Read tshiluba Yehezekele 5 Bible Online

Yehezekele 5 - tshiluba bible

Yehezekele 5

¹Wewe kabidi, muana wa muntu, angata muele wa nvita mutue bu nteula bua kuenza nʼau mudimu wa kubeya, ne beya nʼau nsuki ya ku mutu ne ya ku muedi; hashishe, angata tshiamu tshia kuidikisha nʼatshi bujitu, ne idikisha nʼatshi nsuki.

²Osha tshituha tshisatu tshia nsuki mu kahia munkatshi mua musoko hashika matuku a kutshintshimika kuau; angata tshituha tshikuabo tshisatu, utshitahe ne muele wa nvita hautshidi wendakana mu nseke yonso ya musoko; hehula tshituha tshikuabo tshisatu mu luhehele, ne nempatule muele wa nvita bua kubihata.

³Angata nsuki mikese munkatshi muai, wikute mu mibangu ya tshivualu tshiebe.

⁴Angata mikuabo ya munkatshi mua nsuki ei kabidi, uyele mu kahia ne uyoshe; kahia nekahatukemu tô ne kudi bonso ba mu tshisamba tshia Bena Isalele.

⁵Mukelenge Yehowa udi Wamba ne, Eu nYelushalema mene. Nakateka musoko eu munkatshi mua binga bisamba ne maloba makuabo munyunguluke.

⁶Kadi bena musoko eu bakutombokela mikenji yanyi mu kuenza kua malu mahite a bisamba bikuabo ne a ba mu maloba adi abanyunguluka bubi; bualu bua bakuhidia mikenji yanyi, kabakuenda mikenji inakabafundila.

⁷Nunku Mukelenge Yehowa udi wamba ne, Bualu bua nuenu nuakutamba ba mu bisamba bidi binunyunguluka kutomboka, kanuakulonda mikenji yanyi, kanuakutumikila mei anyi, kadi nuakulonda mikenji mene ya bisamba bidi binunyunguluka,

⁸bua muanda eu Mukelenge Yehowa udi wamba ne, Monai, meme ndi nnubela, meme hanyi, ne nennulumbuluishe ku mpala kua bisamba bikuabo.

⁹Bua malu enu onso manyanguke nengenze malu munkatshi muenu andi tshiyi muanze kuenza diambedi, malu a mushindu undi tshiyi ngenza kabidi.

¹⁰Nunku batatu nebadie bana babo munkatshi muenu ne bana nebadie batatu babo; nennulumbuluishe, nennumuangalashe buonso buenu badi bashala ne muoyo ku mpehele yonso.

¹¹Yehowa udi wamba ne, Bu mundi meme ne muoyo, bualu bua nuakunyanga tshitendelelu tshianyi ne mpingu yenu yonso idi intonda ne malu enu onso adi atshinyanga, nennuhoneshe hahshi; disu dianyi kadiena dinumona ne dinanga ne tshiena nnulesha luse.

¹²Tshituha tshisatu tshia bana benu netshifue ne tshihuhu, anyi netshifue ne tshiole tshidi munkatshi muenu; tshituha tshikuabo tshisatu netshihone ku muele wa nvita ku nseke yenu yonso; nemmuangalashe tshituha tshikuabo tshisatu ku mpehele yonso, nempatule muele wa nvita bua kubihata.

¹³Bua nunku tshiji tshianyi netshishike, tshiji tshianyi tshikole netshikale kudibo, hashishe netshibole, nensambibue. Nebamanye ne meme Yehowa nakuamba dî bua mukau wanyi, hanahumuna tshiji tshianyi hamʼbidi habo.

¹⁴Bualu bukuabo, nenvuishe musoko eu tshikulu munkatshi mua bisamba bikuabo bidi biunyunguluka, bu tshintu tshidibo bahenda kudi bonso badi bahita mu nshila.

¹⁵Newikale tshintu tshidibo bahenda ne tshidibo bahetula, tshidi tshibadimusha ne tshidi tshihatuisha mikemu, kudi bisamba bidi biunyunguluka, hananulumbuluisha mu difikʼa munda dianyi ne mu tshiji tshianyi tshikole, ne mu dikengesha didi dihita hukole; meme Yehowa nguakuamba nunku.

¹⁶Nennuele mikete mihi ya tshiole, ya dibutula mene, indi ntuma bua kunubutula. Nenkoleshe tshiole munkatshi muenu, nentshibule tshinudi nueyemena bua kuangata bia kudia.

¹⁷Nennutumine tshiole ne nyama ya luonji, nebinyenge bana benu kunudi; tshihuhu ne mashi nebihitshile munkatshi muenu; nenvuishe muele wa nvita hamʼbidi henu. Meme Yehowa nakuamba dî edi.