Read tshiluba Hoshea 1 Bible Online

Hoshea 1 - tshiluba bible

Hoshea 1

¹Dî dia Yehowa diakalua kudi Hoshea, muana wa Beli, mu matuku a Uziya, Yotama, Ahaza ne Hezikiya, bakelenge ba Yuda, ne mu matuku a Yalobama, muana wa Yoasha, mukelenge wa Isalele.

²Ku tshibangidilu hakayikila Yehowa ne Hoshea, Yehowa wakamuambila ne, Ya biebe, ubake mukashi wa masandi, ulele nʼandi bana ba mu masandi; bualu bua ba mu buloba ebu badi balonda malu a masandi, bahambuke kudi Yehowa.

³Nunku wakaya biandi, wakabaka Gomê, muana wa bakashi wa Dibelayama; ne yeye wakimita difu, wakamulelela muana wa balume.

⁴Yehowa wakamuambila ne, Umuidike dina ne, Yizelele[1]; bualu bua hahita musangu muihi, nensombuele mashi a Yizelele akadibo bamatshisha hanshi kudi ba mu tshiota tshia Yehu, nengumushe bukelenge kudi Bena Isalele.

⁵Mu dituku adi nentshibule buta bua Bena Isalele mu tshibanda tshia Yizelele.

⁶Yeye wakimita difu kabidi, wakalela muana wa bakashi. Yehowa wakambila Hoshea ne, Umuidike dina ne, Udibo-kabayi-bafuila-luse[2]; bualu bua tshiena nfuila Bena Isalele luse bua kubabuikidila mibi yabo.

⁷Kadi nenfuile Bena Yuda luse; nembahandishe ku bukole bua Yehowa Nzambi wabo, tshiena mbahandisha ku buta, anyi ku muele wa nvita, anyi ku nvita anyi ku tubalu anyi kudi bena tubalu.

⁸Bakajila Udibo-kabayi-bafuila-luse mabele, Gomê wakimita difu dikuabo, wakalela muana wa balume.

⁹Yehowa wakamba ne, Umuidike dina ne, Kambantu-banyi[3]!; bualu bua nuenu kanuena bantu banyi, ne tshiena ngikala Nzambi wenu.

¹⁰Kadi bungi bua Bena Isalele nebuikale bu nsenga ya ku mai manene, idibo kabayi mua kuidikisha anyi kubala; ne mu muaba wakadibo bamba ne, Kanuena bantu banyi, nebabambile ne, Nudi bana balume ba Nzambi wa muoyo.

¹¹Nebasangishe Bena Yuda ne Bena Isalele hohamue, ne bobo bine nebadisunguile muntu umue bua kuikaleye ha mutu habo; nebumuke mu buloba ebu, bua dituku dia Yizelele nedikale dinene.