Read tshiluba Matayo 20 Bible Online

Matayo 20 - tshiluba bible

Matayo 20

¹Bukelenge bua mu diulu budi bu muena budimi, wakaya dinda bua kukeba bena mudimu bua kumudimina budimi buandi bua mamuma a nvinyo.

²Yeye wakasangisha nʼabo dî bua kubafuta muntu ndenalio umue muntu ndenalio umue ku dituku ku dituku, wakabatuma mu budimi buandi.

³Yeye wakaya kabidi, hakafika diba ha tshitema, wakamona bakuabo bimane tshianana mu tshisalu;

⁴yeye wakabambila ne, Yai bienu kabidi mu budimi, nenuhe tshidi tshiakane. Bakaya.

⁵Hakafika diba ha dikumi ne ibidi, wakaya kabidi; ne bakafika diba ha isatu, Wakenza muomumue.

⁶Hakafika diba ha itanu, wakaya biandi, wakasangana bantu bakuabo bimane; wakabakonka ne, Nuenu nudi nuimanyina aha diba dionso tshianana tshinyi?

⁷Bakamuambila ne, Bualu bua muntu kena mutubueshe ku mudimu. Yeye wakabambila ne, Nuenu kabidi nuye mu budimi.

⁸Hakamba diba kubuela, muena budimi wakambila mulami wa bintu biandi ne, Bikila bena mudimu, ubahe difutu diabo, uhangile kudi ba kunshikidilu tô ne kudi ba diambedi.

⁹Hakalua bena diba ha itanu, bakangata ndenalio umue.

¹⁰Hakalua ba diambedi, bakelangana meshi ne, Tuetu netuangate bintu bikuabo ha mutu; kadi bobo kabidi bakangata ndenalio umue.

¹¹Hakangatabo difutu diabo, bakajiana muena budimi ne,

¹²Aba ba kunshikidilu bakakuata mudimu anu tshituha tshimue tshia diba, wewe wakubenda muomumue nʼetu, tuetu bakusala mudimu dituku dijima mu munya mukole.

¹³Yeye wakandamuna umue wabo ne, Mulunda wanyi, tshiena nkuenzela bibi; wewe kuakusangisha nʼanyi dî bua ndenalio umue, anyi?

¹⁴Angata tshidi tshiebe, uye biebe; mutshima wanyi udi musue kuha eu wa kunshikidilu bu mundi nkuha wewe.

¹⁵Tshiena mumanye mua kuenza ne bintu bianyi bu mundi musue, anyi? Disu diebe didi dibi bualu bua meme ndi muimpe, anyi?

¹⁶Nunku ba kunshikidilu nebikale ba diambedi, ba diambedi nebikale ba kunshikidilu.

¹⁷Yesu wakadi ubanda ku Yelushalema, mu nshila yeye wakangata bayidi bandi nkayabo, wakabambila ne,

¹⁸Unvuai, tudi tubanda ku Yelushalema; nebafile Muana wa muntu mu bianza bia bakuidi banene ba Nzambi ne bia bafundi; bobo nebamuhishe ne lufu,

¹⁹nebamufile mu bianza bia bantu ba mu bisamba bia bende, bamuseke, bamukume, bamushihe ku mutshi mutshiamakane; kadi hahita matuku asatu yeye neabishibue.

²⁰Hashishe, mamu wa bana ba Zebedayo wakalua ne bana bandi kudiye, wakamukukuila, wakamulomba bualu.

²¹Yesu wakamukonka ne, Udi musue tshinyi? Yeye wakamba ne, Wele mukenshi wa bana banyi aba babidi kushikamabo, mukuabo ku tshianza tshiebe tshia balume, mukuabo ku tshianza tshiebe tshia bakashi, mu bukelenge buebe.

²²Yesu wakandamuna ne, Kanuena bamanye tshinudi nulomba. Nudi bamanye mua kunua luhanza lunkadi ha kunua, anyi? Bakamuitaba ne, Tudi bamanye.

²³Yeye wakabambila ne, Nenunue luhanza luanyi bulelela; kadi kushikama ku tshianza tshianyi tshia balume ne ku tshianza tshianyi tshia bakashi kambualu buanyi bua kuha muntu; kushikama nunku kudi bualu bua bantu bakabulongoluelabo kudi Tatu wanyi.

²⁴Hakunvua bayidi dikumi bualu ebu, bakadi ne bena kuabo babidi tshishi.

²⁵Kadi Yesu wakababikila, wakabambila ne, Nudi bamanye ne, Banfumu ba bisamba bia bende badi babalongolola ne diambu, bantu babo badi banene badi babakokesha.

²⁶Bualu buenu kabuena nunku; wasua kulua munene munkatshi muenu neikale muena mudimu wenu;

²⁷wasua kuikala ha mutu henu neikale muhika wenu;

²⁸nunku kabidi Muana wa muntu kakuluila bua bantu bamukuatshile mudimu, wakuluila bua kubakuatshila mudimu ne bua kufila muoyo wandi bua kuhikula nʼau bantu ba bungi.

²⁹Hakadibo baluhuka mu Yeleko, bantu ba bungi bakamulonda.

³⁰Balume babidi bafofo bakadi bashikame kukala kua nshila; hakunvuabo ne, Udi uhita nYesu, bakela mbila ne, Mukelenge, muana wa Davidi, utufue luse.

³¹Bantu bakabakanda ne, Huai; kadi bobo bakatamba kuela mbila ne, Mukelenge, muana wa Davidi, utufue luse.

³²Yesu wakimana, wakababikila, wakabakonka ne, Nudi basue meme nuenzele tshinyi?

³³Bakamuambila ne, Mukelenge, mesu etu atabale.

³⁴Luse luakakuata Yesu, wakabalenga ha mesu abo; bakatabala lukasa, bakamulonda.