Read tshiluba Nomba 18 Bible Online

Nomba 18 - tshiluba bible

Nomba 18

¹Yehowa wakambila Alona ne, Wewe ne bana bebe balume ne ba mu nsubu wa ba tatuʼebe nenutuale mahambuka a ku buakane a bantu mu nsubu wa tshitendelelu, wewe ne bana bebe balume nenutuale mahambuka a mudimu wenu wa buakuidi.

²Bana benu kabidi, tshisamba tshia Lewi, tshisamba tshia tatuʼebe, ulue nʼabo bua bobo bakukuatshile mudimu kadi wewe ne bana bebe balume badi nʼebe nenuikale ku mpala kua ntenta wa kusambakena.

³Bobo nebalame bintu biebe ne bintu bia mu Ntenta: kadi bobo kabalu ha buihi ne malonga a mu nsubu anyi tshioshelu, bua bobo kabafu ne nuenu kanufu kabidi.

⁴Bobo nebakukuatshishe bua bintu bia mu ntenta wa kusambakena, ne mu mudimu wonso wa Ntenta muenyi kalu ha buihi nʼenu.

⁵Nuenu nenulame tshitendelelu ne tshioshelu, nunku mulau mukuabo kaukuatshi Bena Isalele.

⁶Mona! Meme nakadiangatshila bana benu, Bena Lewi, munkatshi mua Bena Isalele badi bu kuha kuebe kuwakuha Yehowa bua kuenza mudimu wa mu ntenta wa kusambakena.

⁷Wewe ne bana bebe balume badi nʼebe nenuikale ne mudimu wa buakuidi bua bintu bionso bia tshioshelu ne bintu bidi ku nyima kua tshilulu tshikudika, nuenu nenuenze mudimu eu, nakunuha mudimu wa buakuidi bu mudimu wa kuha kuenu, muenyi udi ulua ha buihi, nebamushihe.

⁸Yehowa wakambila Alona ne, Mona, meme nakakuteka ku mutu kua milambu yanyi idibo banyukula ne bintu bionso bidi Bena Isalele bajila, nakakuha bintu ebi bu tshituha tshia bintu biebe bualu bua kujidila kuebe ne kua bana bebe balume tshiendelele.

⁹Nebikale bintu biebe munkatshi mua bintu biakajidilabo ku kahia milambu yabo yonso, ne ya bukula, ne ya kubuikila nʼai bubi buabo, ne ya kubuikila nʼai kusambuka kuabo kua mikenji, milambu idibo bafila kundi neyikale bu tshintu tshia tshijila kûdi ne kudi bana bebe balume.

¹⁰Wewe neudie bintu ebi bia tshijila, muntu mulume yonso neadie bintu ebi ebi mbintu biebe bia tshijila.

¹¹Ebi mbintu biebe kabidi: bintu bidi Bena Isalele banyukula, ne milambu yonso idibo bakuha, nakunuha ne bana bebe balume ne bana bebe bakashi badi nʼebe, bu tshintu tshienu tshiendelele muntu yonso udi muakane mu nsubu webe neabidie.

¹²Bintu bimpe bia manyi ne bia tumuma tukese ne bia manvua[8] ne bia mamuma adibo bahuola diambedi, bintu bionso bidibo bafila kudi Yehowa, nakukuha bintu ebi.

¹³Mamuma mimpe a mu buloba buabo buonso adibo bahuola diambedi, adibo halua nʼau kudi Yehowa, neikale mamuma ebe, muntu yonso wa mu nsubu webe udi muakane neadie.

¹⁴Tshintu tshionso tshidibo bajila mu Isalele netshikale tshiebe.

¹⁵Bintu bionso bidibo balela, ne bia bantu ne bia nyama idibo bafila kudi Yehowa, nebikale biebe, kadi wewe neuhikule banʼa bute ba bantu ne banʼa bute bonso ba nyama idi kayiyi miakane.

