Read tshiluba Matayo 13 Bible Online

Matayo 13 - tshiluba bible

Matayo 13

¹Dituku adi Yesu wakaluhuka mu nsubu, wakashikama ku muelelu wa dishiba.

²Bisumbu binene bia bantu biakamunguila, nunku yeye wakabuela mu buatu, wakashikama; bantu bonso bakimana ku muelelu wa mai.

³Yeye wakabambila malu a bungi mu nsumuinu ne, Mumiaminyi wakaya bua kumiamina maminu;

⁴hakadiye umiamina, maminu makuabo akamata kukala kua nshila, nyunyu yakalua, yakâzokola;

⁵makuabo akamata ha buloba buakadi ha mutu ha mabue, kâkadihu ne buloba bua bungi; tshituha tshihi akatoloka bua kâkadi ne buloba bule;

⁶hakabanda diba, akababuka, akafubidila bualu bua kâkadi ne miji.

⁷Makuabo akamata mu mionshi ya meba; mionshi yakadiunda, yakânye-ngela:

⁸makuabo akamata ha buloba buimpe, akavudisha maminu; makuabo lukama lukama, makuabo makumi asambombo asambombo, makuabo makumi asatu asatu.

⁹Udi ne matshu unvue biandi.

¹⁰Bayidi bakalua, bakamukonka ne, Udi ubambidila malu mu nsumuinu tshinyi?

¹¹Yeye wakabandamuna ne, Bakanuha bienu lungenyi lua kumanya malu a bukelenge bua mu diulu adi masokoka, kadi kabakabahalu.

¹²Bualu bua muntu yonso udi ne bintu, nebamuhe binga, neikale ne bia bungi; kadi muntu yonso udi kai ne tshintu, nebamunyenge tshidiye nʼatshi.

¹³Ebu budi bualu bundi mbambila malu mu nsumuinu; bua kumona badi bamona kadi kabena bamona bimpe; kunvua badi bunvua kadi kabena bunvua bimpe, kabena bajingulula bualu.

¹⁴Bobo bakushikisha mayisha a muprofete Yeshaya akambeye ne, Kunyua nenunvue, kanuena bamanye; kumona nenumone, Kanuena numone bimpe;

¹⁵Mitshima ya bantu aba yakulua manyi a bungi, Badi mpudi matshu, Bakubikila mesu abo; Nunku kabamonyi ne mesu abo, Kabunvu ne matshu abo, Kabamanyi mu mitshima yabo. Kabakudimunyi mitshima yabo Bua meme mbondahe.

¹⁶Kadi mesu enu adi ne disanka, bua adi amona; matshu enu adi ne disanka kabidi, bua adi unvua

¹⁷Bulelela, ndi nuambila ne, Baprofete ba bungi ne bantu bakane bakajinga kumona malu anudi numona, kabakâmona; bakajinga kunyua malu anudi nunyua, kabakaunvua.

¹⁸Nunku unvuai bualu bua lusumuinu lua mumiaminyi.

¹⁹Hunvua muntu dî dia bukelenge bua mu diulu kai mudijingile, hashishe, mubi udi ulua, udi unyenga bualu buakumiaminabo mu mutshima wandi. Kayeyʼeu wakumiaminabo kukala kua nshila.

²⁰Yeye wakadi mumiamina ha buloba buakadi ha mutu ha mabue udi unvua dî dia Nzambi, udi uditabusha lubilu ne disanka;

²¹kadi yeye kena ne muji munda muandi, udi ushala tshituha tshihi; halua dikenga anyi lutatu bualu bua dî dia Nzambi, yeye udi ulenduka lubilu.

²²Yeye wakadi mumiamina mu mionshi ya meba udi unvua dî dia Nzambi, kadi meshi a malu a ha buloba ne mashimi a biuma bidi binyengela dî, yeye udi wikala kai ne maminu.

²³Yeye wakadi mumiamina ha buloba buimpe udi unvua dî dia Nzambi, udi udijingulula; yeye mene udi uvudisha maminu; manga adi avulangana lukama lukama, manga makumi asambombo asambombo, manga makumi asatu asatu.

²⁴Yeye wakabelela lusumuinu lukuabo ne, Bukelenge bua mu diulu budi bu muntu wakela biandi maminu mimpe mu budimi buandi;

²⁵kadi hakadi bantu balale tulu, wakadi nʼandi lukuna wakalua, wakela ntete ya luhela muakamanabo kuela mponda, wakaya biandi.

²⁶Kadi hakatolokabi, hakatoyabi, luhela luakamueneka.

²⁷Bahika ba muena budimi bakalua, bakamukonka ne, Mukelenge, wewe kuakuela maminu mimpe mu budimi buebe, anyi? Budi ne luhela munyi?

²⁸Yeye wakabambila ne, Muntu udi nʼanyi lukuna nguakuenza bualu ebu. Bahika bandi bakamukonka ne, Udi musue tuye kusunguila luhela, anyi?

²⁹Yeye wakamba ne, Nasha! Bualu bua hanuikala usungulula luhela, nenutule mponda hohamue.

