Read tshiluba Matayo 21 Bible Online

Matayo 21 - tshiluba bible

Matayo 21

¹Hakafikabo ha buihi ne Yelushalema ku Bete-fage, ku Mukuna wa Oleve, Yesu wakatuma bayidi bandi babidi,

²wakabambila ne, Yai mu musoko udi buludiludi bunudi batangile, nenumone nyama wa mpunda musuika ne muanʼandi. Nuisulule, nulue nʼai kunoko.

³Bianukonka muntu dî, numuambile ne, Mukelenge udi nʼai bualu; yeye neaitume lubilu.

⁴Bualu ebu buakulua bua kushikisha dî diakambabo kudi muprofete ne,

⁵Nuambile muana mukashi wa Siona ne, Monai, Mukelenge webe ulualua kûdi, Udi ne kalolo, udi wenda ha nyima ha nyama wa mpunda.

⁶Bayidi bakaya, bakenza bu muakabambila Yesu,

⁷bakalua ne nyama wa mpunda ne muana, bakateka bivualu biabo ha nyima hai; Yesu wakashikama ha mutu habi.

⁸Bantu ba bungi ba mu tshisumbu bakâdisha bivualu biabo mu nshila; bakuabo bakakosa bisala bia mitshi, bakabiadisha mu nshila.

⁹Bisumbu bia bantu bakadi baya ku mpala kuandi ne bakadi bamulonda ku nyima bakela mbila ne, Hosana ikale kudi muana wa Davidi; udi ulua mu dina dia Mukelenge atumbishibue; Hosana mu diulu.

¹⁰Hakabueleye mu Yelushalema, bantu bonso ba mu musoko bakakema, bakakonka ne, Eu nganyi?

¹¹Bantu ba mu bisumbu bakamba ne, Eu mmuprofete Yesu, wa ku Nazaleta wa Galela.

¹²Yesu wakabuela mu ntempelo wa Nzambi, wakihata bonso bakadi bahana bintu ne bakadi basumba bintu mu ntempelo, wakatonkola mesa a bashintakashi ba mpalata[8] ne nkuasa ya basumbishi ba nyunyu ya nkutshi;

¹³yeye wakabambila ne, Bakafunda ma Mukanda wa Nzambi ne, Nebabikile nsubu wanyi ne, Nsubu wa kutendelelamu Nzambi, kadi nuenu nuakumuvuisha bu muaba wa banyengi.

¹⁴Bafofo ne balema bakalua kudiye mu ntempelo, yeye wakabakolesha.

¹⁵Kadi hakamona bakuidi banene ba Nzambi ne bafundi malu a kukema akenzeye, hakamonabo kabidi bana bakadi bela mbila mu ntempelo ne, Hosana ikale kudi muana wa Davidi, bakadi ne tshishi,

¹⁶bakamukonka ne, Udi unvua mei adi bana aba bamba, anyi? Yesu wakabambila ne, E, udi ngunvua, kadi nuenu kanuakubala dî ne, Wewe wakajadika butumbi buebe mukana mua bana bakese ne mua badi bâmua mabele?

¹⁷Yeye wakabashia, wakaluhuka mu musoko, wakaya ku Betania, wakalalaku.

¹⁸Hakadiye uhingana mu musoko dinda, wakadi ne nsala.

¹⁹Hakamoneye mutshi wa nfigi kukala kua nshila, wakaluaku, wakasangana mutshi mutuhu, anu mabeshi; yeye wakambila mutshi ne, Wewe kukuami mamuma tshiendelele. Mutshi wa nfigi wakafuba lukasa.

²⁰Hakamona bayidi bandi bualu ebu, bakakema ne, Mutshi wa nfigi wakafuba lubilu nunku munyi?

²¹Yesu wakandamuna ne, Bulelela, ndi nuambila ne, Binuikala ne ditabusha, kanui ne mpata, nenuenze bu muakuenzelabo mutshi wa nfigi; ne bualu bukuabo kabidi, binuambila mukuna eu ne, Ubishibue, wedibue mu mai manene, bualu nebulue bu munuakuamba.

