Read tshiluba Nomba 1 Bible Online

Nomba 1 - tshiluba bible

Nomba 1

¹Yehowa wakambila Mose mu tshihela tshia Sinai, mu ntenta wa kusambakena, ku dituku dia kumudilu dia ngondo muibidi mu tshidimu tshibidi tshia kuluhuka kuabo mu buloba bua Ejipitu, ne,

²Ubale bungi bua Bena Isalele bonso, ku meku abo ne ku nsubu ya batatuʼabo, bungi bua mena a balume, muntu ne mundi,

³wewe ne Alona nubange kudi balume bonso ba mu Isalele bakahita bidimu makumi abidi to ne ha mutu, nubale buonso buabo ku tshisumbu ne ku tshisumbu badi bamanye mua kuya mu nvita.

⁴Nuye bienu ne muntu wa mu tshisamba muntu wa mu tshisamba, muntu yonso udi ku mutu kua nsubu wa batatuʼabo.

⁵Au mmena a balume badi mua kuimana nʼenu. Wa mu tshisamba tshia Lubena, Elisu muana mulume wa Shedeu.

⁶Wa mu tshisamba tshia Shimeona, Shelumiele muana mulume wa Sulishadai.

⁷Wa mu tshisamba tshia Yuda, Nashona muana mulume wa Aminadaba.

⁸Wa mu tshisamba tshia Yisakâ, Netanaele muana mulume wa Sua.

⁹Wa mu tshisamba tshia Zebuluna, Ehaba muana mulume wa Helona.

¹⁰Wa munkatshi mua bana ba Yosefe, wa mu tshisamba tshia Efelayima, Elishama muana mulume wa Amihuda. Wa mu tshisamba tshia Manashe, Gamaliele muana mulume wa Pedasû.

¹¹Wa mu tshisamba tshia Benyamina, Abidana muana mulume wa Gideom.

¹²Wa mu tshisamba tshia Dana, Ahiezê muana mulume wa Amishadai.

¹³Wa mu tshisamba tshia Ashe, Pagiele muana mulume wa Okelana.

¹⁴Wa mu tshisamba tshia Gada, Eleyasafa muana mulume wa Deuele.

¹⁵Wa mu tshisamba tshia Nafatale, Ahila muana mulume wa Enana.

¹⁶Aba mbantu bakabikilabo ba mu tshisumbu tshia Bena Isalele, bakelenge ba bisamba bia batatuʼabo, bakadi ku mutu kua binunu bia Bena Isalele.

¹⁷Mose ne Alona bakangata balume aba bakabikilabo ku mena abo

¹⁸bakasangisha tshisumbu tshionso tshia Bena Isalele ku dituku dia kumudilu dia ngondo muibidi, bakababadila milongo ya bankambua babo ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, muntu ne muntu.

¹⁹Bu muakambila Yehowa Mose, wakababadila mu tshihela tshia Sinai.

²⁰Bana ba Lubena, muanʼa bute wa Isalele, ku bikondo biabo, ku meku abo, ku nsubu ya batatuʼabo, bungi bua mena abo muntu ne muntu, ku bidimu makumi abidi tô ne ha mutu balume bonso bakamanya mua kuya mu nvita,

²¹bakabala ba mu tshisamba tshia Lubena binunu makami anai ne bisambombo ne nkama itanu.

²²Bana ba Shimeona, ku bikondo biabo, ku meku abo, ku nsubu ya batatuʼabo, bungi bua mena abo muntu ne muntu, balume bonso ku bidimu makumi abidi to ne ha mutu, bakamanya mua kuya mu nvita,

²³bakabala ba mu tshisamba tshia Shimeona binunu makumi atanu ne tshitema ne nkama isatu.

²⁴Bana ba Gada ku bikondo biabo, ku meku abo, ku nsubu ya batatuʼabo, bungi bua mena abo, ku bidimu makumi abidi tô ne ha mutu, bakamanya mua kuya mu nvita;

²⁵bakabala ba mu tshisamba tshia Gada binunu makumi anai ne bitanu ne nkama isambombo ne makumi atanu.

