Read tshiluba Hoshea 4 Bible Online

Hoshea 4 - tshiluba bible

Hoshea 4

¹Unvuai dî dia Yehowa, nuenu Bena Isalele! Bualu bua Yehowa udi ne tshilumbu tshia kulumbuluisheye bantu ba mu buloba ebu; bualu bua kakuena bulelela, kakuena buimpe, kakuena kumanya kua Nzambi kudibo mu buloba.

²Anu kuditshiha ne mitshihu ya mashimi, kudinga, kushihangana, kuiba ne kuenda kua masandi kudiku. Badi bashimbula bimanu bia nsubu, ne kumatshisha kua mashi kudi kulonda kumatshisha kua mashi.

³Bua mianda yaya buloba budi buasa muadi, ne bantu bonso badi bashikamemu badi batekete, ne nyama ya mu mpata ne nyunyu ya mu diulu bidi bitekete muomumue; minyinyi ya mu mai kabidi idi ifua.

⁴Kadi muntu kabambakashi mei ne mukuabo, kabandi mukuabo; bualu bua bana benu badi benza bu bantu badi batanda ne muakuidi.

⁵Ne wewe, muakuidi, neulenduke mu munya; muprofete nealenduke nʼebe butuku; ne meme nenshihe mamu webe.

⁶Bantu banyi badi babutudibua bualu bua kabena ne lungenyi; bualu bua wewe wakubenga lungenyi, nenkubenge kabidi, bua wewe kuikadi muakuidi wanyi. Bualu bua wakuhua mikenji ya Nzambi webe muoyo, meme kabidi nempue bana bebe muoyo.

⁷Bu muakakumbanabo ba bungi, mbu muakangenzelabo bibi; nenkudimune butumbi buabo bulue bundu.

⁸Badi badia bukute bua malu mabi a bantu banyi, badi basamina mitshima yabo ku milambu ya dihila dia bubi.

⁹Bualu ebu nebuikaleku ne, Bu mudi bantu, mbu mudi muakuidi; ne nembakengeshe bu mudi tshikadilu tshiabo, nembafute bu mudi bienzedi biabo.

¹⁰Nebadie, kadi kabena bukuta; nebalonde malu a masandi, kadi kabena bavudisha bana; bualu bua bakulekela kuteleja matshu abo kudi Yehowa.

¹¹Masandi ne maluvu ne nvinyo mihia-mihia bidi biumusha meji a mu mutshima.

¹²Bantu banyi badi balomba lungenyi ku tshibasa tshia mutshi, ne tshibangu tshiabo tshidi tshibatempela; bualu bua mutshima wa masandi wakubahambuisha, ne bakulonda malu a masandi, batombokela Nzambi wabo.

¹³Badi bashihela mpingu milambu ha mitu ha mikuna mile, badi bayoshela musenga wa manananshi ha mikuna mikese, muinshi mua mitshi ya chêne, ya peuplier ne ya térébinthe, bualu bua dileshi diai didi dimpe. Nunku bana benu ba bakashi badi balonda malu a masandi, ne bakashi ba bana benu ba balume badi benda masandi.

¹⁴Tshiena nkengesha bana benu ba bakashi habuelabo mu bundumba, anyi bakashi ba bana benu ba balume hendabo masandi; bualu bua balume bine badi baya ha nkayabo ne bakashi ba masandi, badi bashihela mpingu milambu diatshimue ne bakashi ba masandi ba mu bitendelelu. Bantu badi kabayi bajingulula nebabutudibue.

¹⁵Bena Isalele, nansha binualonda malu a masandi, Bena Yuda kabahishibu bua muanda eu nansha. Kanulu ku Gilegala, kanubandi ku Bete-awena, kanuditshihi nunku ne, Bu mudi Yehowa ne muoyo.

¹⁶Bena Isalele bakulua bena tshitshu bu lukungulu lua ngombe ludi ne tshitshu; Yehowa neamanye mua kubadisha bu mudiye udisha muana wa mukoko mu mpata mimene, anyi?

¹⁷Bena Efelayima bakudilamika kudi mpingu yabo, nubalekele nʼai!

¹⁸Kunua kuabo kua maluvu kudi kuamba kushika, badi bananukila kuenda masandi; bakokeshi babo badi batamba kunanga malu a bundu.

¹⁹Luhehele luakuya nʼabo mu mahuahua alu; nebakuatshike bundu bua bioshelu biabo.