Read tshiluba Danyele 6 Bible Online

Danyele 6 - tshiluba bible

Danyele 6

¹Dayawesha wakamona ne, Mbimpe bua kuteka miloho lukama ne makumi abidi mu bukelenge buandi bua yoyo ikokeshe bukelenge buonso.

²Wakateka ba-gouverneur basatu ku mutu kuai, Danyele wakadi umue wabo, bua miloho ai itabe kudibo bua mukelenge kajimishi tshintu tshimue.

³Danyele eu wakatamba ba-gouverneur bakuabo ne miloho kutumba, bualu bua lungenyi luakadi luhita bule munda muandi; mukelenge wakelangana meji bua kumuteka ku mutu kua bukelenge buandi buonso.

⁴Nunku ba-gouverneur ne miloho bakakeba bualu bua kubanda nʼabu Danyele bua muanda wa mu dikokesha diandi dia bukelenge, kadi kabakamusangana ne bualu anyi dihanga, bualu bua yeye wakamanya mua kueyemenyibua, ne kabakasangana dituhakana anyi dihanga munda muandi.

⁵Hashishe, bantu aba bakamba ne, Katuena tusangana bualu bua kubanda nʼabu Danyele eu, anu bituabukeba mu mikenji ya Nzambi wandi.

⁶Hashishe, ba-gouverneur aba ne miloho bakadisangisha ku mpala kua mukelenge, bakamuambila ne, Mukelenge Dayawesha, wikale ne muoyo tshiendelele.

⁷Ba-gouverneur bonso ba mu bukelenge, balumbuluishi, miloho, bena meji ne bakokeshi bakahunga dî dimue ne, Mukelenge ajadike mukenji, ele mukandu mukole, wamba ne, Muntu yonso walomba bualu kudi nzambi mukuabo anyi kudi muntu mukuabo mu matuku makumi asatu, kayi ubulomba kûdi nkayebe, mukelenge, bamuele mu huma bua ntambue.

⁸Nunku, mukelenge, ujadike mukandu eu, ufunde dina diebe ha mukanda udi ne mukenji eu, bua muntu kamanyi mua kuwandamuna, bu mudi mukenji wa Bena Madai ne Bena Pelasa, udi kauyi mua kukudimuka.

⁹Bua mei abo mukelenge Dayawesha wakafunda dina diandi ha mukanda wakadi ne mukenji ne mukandu.

¹⁰Hakamanya Danyele ne mukelenge wakamana kufunda dina diandi ha mukanda udi ne mukenji, wakabuela mu nsubu wandi wa mulu wakadi ne madidishi matangile ku luseke lua Yelushalema. Wakadi utua binu biandi hanshi misangu isatu ku dituku ku dituku, ulomba Nzambi wandi, umusakidila bu muakadiye wenza diambedi.

¹¹Hashishe, bantu aba bakadisangisha, bakasangana Danyele utendelela ne ulomba malu ku mpala kua Nzambi wandi.

¹²Nunku bakaya kudi mukelenge, bakamukonka bua mukandu wa mukelenge ne, Wewe mukelenge, kuakufunda dina diebe ha mukanda wamba ne, Muntu yonso walomba bualu kudi nzambi mukuabo anyi kudi muntu mukuabo mu matuku au makumi asatu, kayi ubulomba kûdi nkayebe, mukelenge, bamuele mu buina bua ntambue, anyi? Mukelenge wakabandamuna ne, Muanda eu udi wa bushuwa, bu mudi mukenji wa Bena Madai ne Bena Pelasa, udi kauyi mua kukudimuka.

¹³Nunku bakakudimuna mukelenge di ne, Danyele au udi umue wa bahika ba Bena Yuda, kena ukunemeka, mukelenge, anyi mukandu uwakujadika ne dina diebe, kadi utshidi utendelela misangu isatu ku dituku ku dituku.

¹⁴Hakunvua mukelenge mei â, wakanyingalala bikole, wakahangidisha munda bua kuhandisha Danyele; tô ne bakabuela diba wakatshinta mua kumuhandisha.

