Read tshiluba Matayo 14 Bible Online

Matayo 14 - tshiluba bible

Matayo 14

¹Mu matuku au muloho Helede wakunvua lumu lua Yesu,

²wakambila bantu bandi ne, Au nYone Mubanji, wakubika ku lufu, bua bualu ebu malu a kukema adi enjibua kudiye.

³Helode wakamana kukuata Yone, wakamusuika, wakamubuesha mu nsubu wa lukanu bualu bua Helodia, mukashi wa muanʼabo Filipo.

⁴Bualu bua Yone wakamuambila ne, Kambiakane bua wewe wikale nʼandi.

⁵Hakasua Helode kumushiha, yeye wakatshina bantu, bualu bua bobo bakamubala bu muprofete.

⁶Kadi hakafikila dituku dia kuledibua kua Helode, muana mukashi wa Helodia wakadi uja maja ku mpala kuabo, wakasankisha mutshima wa Helode.

⁷Yeye wakaditshiha, wakamulaya ne, Nenkuhe tshionso tshiwalomba.

⁸Muana mukashi muenzesha kudi mamuʼandi wakambila Helode ne, Umpe mutu wa Yone Mubanji ha dilonga.

⁹Mutshima wa mukelenge wakanyingalala; kadi bualu bua mitshihu yandi ne bua bakadi badia nʼandi bidia yeye wakamba ne, Bamuheu.

¹⁰Yeye wakatuma dî, wakakosesha Yone mutu mu nsubu wa lukanu.

¹¹Bakalua ne mutu wandi ha dilonga, bakauha nsongakashi; ne yeye wakalua nʼau kudi mamuʼandi.

¹²Bayidi ba Yone bakalua bakambula tshitalu tshiandi, bakatshijika, bakaya kumanyisha Yesu.

¹³Hakunvua Yesu bualu bua lufu lua Yone, wakumukaku mu buatu, wakaya mu tshihela mu muaba muhengame; hakunvua bisumbu bia bantu bualu abu, bakumuka mu misoko, bakamulonda ku makasa.

¹⁴Yeye wakumuka mu buatu, wakatangila tshisumbu tshinene tshia bantu, wakadi nʼabo luse, wakakolesha bahedi babo.

¹⁵Hakamba diba kuhueka, bayidi bandi bakalua kudiye, bakamba ne, Muaba eu udi tshihela, diba diakumana kuya, utume bisumbu bia bantu, baye mu misoko mikese bua kudisumbila bia kudia.

¹⁶Kadi Yesu wakabambila ne, Kabena ne bualu bua kuya, nuenu nubahe bia kudia.

¹⁷Bakamuambila ne, Tudi ne mitanda ya bidia anu itanu ne mishiha ibidi.

¹⁸Yeye wakamba ne, Nulue nʼabi kundi.

¹⁹Wakambila bisumbu bia bantu ne, Shikamai ha mashinde; wakamema mitanda itanu ne mishiha ibidi; hakatangileye mulu, wakatendelela Nzambi, wakabitshibiha, wakabifila mu bianza bia bayidi, bayidi bakaha bisumbu bia bantu.

²⁰Buonso buabo bakadia, bakûkuta; bakangula bihesa bia bidia biakushala bisaka dikumi ne bibidi biule tente.

²¹Bantu bonso bakadia bakadi balume binunu bitanu, ne bakashi ne bana.

²²Yesu wakabuesha bayidi bandi mu buatu lubilu, badianjile dishia ku mpala kuandi, yeye ashale kutuma bisumbu bia bantu kuabo.

²³Hakatumeye bisumbu bia bantu kuabo, wakaya mu mukuna nkayandi bua kutendelela Nzambi; hakabuela diba yeye wakadimu nkayandi.

²⁴Kadi buatu buakadi mu bunene bua dishiba, butatshisha kudi mavuala, bualu bua tshihehele tshiakadi tshibuhingisha.

²⁵Hakadi diba bu ha inai hatshiatshia, Yesu wakalua kudibo, wenda ha mutu ha mai.

²⁶Hakamumona bayidi bandi wenda ha mutu ha mai, bakatshina, bakamba ne, Mukishi; buowa buakabakuata, bakahandalala.

²⁷Kadi Yesu wakabambila ne, Nukoleshe mitshima yenu; nmeme, kanutshinyi.

²⁸Petelo wakamuebesha ne, Biwikala wewe, ungambile bua meme kulua kûdi ha mutu ha mai.

²⁹Yeye wakamba ne, Lua. Petelo wakahatuka mu buatu, wakenda ha mutu ha mai bua kuya kudi Yesu.

³⁰Kadi hakamoneye tshihehele, wakatshina; hakabangeye kudina mu mai, wakadila ne, Mukelenge, unsungile.

³¹Yesu wakolola tshianza lukasa, wakamukuata, wakamuambila ne, Wewe udi ne ditabusha dikese, wakuelela mpata munda tshinyi?

³²Hakabandabo mu buatu, tshihehele tshiakahatama.

³³Bakadi mu buatu bakamukukuila, bakamba ne, Bulelela, wewe udi Muana wa Nzambi.

³⁴Hakasabukabo, bakaya ha mpata, ku buloba bua Genesaleta.

³⁵Hakamumanya bantu ba ku muaba au, bakatuma dî ku luseke alu luonso, bakahia ne bena mabedi bonso kudiye;

³⁶bakamutendekena bua kulengabo ku mubangu wa tshivualu tshiandi; bakalenga mbobo bakakoleshibua.