Read tshiluba Hoshea 9 Bible Online

Hoshea 9 - tshiluba bible

Hoshea 9

¹Bena Isalele, kanusanki bua kutumba bu mudi ba mu bisamba bia bende hatumba! Bua nuakulonda malu a masandi hanuakulekela Nzambi wenu; nuakunanga difutu dia bena masandi dia ha bishihuidi bionso bia maminu.

²Tshishihuidi ne tshikaminu kabiena bibadisha kabidi, nebahange nvinyo mihia-mihia.

³Kabena bashala mu buloba bua Yehowa, kadi ba mu Efelayima nebahingane mu Ejipitu, nebadie bia kudia bidi bibiha mu Ashû.

⁴Kabena bahongoluela Yehowa milambu ya nvinyo, ne milambu yabo ne nyama mimushihula kayena imusankisha kabidi. Bia kudia biabo nebikale bu bia kudia bia bena madilu, bualu bua bonso badi babidia nebabihe. Bualu bua bia kudia biabo bidi biabo nkayabo; kabiena mua kubuela mu nsubu wa Yehowa.

⁵Nenuenze tshinyi mu disanka dia kudia bia kudia, ne mu dituku dia bidia bia disanka dia Yehowa?

⁶Monai, bakuya kukuabo bualu bua kubutuka kua buloba buabo, kadi Ejipitu neabasangishe kudiye, Mempi neabajike. Mpesa neyihiane bintu biabo bilengele bia argent; mingonge ya meba neyikale mu ntenta yabo.

⁷Matuku a kubakengesha akufika, matuku a kubafuta akulua; Bena Isalele nebamanye muanda eu ne, Muprofete udi muhote, muntu udi ne nyuma udi muhale, bualu bua bubi buenu buvule, ne bualu bua lukuna luenu ludi lukole.

⁸Bena Efelayima badi balamina Nzambi wanyi; buteyi bua tshilembi tshia nyunyu budi mu nshila ya baprofete, ne lukuna ludi mu nsubu wa Nzambi wandi.

⁹Bakudinyanga ne tshinyangu tshikole, bu muakenzabo mu matuku a Gibea. Yeye neavuluke bubi buabo, neabakengeshe bua malu mabi abo.

¹⁰Nakasangana Bena Isalele bu tumuma tua nvinyo tua mu tshihela, nakamona batatu benu bu tumuma tua ku mpala tua mutshi wa nfigi. Kadi bakahia ku Bâla-peô, bakadijidila kudi Bâla udi ubafuisha bundu, bakalua bena tshinyangu bu muakadi tshintu tshiakanangabo.

¹¹Butumbi bua Bena Efelayima nebûmuke kudibo bu mudi nyunyu ubuka, nunku kakuena kuikala kulela kua bana, kakuena kuikala mukashi ne difu, kakuena kuikala kuimita kua difu.

¹²Nansha biakoleshabo bana, nembanyengabo, bua muntu umue kashadi. E, mulau newikale kudibo hangumuka kudibo!

¹³Bu munakadianjila kumona, bana ba balume ba Bena Efelayima badi ne bua kukuatshibua kudi bena nvita, ne Bena Efelayima nebikale ne bua kuhatula bana babo bua bakuabo babashihe.

¹⁴Yehowa, ubahe; neubahe tshinyi? Ubahe difu didi dituka ditshikale ditekete, ne biadi biume.

¹⁵Bubi buabo buonso budi mu Gilegala, mu muaba au nakabakina. Bua malu mabi abo nembihate mu nsubu muanyi; tshiena mbananga kabidi; bakokeshi babo bonso badi bantombokedi.

¹⁶Ba mu Efelayima bakutahibua, muji wabo wakûma, kabena bakuama mamuma. E, nansha bialelabo bana, nenshihe bana bananga badibo balela.

¹⁷Nzambi wanyi neabihate, bualu bua kabakamunvuila; nebikale bena tshiendenda munkatshi mua bisamba bia bantu.