Read tshiluba Habakuka 3 Bible Online

Habakuka 3 - tshiluba bible

Habakuka 3

¹Kutendelela kua Habakuka muprofete, kulongolola mu tshimbilu tshia Shigionota.

²Yehowa, nakunvua lumu luebe, ndi ntshina. Yehowa, sangulusha mudimu webe munkatshi mua bidimu ebi, munkatshi mua bidimu ebi ûmanyishe kudi bantu; mu njiya yebe uvuluke luse.

³Nzambi wakafuma ku Temena, Wa Tshijila wakafuma ku mukuna wa Palana. Butumbi buandi buakabuikila diulu, buloba buakûla tente ne butumbi buandi.

⁴Kubalakana kuandi kuakadi bu kukenka kua munya, nsasa ya munya yakahatuka mu tshianza tshiandi; munkatshi muai muakadi bukole buandi busokome.

⁵Bihuhu biakaya ku mpala kuandi, biakalonda mu makasa andi kabidi.

⁶Wakimana, wakatangila buloba; wakamona, wakakankisha bisamba bia bantu. Mikuna yakadiku ku tshibangidilu yakahandika; mikuna mikese yakadiku kale yakabatalala; bienzedi biandi bidi bu muakadibi kale.

⁷Nakatangila ntenta ya Kushana mu dikenga; bilulu bikudika bia mu ntenta ya mu buloba bua Midiyana biakazakala.

⁸Yehowa, tshiji tshiebe tshikatema kudi misulu, anyi? Wakadi ne mikuna tshiji, anyi? Njiya yakakukuata bua mai manene, bua wewe kuenda ha nyima ha tubalu tuebe, ne mu makalu ebe a luhandu, anyi?

⁹Wakumusha buta buebe mu tshilaminu tshiebe. Wakahayika mukete ku mulemu. Wakahanda buloba bua misulu ihueke.

¹⁰Mikuna yakakumona, yakadi ne didinyenga; matutu akalokeshisha nvula; ndondo wa mai wakela dî diandi, wakabandisha bianza biandi mulu.

¹¹Diba ne ngondo biakimana mu miaba yakadibi, bualu bua dinkenke dia mikete yebe hakahitayi, bualu bua kukenka kua difuma diebe diakadi dibalakana.

¹²Mu njiya yebe mikole wewe wakahitshila mu buloba, wewe wakadiata bisamba bia bantu mu tshiji tshiebe.

¹³Wakahatuka biebe bua kuhandisha bantu bebe, bua kuhandisha muntu webe muedibue manyi ha mutu; wakatshibula musonga wa nsubu wa bantu babi, mumueneshe bishimikidi biandi hatoke tô ne ku mutu kua tshimanu.

¹⁴Wakasompola mitu ya bena nvita ne mafuma ebe, bakalua bu nvunde bua kuntangadisha. Disanka diabo diakadi bu dia bantu badi basue kumina bahele mu busokoko.

¹⁵Wewe wakadiatshisha tubalu tuebe ha mai manene, ha muenshi wa mai makole.

¹⁶Nakunua malu â, ne mutshima wanyi wakuhampakana, mishiku yanyi yakukanka bua tshiona atshi. Mifuba yanyi yakuvingutuka, nakuzakala mu muaba unakuimana; ndi ne bua kuindila dituku dia ntatu, muhuwe talalâ; tô ne haluadi kudi bantu badi batukengesha.

¹⁷Bikala mutshi wa nfigi kauyi usampila ntonga, hikalaku kakuyi tumuma ku mionshi ya nyinyo; biahanga mutshi wa olive kukuama, biahanga madimi kulua bia kudia; bikala mikoko ya mu luhangu kayiyiku, ne bikalaku kakuyi bimuna mu mpangu yabi;

¹⁸kadi meme hanyi nensanke mu Yehowa, nentumbile mu Nzambi wa luhandu luanyi.

¹⁹Yehowa, Mukelenge mene, udi bukole buanyi; udi uvuisha makasa anyi bu mikono ya ngulungu, udi ungendesha ha mutu ha mikuna yanyi mile. Kudi mulombodi wa bimbi ba misamba: ne biombelu.