Read tshiluba Nomba 24 Bible Online

Nomba 24 - tshiluba bible

Nomba 24

¹Hakatangila Belâma ne bualu ebu buakusankisha Yehowa bua kuvudishila Bena Isalele disanka, yeye kakaya kabidi kutempa mbuku bu muakenzeye misangu mikuabo, kadi wakatangisha mpala wandi ku tshihela.

²Belâma wakabandisha mesu andi, wakatangila Bena Isalele bashikama ku milongo ya bisamba biabo, Nyuma wa Nzambi wakalua kudiye.

³Yeye wakela lusumuinu luandi ne, Belâma, muana mulume wa Beô, muntu wakadi ne disu diandi dibuikila,

⁴udi unvua mei a Nzambi, udi utangila bilota bia Nzambi wa Bukole, hahoneye hanshi, mesu andi adi matabale,

⁵udi wamba ne, Yakoba, ntenta yebe idi mimpe! Bena Isalele, bitudilu bienu bidi bimpe!

⁶Bidi bibaluluke bu bibanda, bu bibunda bidi hehi ne musulu, bu mitshi ya aloe yakakunabo kudi Yehowa, bu mitshi ya cèdre idi hehi ne mai.

⁷Mai adi aluhuka mu milondo yandi, bana bandi nebikale munkatshi mua mai a bungi, mukelenge wandi neahite Agaga bunene, bukelenge buandi nebutumbishibue.

⁸Nzambi wakamubadila mu Ejipitu, yeye udi ne bukole bua nyama wa mbowa, yeye neamine bisamba bia bantu badi nʼandi lukuna, neatshibule mifuba yabo bituha, yeye neabatubule ne mikete.

⁹Udi walamina bu nyama wa ntambue, udi ulala hanshi bu mukashi wa nyama wa ntambue, nganyi neamubishe? Wakasankisha ikale biandi ne disanka, ne wakuela mulau ikale biandi ne mulau.

¹⁰Tshiji tshiakakuata Balaka bualu bua Belâma wakakuma bianza biandi Balaka wakambila Belâma ne, Nakakubikila bua kungelela bantu badi hanyi lukuna mulau, kadi mona, wewe wakubavudishila disanka misangu ei isatu.

¹¹Katataka ya kuebe, nakadi ngelangana meji bua kukuha butumbi bunene, kadi mona, wewe wakubavudishila butumbi ebu.

¹²Belâma wakambila Balaka ne, Tshiakuambila miloho yebe kabidi iwakuntumina ne,

¹³Biampa Balaka nsubu wandi mûle tente ne argent ne or, tshiena mumanye mua kuya ku mpala kua dî dia Yehowa, bua kuenza bualu buimpe anyi bualu bubi mu mutshima wanyi, nenkuambile mei onso adi Yehowa ubambile, tshiakayambila nunku, anyi?

¹⁴Katataka nyaya kudi bantu banyi, lua biebe, nenkuleshe malu adi bantu aba benzela bantu bebe mu matuku adi ku mpala.

¹⁵Yeye wakamuela lusumuinu luandi ne, Belama, muana mulume wa Beô, muntu wakadi ne disu diandi dibuikila, udi Wamba ne,

¹⁶Udi unvua mei a Nzambi, udi ne lungenyi lua Nzambi wa mu diulu, udi utangila bilota bia Nzambi wa Bukole, hahoneye hanshi ne mesu andi adi matabale.

¹⁷Ndi mumutangile kadi tshiena mumutangile katataka, ndi mumumone kadi yeye kena ha buihi, Mutoto nebiluhuke kudi Yakoba, ne dikombo dia bukelenge nedibike munkatshi mua Bena Isalele, nedikume ku matshika a Moaba, nedishihe bana bonso ba Shete.

¹⁸Edome neikale buhianyi, ne Sei, buloba bua bena lukuna bandi, neikale buhianyi buandi, kadi Bena Isalele nebenze malu makole.

¹⁹Muntu nealuhuke kudi Yakoba, neikale ne bukelenge butambe, neashihe tshituha tshia bantu badi bashala mu musoko.

²⁰Yeye wakatangila kudi Amaleka, wakabela lusumuinu luandi ne, Amaleka wakadi tshisamba tshia ku mpala munkatshi mua bisamba, kadi kunshikidilu tshisamba tshiandi netshijimme tshiendelele.

²¹Yeye wakatangila kudi Bena Kene, wakabela lusumuinu ne, Muaba unudi nushikama udi mukole, udi munkatshi mua mabue.

²²Kadi nebahaule Bena Kene tô ne haya Bena Ashû nʼabo bu bena lukanu.

²³Wakela lusumuinu luandi kabidi ne, Nganyi neikale ne muoyo hashikisha Nzambi malu au?

²⁴Kadi matu manene nealue kukala kua buloba bua Bena Kiti, nebakengeshe Bena Ashû, nebakengeshe Bena Ebê kabidi, yeye neikale muhaudibue kabidi.

²⁵Belâma wakabika, wakahingana kuandi, Balaka wakaya kuandi kabidi.