Read tshiluba Yona 4 Bible Online

Yona 4 - tshiluba bible

Yona 4

¹Kadi muanda eu wakafikisha Yona munda bikole, ne yeye wakakuatshika tshiji.

²Wakatendelela biandi Yehowa, wakamba ne, Yehowa, ndi ukukonka ne, Tshiakamba dî edi hantshivua mu buloba buanyi, anyi? Bua muanda eu nakadianjila kunyemena ku Tâshishi; bualu bua nakamanya ne wewe udi Nzambi wa luse, mûle tente ne dinanga, kuyi ukuatshika tshiji lubilu, udi ulesha bantu luse lujalame lukumbane, udi ukudimuna mutshima webe bua dikenga kadikuatshi bantu.

³Nunku Yehowa, ndi nkusengelela ne, Angata muoyo wanyi; bualu bua kufua kudi kuhita kushala ne muoyo buakane kundi.

⁴Yehowa wakamba ne, Udi wenza bimpe haudi ukuata tshiji nunku, anyi?

⁵Hashishe, Yona wakahatuka mu musoko, wakashikama mu muaba wakadi mutangilangane ne musoko ku luseke lua esete ne wakadibakilaku tshitandatanda, wakadi mushikame muinshi mua dileshi diatshi bua kumoneye ne malu kai akuata musoko.

⁶Yehowa Nzambi wakamenesha mudiantondo, wakaulehesha tô ne ha mutu ha Yona, bua wikale dileshi ha mutu handi bua kumûmushila lutatu luandi. Nunku Yona wakatamba kusanka bua mudiantondo.

⁷Kadi hakatshiabu, Nzambi wakatuma tshishi tshiakadia mudiantondo, wakafubidila.

⁸Hashishe, hakabanda diba, Nzambi wakatuma luhehele lua munanga lua ku esete; munya wakosha Yona mu mutu bikole, yeye wakahungila, wakalomba Nzambi ne, Nfue bianyi; wamba kabidi ne, Kufua kudi kuhita kushala ne muoyo buakane kundi.

⁹Nzambi wakebesha Yona ne, Udi wenza bimpe haudi ukuata tshiji nunku bua mudiantondo, anyi? Yeye wakamuandamuna ne, Ndi ngenza bimpe bua kuikala nʼatshi tô ne ku lufu.

¹⁰Hashishe, Yehowa wakamuambila ne, Wewe udi unyingalala bua mudiantondo, ûdi kuyi mukuatshile mudimu, kuyi mudiundishe; mumene bufuku bumue, ekufua bufuku bukuabo.

¹¹Ne meme tshiakadi ne bua kunyingalala bua Ninewe, musoko au munene, mudi bantu binunu lukama ne makumi abidi badi kabayi mua kujingulula tshianza ne ntshia balume ne ntshia bakashi, ne mudi bimuna bia bungi kabidi, anyi?