Read tshiluba Yona 1 Bible Online

Yona 1 - tshiluba bible

Yona 1

¹Dî dia Yehowa diakalua kudi Yona, muana wa Amitai, diamba ne,

²Bika, ya ku Ninewe, musoko au muneme, ûbele; bualu bua bubi buabo buakubanda ku mesu kuanyi,

³Kadi Yona wakabika bua kunyemeneye ku Tâshishi bua kumuka ku mesu kua Yehowa. Wakahueka ku Yopa, wakasangana buatu buamba kuya ku Tâshishi; wakafuta mushinga wa luendu, wakabuela mu buatu bua kuyeye ne bena buatu ku Tâshishi, unyema Yehowa.

⁴Kadi Yehowa wakatuma tshihehele tshikole ha mai manene, ne tshihuhu tshikole tshiakadi ha mai manene; buatu buakamba kutshibuka.

⁵Hashishe, bena buatu bakakuatshika buowa, muntu ne muntu wakadila kudi nzambi wandi; bakahatula bintu biakadibo nʼabi mu buatu ne bakabiela mu mai manene bua kubuhehesha. Kadi Yona wakadi mumane kuhueka mu nsubu mukuabo wa munda mua buatu, wakadi mulale tulu tukole.

⁶Nunku kapitene ka buatu kakalua kudiye, kakamuebesha ne, Ahu, wewe udi muladile tulu tshinyi? Juka biebe, bikila dina dia nzambi webe; bumue nzambi au nele meji a bualu buetu, bua tuetu katufu nansha.

⁷Bakambilangana ne, Tuye kuela nshobo bua kumanya ne bualu ebu bubi budi butukuata mbua nganyi? Nunku bakela nshobo, nshobo yakakuata Yona.

⁸Hashishe, bakamuambila ne, Tudi tukusengelela bua wewe kutuambila ne muanda eu udi mutukuate mbua bubi bua muntu kai? Mudimu webe udi tshinyi? Udi mufume kudi kunyi? Buloba buebe budi hanyi? Udi wa tshisamba kai?

⁹Yeye wakabakudimuna ne, Ndi Muena Ebelu; ndi ntshina Yehowa, Nzambi wa mu diulu, wakafuka mai manene ne buloba bûme.

¹⁰Hashishe, bantu aba bakatamba kutshina bakamuambila ne, Tshiudi muenzele nunku ntshinyi? Bua bantu aba bakamanya ne yeye wakadi unyema Yehowa, bualu bua wakamana kubambila nunku.

¹¹Hashishe, bakamuebesha ne, Tukuenzele tshinyi hua mai manene abatame? Bualu bua mai manene akadi abisha mavuala.

¹²Nunku yeye wakabambila ne, Nungambule nungele mu mai manene, bua mai manene abatame; bualu bua ndi mumanye ne tshihuhu etshi tshinene tshidi tshinukuate bua bualu buanyi.

¹³Kadi bena buatu bakita bikole bua kuhingasha buatu ku mpata hadi bakahanga; bualu bua mai manene akabisha mavuala matambe bunene ku mpala kuabo.

¹⁴Bua muanda eu bakadila kudi Yehowa, bamba ne, Yehowa, tudi tukusengelela, kuitabushi bua tuetu kufua bua muntu eu, kuteki mashi a muntu udi kayi muhishibue hamʼbidi hetu; bualu bua wewe Yehowa, wakuenza bu muwakadi mumone ne mbimpe.

¹⁵Nunku bakambula Yona, bakamuela mu mai manene, ne mai manene akalekela kubisha mavuala manene.

¹⁶Hashishe bantu aba bakatshina Yehowa bikole, bakafila milambu kudi Yehowa, bakaditshiha mitshihu.

¹⁷Yehowa wakalongolola munyinyi munene wa mu mai bua kuminau Yona; ne Yona wakadi munda mua munyinyi wa mu mai minya isatu ne mafuku asatu.