu ne muaba wa tshijila wa tshitendelelu.

⁵Luseke lukuabo, bule bualu coudées binunu makumi abidi ne bitanu, butshiama bualu coudées binunu dikumi, neluikale buloba bua Bena Lewi badi bakuata mudimu mu ntempelo; neluikale buloba buabo bua misoko ya kushikamamu.

⁶Nusungule buloba budi butuangane ne buloba abu bua tshijila, buikale ne butshiama bua coudées binunu bitanu ne bule bua coudées binunu makumi abidi ne bitanu, ne buobu nebuikale buloba bua bonso ba mu tshisamba tshia Bena Isalele.

⁷Mukokeshi ikale ne buloba bua ku nseke yonso ibidi ya buloba bua tshijila ne ya buloba bua musoko. Buloba buandi butangilangane ne buloba bua tshijila ne buloba bua musoko ku luseke lua esete ne ku luseke lua wesete; bule buabu buikale bule bua tshituha tshia buhianyi bukuabo bua bisamba bia Bena Isalele, ku butshika bua buloba ku luseke lua wesete tô ne ku butshika buabu ku luseke lua esete.

⁸Buloba ebu buikale buhianyi buandi mu buloba bua Isalele. Bakokeshi banyi kabakengeshi kabidi bantu banyi, kadi batabuluile Bena Isalele buloba bu mudi bunene bua bisamba biabo.

⁹Mukelenge Yehowa udi wamba ne, Nuenu, bakokeshi ba Bena Isalele, nuitabushe bua malu makole anuakenza ne ashike! Lekelai kuenza malu makole ne kunyenga bintu ku bukole; kosai bilumbu ne kulumbulula kuakane ne londai malu makane; lekelai kuihata bantu banyi mu nsubu yabo.

¹⁰Nuikale ne biamu bidi bidikisha bintu ne tshidikishilu tshiakane, tshihiminu tshia épha[23] tshiakane, ne tshihiminu tshia bintu bienguluke[24] tshiakane.

¹¹Tshihiminu tshia épha ne tshihiminu tshia bintu bienguluke bikale ne tshihiminu tshimue, bua tshihiminu tshia épha tshikale tshituha tshia dikumi tshia homer[25]; nunku tshihiminu tshia homer tshikale luidi lua kuidikisha nʼalu.

¹²Nshekele[26] umue ikale guéra[27] makumi abidi (nshekele itanu ikale nshekele itanu mene mene, nshekele dikumi ikale nshekele dikumi mene mene), ne nshekele makumi atanu ikale mine[28] umue.

¹³Mukelenge Yehowa udi wamba ne, Ei idi milambu mudi ne bua kufila: tshituha tshisambombo tshia êpha umue tshiumushibue ku homer umue wa blé; tshituha tshisambombo tshia épha umue tshiumushibue ku homer umue wa orge;

¹⁴difuka dia manyi bu tshituha tshia dikumi tshia tshihiminu tshimue tshiumushibue ku kor,[29] bihiminu ebi dikumi bidi mu kor;

¹⁵mukoko umue munkatshi mua tshisumbu tshia mikoko nkama ibidi. Bena meku ba Bena Isalele bafile milambu ei bu mulambu wa bia kudia, mulambu wa kuosha, ne bu mulambu wa kuvuisha nʼau ditalala, bua kubuikila nʼai mibi yabo.

¹⁶Bantu bonso ba mu buloba bafile milambu ei kudi mukokeshi wa Bena Isalele.

¹⁷Mukokeshi neikale ne bualu bua kufila milambu ya kuosha, milambu ya bia kudia ne milambu ya bia kunua, halua bikondo bia bidia bia disanka, bia ngondo mihia-mihia, matuku onso a Lumingu, ne matuku onso a bidia bia disanka akusunguilabo Bena Isalele. Yeye afile mulambu wa kubuikila nʼau bubi, mulambu wa bia kudia, mulambu wa kuosha, ne milambu ya kuvuisha nʼai ditalala, bua kujimishila nʼai Bena Isalele mibi yabo.

¹⁸Mukelenge Yehowa udi wamba ne, Mu ngondo wa kumudilu, mu dituku dia kumudilu dia ngondo, angata muana wa ngombe udi kayi ne tshilema, lengesha nʼandi tshitendelelu tshia ntempelo.

¹⁹Muakuidi angate tshituha tshia mashi a mulambu wa kujimisha nʼau bubi, âlabe ha makunshi a ntempelo ne ba matumba anai a tshioshelu ne mihimbu mitshinyunguluke, ne ha makunshi a ku tshibuelelu tshia ku tshiendelu tshia munda.

²⁰Mu dituku dia muanda mutekete dia ngondo, enza muomumue bua bubi bua muntu wakuenza bibi bualu bua dituhakana diandi, anyi bua dihanga diandi dia lungenyi; nunku nulengeshe ntempelo.

²¹Mu ngondo wa kumudilu, dituku dia dikumi ne dinai dia ngondo, nuikale ne disanka dia kuhita kua Yehowa; tô ne hahita matuku muanda mutekete nudie bidia bidi kabiyi biela luevene.

²²Mu dituku adi mukokeshi alongolole bua bualu buandi ne bua bantu bonso ba mu buloba mulumʼa ngombe bu mulambu wa kujimisha nʼau bubi.

²³Mu matuku au muanda mutekete a disanka edi dia bidia bidi kabiyi biela luevene yeye alongolole mulambu wa kuoshela Yehowa, balume ba ngombe muanda mutekete badi kabayi ne tshilema ne bimpanga muanda mutekete bidi kabiyi ne tshilema, bua kuhifileye buatshia-buatshia tô matuku muanda mutekete; afile mpumbu wa mbushi buatshia-buatshia bu mulambu wa kujimisha nʼau bubi.

²⁴Alongolole mulambu wa bia kudia, tshihiminu tshia épha ku ngombe umue, ne tshihiminu tshia épha[30] ku tshimpanga, ne tshihiminu tshia hin[31] wa manyi ku épha ne ku épha.

²⁵Mu ngondo wa muanda mutekete, mu dituku dia dikumi ne ditanu dia ngondo, ne mu matuku muanda mutekete a kudia bidia bia disanka edi, afile milambu yoyimue ne ya diambedi, bu mulambu wa kubuikila nʼau mibi, mulambu wa kuoshela Yehowa, mulambu wa bia kudia ne mulambu wa manyi.