¹⁶Bintu bidi ne bualu bua kuhikudibua bia ngondo umue, wewe neubihikule bu mudi mushinga wabi, nshekele[9] itanu bu nshekele wa mu nsubu wa tshitendelelu (nshekele udi bu guéras makumi abidi).

¹⁷Kadi banʼa bute ba ngombe ne ba mikoko ne ba mbushi, wewe kuena ubihikula, ebi mbintu bia tshijila wewe neumiamine mashi abi ha tshioshelu, newoshe dianyi diabi bu mulambu wa kuosha ha kahia, bu tshintu tshidi tshitua dihembu kudi Yehowa.

¹⁸Munyinyi wabi newikale webe bu mudi tshiadi tshidibo banyukula ne tshibelu tshia ku tshianza tshia bukole.

¹⁹Milambu yonso ya bintu bia tshijila bidibo banyukula bidi Bena Isalele bafila kudi Yehowa, nakunuhabi ne bana bebe balume ne bana bebe bakashi, bu tshintu tshienu tshiendelele: etshi ntshihungidi tshia luehu tshia tshiendelele ku mesu kua Yehowa kûdi wewe ne kudi bana bebe badi nʼebe.

²⁰Yehowa wakambila Alona ne, Wewe kuena ne buhianyi mu buloba buabo, wewe kuena ne tshituha munkatshi muabo meme ndi tshituha tshiebe ne buhianyi buebe munkatshi mua Bena Isalele.

²¹Mona, nakuha Bena Lewi tshintu tshia dikumi tshionso tshia mu Isalele bu buhianyi buabo bua mudimu udibo benza mu ntenta wa kusambakena.

²²Bena Isalele kabalu ha buihi ne ntenta wa kusambakena bua kabadituadidi bubi buabo, kabafu.

²³Kadi Bena Lewi nebenze mudimu wa mu ntenta wa kusambakena, bobo nebadituadile bubi buabo eu udi mukenji wa tshiendelele ku bikondo bienu bionso, bobo kabena ne buhianyi munkatshi mua Bena Isalele.

²⁴Bualu bua nakuha Bena Lewi tshintu tshia dikumi tshia Bena Isalele tshidibo banyukula kudi Yehowa, bu buhianyi buabo, bua bualu ebu nakubambila ne, Kabena ne buhianyi munkatshi mua Bena Isalele.

²⁵Yehowa wakambila Mose ne,

²⁶Wambile Bena Lewi ne, Hanuangata tshintu tshia dikumi tshia bintu bia Bena Isalele tshinakunuha bu buhianyi buenu, nenutshinyukule bu mulambu udibo banyukula kudi Yehowa, tshintu tshia dikumi tshia tshintu tshia dikumi tshiakanuhabo.

²⁷Nebanubadile mulambu udibo banyukula bu bintu biakushihulabo ku tshishihuidi ne bu bintu biakukamabo ha tshikaminu.

²⁸Nunku nuenu nenufile mulambu wa bia dikumi bionso binudi nuangata kudi Bena Isalele bu mulambu udibo banyukula kudi Yehowa, wewe neuhe Alona muakuidi mulambu eu wa bintu bidibo banyukula kudi Yehowa.

²⁹Nenufile tshituha tshia bintu bienu bionso bu mulambu udibo banyukula kudi Yehowa nenufile bintu bidi bitamba buimpe, bintu bia tshijila mene.

³⁰Nunku wewe mubambile ne, Hanuanyukula bintu bidi bitamba buimpe, bintu ebi nebikale bibadibue kudi Bena Lewi bu bintu biakuvulangana ku tshishihuidi ne ha tshikaminu.

³¹Nenudie bintu ebi mu miaba yonso, ne nuenu ne ba mu nsubu yenu edi ndifutu dienu diakanufutabo bua mudimu wenu mu ntenta wa kusambakena.

³²Bua bualu ebu kanuena nudituadila bubi, hanuanyukula bintu bidi bitamba buimpe kanuena nuona bintu bia tshijila bia Bena Isalele, bua nuenu kanufu.