¹⁵Hashishe, bantu aba bakadisangisha ku mpala kua mukelenge, bakambila mukelenge ne, Wamanya, mukelenge, ne mukenji wa Bena Madai ne wa Bena Pelasa udi wamba ne, Kakuena mukandu anyi mukenji wakujadikabo kudi mukelenge udi mua kukudimuka.

¹⁶Nunku mukelenge wakela dî diandi; bakalua ne Danyele, bakamuela mu buina bua ntambue. Mu diba edi mukelenge wakambila Danyele ne, Nzambi webe ûdi utendelela ku dituku ku dituku akusungile.

¹⁷Bakalua ne dibue, bakaditeka ku mushiku wa buina bua ntambue; ne mukelenge wakalamikahu tshimanyishilu tshiandi ne tshia miloho yandi, bua muntu kamanyi mua kukudimuna bualu bumue bua mu malu akakuata Danyele.

¹⁸Hashishe, mukelenge wakabuela mu mbalasa wandi, wakashikamamu butuku bujima ujila bia kudia; kabakalua ne biombelu bia kuholesha nʼabi mutshima wandi, tulu tuakumuka ku mesu kuandi.

¹⁹Hatshiatshia, bakamba hanshi kutoka, mukelenge wakajuka, wakaya lukasa ku buina bua ntambue.

²⁰Hakafikeye ha buihi ne buina buakadi Danyele, mukelenge wakela dî dikole dia kanyinganyinga kudi Danyele, umuebesha ne, Danyele, mutendeledi wa Nzambi udi ne muoyo, Nzambi webe, ûdi utendelela ku dituku ku dituku, wakumanya mua kukusungila mukana mua nyama ya ntambue, anyi?

²¹Danyele wakandamuna mukelenge ne, Mukelenge, wikale ne muoyo tshiendelele!

²²Nzambi wanyi wakutuma muanjelo wandi, wakusuika mbanga ya ntambue, ne kayakungenzela bibi; bualu bua bakunsangana tshiyi ne dihila ku mpala kuandi; ne ku mpala kuebe, mukelenge, tshiakuenza bualu bubi.

²³Bua mei â mukelenge wakatamba kusanka, wakela di diandi ne, Bahatule Danyele mu buina bua ntambue. Hakahatulabo Danyele mu buina, kabakamusangana ne mputa hamʼbidi handi, bualu bua yeye wakeyemena Nzambi wandi.

²⁴Hashishe, mukelenge wakela dî diandi ne, Balue ne bantu aba bakabanda Danyele, babele mu buina bua ntambue, bobo bine, bana babo baledibue ne bakashi babo. Diambedi kabayi banze kufika hanshi ha buina mene, ntambue yakabahita bukole, yakatshibula mifuba yabo yonso bituha bituha.

²⁵Hashishe, mukelenge Dayawesha wakafunda mukanda, wakautumina bantu bonso ba mu bisamba bionso ne ba miaku yonso, badi bashikame mu buloba buonso, ubambila ne, Ditalala divulangane kunudi!

²⁶Ndi ngela mukenji ne. Mu nseke yonso ya bukelenge bundi nkokesha, bantu bazakale, bikale ne ditshina ku mpala kua Nzambi wa Danyele; Bualu bua yeye udi Nzambi wa muoyo, udiku tshiendelele; bukelenge buandi mbukelenge budi kabuyi mua kubutudibua kashidi, bukokeshi buandi nebuikaleku tô ne kunshikidilu kua malu onso.

²⁷Yeye udi ubandisha, udi usungila, udi ulesha bimanyinu, udi wenza malu a kukema mu diulu ne hanshi ha buloba; nyeye wakusungila Danyele kudi nyama ya ntambue.

²⁸Nunku Danyele wakadi ne diakalengele mu matuku a bukokeshi bua Dayawesha ne mu bukokeshi bua Kolesha, Muena Pelasa.