²⁶Bana ba Yuda ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita;

²⁷bakabala ba mu tshisamba tshia Yuda binunu makumi muanda mutekete ne binai ne nkama isambombo.

²⁸Bana ba Yisakâ ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita,

²⁹bakabala ba tshisamba tshia Yisakâ binunu makumi atanu ne binai ne nkama mai.

³⁰Bana ba Zebuluna ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita;

³¹bakabala ba mu tshisamba tshia Zebuluna binunu makumi atanu ne muanda mutekete ne nkama mai.

³²Bana ba Yosefe ba mu tshisamba tshia Efelayima ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita,

³³bakabala ba mu tshisamba tshia Efelayima binunu makumi anai ne nkama itanu.

³⁴Bana ba Manashe ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita,

³⁵bakabala ba mu tshisamba tshia Manashe binunu makumi asatu ne bibidi ne nkama ibidi.

³⁶Bana ba Benyamina ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita;

³⁷bakabala ba mu tshisamba tshia Benyamina binunu makumi asatu ne bitanu ne nkama mai.

³⁸Bana ba Dana ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi to ne ha mutu, bonso bakamanya mua kuya mu nvita,

³⁹bakabala ba mu tshisamba tshia Dana binunu makumi asambombo ne bibidi ne nkama muanda mutekete.

⁴⁰Bana ba Ashê ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita,

⁴¹bakabala ba mu tshisamba tshia Ashê binunu makumi anai ne tshimue ne nkama itanu.

⁴²Bana ba Nafatale ku bikondo biabo, ku meku abo, ku nsubu ya batatuʼabo, bungi bua mena abo ku bidimu makumi abidi tô ne ha mutu, bonso bakamanya mua kuya mu nvita,

⁴³bakabala ba mu tshisamba tshia Nafatale binunu makumi atanu ne bisatu ne nkama mai.

⁴⁴Aba mbantu bakabalabo kudi Mose ne Alona, ne kudi bakelenge ba Bena Isalele dikumi ne babidi, muntu ku nsubu wa batatuʼabo muntu ku nsubu wa batatuʼabo.

⁴⁵Nunku bungi bua Bena Isalele buakabalabo ku nsubu ya batatuʼabo, ku bidimu makumi abidi tô ne ha mutu, bonso bakamanya mua kuya mu nvita mu Isalele

⁴⁶bungi bua buonso buabo buakabalabo buakadi binunu nkama isambombo ne bisatu ne nkama itanu ne makumi atanu.

⁴⁷Kadi kabakabala Bena Lewi munkatshi muabo ku tshisamba tshia batatuʼabo.

⁴⁸Bualu bua Yehowa wakambila Mose ne,

⁴⁹Kubadi tshisamba tshia Lewi nansha, kubadi bungi buabo munkatshi mua Bena Isalele,

⁵⁰kadi usungule Bena Lewi bua kuenzabo mudimu mu nsubu wa tshitendelelu, ne wa bintu bionso bidimu bobo nebatuale nsubu ne bintu bionso bidimu, bobo nebabibale, nebashikame ha buihi ne nsubu wa tshitendelelu.

⁵¹Hayabo ne nsubu wa tshitendelelu mu nshila, Bena Lewi nebatule nsubu, ne halongololabo tshitudilu, Bena Lewi nebamushimike, bialua muenyi ha buihi nebamushihe.

⁵²Bena Isalele nebadishimikile ntenta yabo, mundi ne muntu ku tshitudilu tshiandi, hehi ne dibendele diandi ku bisumbu biabo.

⁵³Kadi Bena Lewi nebashimike ntenta yabo minyunguluke nsubu wa tshitendelelu, bua mulau kaukuatshi Bena Isalele Bena Lewi nebabale nsubu wa tshitendelelu.

⁵⁴Bena Isalele bakenza nunku, bakenza malu onso akambila Yehowa Mose.