³⁰Bubidi buabi bidiunde hohamue tô ne halua dia kunowa; halua dia kunowa, nengambile banowi ne, Diambedi nusungulule luhela nulusuike mu bisumbu bua kuluosha; hadi nusangishe mponda mu diyeba dianyi.

³¹Yeye wakabelela lusumuinu lukuabo ne, Bukelenge bua mu diulu budi bu lutete lua mutada luakangata muntu bua kukuna mu budimi buandi;

³²ludi lutamba ntete yonso bukese; kadi hadiundalu, ludi lutamba midioko yonso bunene, ludi ludiunda mutshi munene, nyunyu ya mulu idi ilua kuikila ha matamba au.

³³Yeye wakabelela lusumuinu lukuabo ne, Bukelenge bua mu diulu budi bu luevene luakangata mukashi, wakalusokoka mu bihikilu bisatu bia bukula tô ne hakenduluka luevene mu bukula buonso.

³⁴Yesu wakambila bantu malu â onso mu nsumuinu, yeye kakabambila malu tshianana, anu mu nsumuinu;

³⁵bua dî diakambabo kudi muprofete dishikishibue ne, Hanabulula mukana muanyi, nengambe mei mu nsumuinu; Nengambe malu akadi masokoka ku tshibangidilu tshia buloba tô ne katataka.

³⁶Hashishe, Yesu wakashîa bisumbu bia bantu ku nyima, wakabuela mu nsubu; bayidi bandi bakalua kudiye, bakamuambila ne, Utujinguluile lusumuinu lua luhela luakadi mu budimi.

³⁷Yeye wakandamuna ne, Udi ukuna maminu mimpe udi Muana wa muntu;

³⁸budimi budi bantu ba ha buloba; maminu mimpe adi bana ba mu bukelenge bua Nzambi, ntete ya luhela idi bana ba mubi;

³⁹muena lukuna wakaikuna ndiabolo; dituku dia kunowa nkunshikidilu kua tshikondo etshi; banowi mbanjelo.

⁴⁰Bu mudi bantu basangisha luhela bua kuluosha, bualu nebuikale nunku kunshikidilu kua tshikondo etshi.

⁴¹Muana wa muntu neatume banjelo bandi, nebasungule mu bukelenge buandi benji ba malu mabi ne bintu bionso bidi bilenduisha bantu,

⁴²nebabiele mu tshikutu tshia kahia; muadi newikalemu ne kusumakana menu,

⁴³Dituku diadia bantu bakane nebakenke bu diba mu bukelenge bua Tatu wabo. Udi ne matshu unvue biandi.

⁴⁴Bukelenge bua mu diulu kabidi budi bu biuma biakadi bisokoka mu budimi; hakabisangana muntu, yeye wakabisokoka kabidi; mu disanka diandi, wakaya, wakahana bintu biandi bionso, wakasumba budimi abu.

⁴⁵Bukelenge bua mu diulu kabidi budi bu muntu udi biandi muendi wa mushinga, udi ukeba mabue mimpe a mushinga mukole;

⁴⁶hakasanganeye dibue dia mushinga mutambe bukole, wakaya, wakahana bintu biandi bionso, wakadisumba.

⁴⁷Bukelenge bua mu diulu kabidi budi bu kahamba kakadi kela mu dishiha, kakakungisha mishiha ya mishindu yonso;

⁴⁸hakûla kahamba tente, bakakakoka ku mpata; bakashikama, bakasangisha biakadi bimpe mu bihanza, bakimasha biakadi bibi.

⁴⁹Bualu nebuikale nunku kunshikidilu kua tshikondo etshi; banjelo nebalue, nebumushe bantu babi bakadi munkatshi mua bantu bakane,

⁵⁰nebabele mu tshikutu tshia kahia, muadi newikalemu ne kusumakana menu.

⁵¹Yesu wakabakonka ne, Nuakunyua malu â onso, anyi? Bakamuitaba ne, E.

⁵²Yeye wakabambila ne, Mufundi yonso wakuvui-shabo muyidi mu bukelenge bua mu diulu udi bu muena nsubu udi uhatula bintu bihia-bihia ne bikulukulu mu tshibutshilu tshiandi.

⁵³Hakashikisha Yesu nsumuinu ei, wakumukaku.

⁵⁴Hakayeye mu luseke luandi, wakayisha bantu mu nsunagoga wabo, nunku bakakema ne, Muntu eu wakangata lungenyi elu ne malu â a kukema kudi kunyi?

⁵⁵Yeye kena muana wa muena mabaya, anyi? Kabena babikila mamuʼandi ne, Malia, anyi? Bana babo ba balume Yakobo ne Yosefe ne Simona ne Yuda;

⁵⁶ne bana babo ba bakashi, kabena munkatshi muetu, buonso buabo, anyi? Nunku muntu eu wakangata malu â onso kudi kunyi?

⁵⁷Bakalenduka bua bualu buandi. Kadi Yesu wakabambila ne, Muprofete udi ne butumbi mu miaba yonso, kadi kena nʼabu ku luseke luabo ne mu nsubu wandi.

⁵⁸Yeye kakenzamu malu a kukema a bungi bualu bua buhidia buabo.