Read tshiluba Danyele 1 Bible Online

Danyele 1 - tshiluba bible

Danyele 1

¹Mu tshidimu tshisatu tshia bukokeshi bua Yehoyakima, mukelenge wa Yuda, Nebukadenesâ, mukelenge wa Babulona, wakafika ku Yelushalema, wakautshintshimika.

²Mukelenge Yehowa wakafila Yehoyakima, mukelenge wa Yuda, mu bianza biandi, ne tshituha tshia malonga ne mpanza bia mu nsubu wa Nzambi; yeye wakaya nʼabi mu buloba bua Shinâ mu nsubu wa nzambi wandi. Wakabiteka mu nsubu wa tshibutshilu tshia nzambi wandi.

³Mukelenge wakambila Ashepenaza, kahita ka bantu bandi batungula ne, Lua ne bantu bakuabo ba Bena Isalele, bana ba bakelenge ne ba bantu banene;

⁴bansongalume badi kabayi ne tshilema hamʼbidi habo, badi ne mpala milengele, meji makane a ngenyi yonso, bayishibue meji, bajingulule lungenyi lua malu onso, bakumbane biabo bua kukuata mudimu mu nsubu wa mukelenge; bua yeye amanye mua kubayisha mikanda ne muaku bia Bena Kasada.

⁵Mukelenge wakabatekela tshituha tshia bia kudia biandi bishema bia buatshia-buatshia ne tshia nvinyo wakadiye unua, bua bobo bakoleshibue nunku bidimu bisatu; bua ku ndekelu kua bidimu ebi bamanye mua kuimana ku mpala kua mukelenge.

⁶Munkatshi mua bantu aba muakadi bakuabo ba Bena Yuda, Danyele, Hananiya, Mishaele, ne Azaliya.

⁷Kahita ka bantu batungula kakahidia mena makuabo. Kakidika Danyele ne, Beleteshasâ; kakidika Hananiya ne, Shadalaka; kakidika Mishaele ne, Meshaka; kakidika Azaliya ne, Abedenego.

⁸Kadi Danyele wakahangidisha bualu mu mutshima wandi bua kadinyangi ne bia kudia bia mukelenge ne nvinyo wakadiye unua. Nunku wakasengelela kahita ka bantu batungula bua yeye kikadi ne bua kudinyanga.

⁹Nzambi wakendesha Danyele diakalengele ne luse ku mesu kua kahita ka bantu batungula.

¹⁰Kahita ka bantu batungula kakambila Danyele ne, Meme ndi ntshina mukelenge wanyi, wakanulongoluela bia kudia ne bia kunua bienu. Munyi mudiye mua kulua kumona mpala yenu mihite ya bansongalume ba mulongo wenu bubi? Nunku nenumbueshishe mu tshilumbu tshia kunkosesha mutu kudi mukelenge.

¹¹Hashishe, Danyele wakambila mulami wakatekabo ku mutu kua Danyele ne Hananiya ne Mishaele ne Azaliya kudi kahita ka bantu batungula ne,

¹²Ndi nkusengelela ne, Anji kuteta bantu bebe matuku dikumi; batuhe midioko ya kudia ne mai a kunua;

¹³hashishe, batangile mpala yetu ne mpala ya bansongalume batu badia bia kudia bia mukelenge, nunku utuenzele tuetu bantu bebe bu muwamona.

¹⁴Nunku yeye wakabunvuila mu bualu ebu, wakahateta matuku dikumi.

¹⁵Hakashika matuku au dikumi, mpala yabo yakamueneka mihite bulengele, ne mibidi yabo yakasenena mihite ya bansongalume aba bonso bakadi badia bia kudia bishema bia mukelenge.

¹⁶Nunku mulami wakahumushila bia kudia abi ne nvinyo wakadibo ne bua kunua, wakabaha midioko.

¹⁷Nzambi wakaha bansongalume aba banai meji ne lungenyi mu diyila dia mikanda yonso ne mu meji makuabo; ne Danyele wakadi ne lungenyi lua kujingulula bikena kumona bionso ne bilota.

¹⁸Hakakumbana matuku au akamba mukelenge bua kulua nʼabo kudiye, kahita ka bantu batungula kakalua nʼabo ku mpala kua Nebukadenesâ.

¹⁹Mukelenge wakayikila nʼabo; munkatshi mua buonso buabo kakasangana bakuabo bu Danyele, Hananiya, Mishaele ne Azaliya. Nunku bakalua bimanyi ba ku mpala kua mukelenge.

²⁰Mu malu onso a meji ne lungenyi lule biakabebesha mukelenge, wakabasangana bahite bena mbuku ne bena buloshi bonso ba mu bukelenge buandi misangu dikumi.

²¹Nunku Danyele wakashala mu mudimu eu tô ne ku tshidimu tshia kumudilu tshia bukokeshi bua Mukelenge Kolesha.