Read tshiluba Zekâya 6 Bible Online

Zekâya 6 - tshiluba bible

Zekâya 6

¹Nakabanduluka kabidi, nakatengila, ekumona! Makalu a nvita anai akadi afuma hankatshi ha mikuna ibidi; mikuna ei yakadi mikuna ya tshiamu tshia mitaku.

²Ku dikalu dia kumudilu kuakadi tubalu tukunze; ku dikalu dibidi kuakadi tubalu tufike;

³ku dikalu disatu kuakadi tubalu tutoke; ku dikalu dinai kuakadi tubalu tutokoloke tuakadi ne matoba.

⁴Nunku nakebesha muanjelo wakadi uyikila nʼanyi ne, Ebi mbinganyi, mukelenge wanyi?

⁵Muanjelo wakangandamuna ne, Ebi bidi makalu adi aya ku mpehele mai ya diulu mimane kudimuenesha ku mpala kua Mukelenge wa buloba bujima.

⁶Dikalu didi ne tubalu tufike didi diya ku buloba bua ku nôde; tutoke tudi tuya ku buloba bia ku wesete; tudi ne matoba tudi tuya ku buloba bua ku sude.

⁷Tubala tua lubilu lukole tuakaluhuka, tuakakeba kutambakana ha buloba. Yeye wakamba ne, Yai bienu, tambakanai ha buloba. Nunku tuakatambakana ha buloba.

⁸Hashishe, yeye wakatuela dî ne, Tangila, tudi tuya ku buloba bua ku nôde tuakuholesha mutshima wanyi mu buloba bua ku nôde.

⁹Dî dia Yehowa diakalua kundi ne,

¹⁰Angata bintu bidibo bafila kudi bantu aba bakadi mu buhika, Heledai, Tobiya ne Yedaya mene; dituku adi mene, wewe muine, ya ku nsubu wa Yoshiya, muana wa Selanya, kuakatulabo hakafumabo ku Babulona.

¹¹Eyo, angata argent ne or kudibo, wifule bifulu bia butumbi, ubiase ku mutu kua Yoshua, muana wa Yehosadaka, muakuidi mimene.

¹²Umuambile ne, Yehowa wa misumba udi wamba dî edi ne, Monai, muntu udi ne dina dia Lutonga; neadiunde mu muaba wandi, nease ntempelo wa Yehowa.

¹³Yeye mene nease ntempelo wa Yehowa, neikale ne butumbi, neashikame mu nkuasa wandi wa bukelenge, neakokeshemu; neikale muakuidi mu nkuasa wandi wa butumbi; midimu ei ibidi neyikuatshishangane.

¹⁴Bifulu ebi bia bukelenge nebikale kudi Heledai ne kudi Tobiya ne kudi Yedaya ne kudi Yoshiya, muana wa Sefanya, bu tshivulukidi mu ntempelo wa Yehowa.

¹⁵Bantu badi kule nebalue, nebenze mudimu wa kuasa ntempelo wa Yehowa, nenumanye ne, Yehowa wa misumba wakuntuma kunudi. Muanda eu neulue nunku, binuananukila kutumikila dî dia Yehowa Nzambi wenu.