²²Binuitabusha, nenuangate bintu bionso binualomba mu kutendelela kuenu.

²³Hakabuela Yesu mu ntempelo, bakuidi banene ba Nzambi ne bakulu ba bantu bakatua kudiye, hakadiye uyisha bantu, bakamukonka ne, Wewe udi wenza malu â ne bukokeshi kai? Wakukuha bukokeshi ebu nganyi?

²⁴Yesu wakabandamuna ne, Meme kabidi nenukonke bualu bumue; binuangambila bualu ebu, nenuambile bualu bua bukokeshi bundi ngenza nʼabu malu â.

²⁵Dibatiza dia Yone diakafuma kudi kunyi? Mu diulu, anyi kudi bantu? Bobo bakelangana meshi munda munda ne, Bituamba ne, Mu diulu, yeye neatuebeshe ne, Bualu kai kanuakamuitabusha?

²⁶Kadi bituamba ne, Kudi bantu, tudi tutshina bantu; bualu bua bantu bonso badi bitabusha Yone ne, Udi muprofete.

²⁷Bakakudimuna Yesu di ne, Katuena bamanye. Yeye wakabambila ne, Meme kabidi tshiena nuambila bualu bua bukokeshi bundi ngenza nʼabu malu â.

²⁸Nudi nuamba tshinyi? Muntu wakadi ne bana balume balela babidi; wakalua kudi wa kumudilu, wakamba ne, Muanʼanyi, ya biebe lelu wenze mudimu mu budimi bua mamuma a nvinyo.

²⁹Yeye wakandamuna ne, Tshiena musue; kadi ku nyima yeye wakakudimuna mutshima wandi, wakaya.

³⁰Tatu wabo wakalua kudi wa ku nyima, wakamuambila muomumue. Yeye wakandamuna ne, Nenye, tatu, kadi yeye kakaya.

³¹Bubidi buabo, muana kai wakenza bu muakamba tatu wandi? Bakandamuna ne, Wa kumudilu. Yesu wakabambila ne, Bulelela, ndi nuambila ne, Basangishi ba mulambu ne bakashi ba masandi badi badianjila kubuela mu bukelenge bua Nzambi ku mpala kuenu.

³²Yone wakalua kunudi mu nshila wa buakane, kanuakamuitabusha; kadi basangishi ba mulambu ne bakashi ba masandi bakamuitabusha. Hanuakatangila bualu abu, kanuakakudimuna mitshima yenu ku nyima bualu bua kumuitabusha.

³³Unvuai lusumuinu lukuabo: Muena budimi wakadiku, wakatentula mionshi ya mamuma a nvinyo mu budimi buandi, wakelela budimi luhangu lua mitshi idi isasa, wakimbamu dina dia kukamina mamuma, wakasa nsubu wa batentekedi mule, wakabushia mu bianza bia ba bidime, wakaya biandi ku luseke lukuabo kule.

³⁴Hakalua tshidimu tshia mamuma ha buihi, yeye wakatuma bantu bandi kudi ba bidime bua kuangata mamuma andi.

³⁵Kadi ba bidime bakakuata bantu bandi, bakakuma mukuabo, bakashiha mukuabo, munga bakakuma ne mabue.

³⁶Wakatuma kabidi banga bantu bandi batambe ba diambedi; ba bidime bakabenzela muomumue.

³⁷Hashishe, wakabatumina muanʼandi, wakamba ne, Nebanemeke muanʼanyi.

³⁸Kadi ba bidime, hakamonabo muana, bakambilangana ne, Eu udi muhianyi; tuyai kumushiha, netuangate buhianyi buandi.

³⁹Bakamukuata, bakamumusha mu budimi, bakamushiha.

⁴⁰Halua umena budimi, nenzele ba bidime aba tshinyi?

⁴¹Bobo bakamba ne, Yeye neashihe bantu aba babi, neashie budimi buandi mu bianza bia binga bidime, nebifile mamuma mu bianza biandi halua bidimu biau.

⁴²Yesu wakabakonka ne, Kanuena banze kubala mu Mukanda wa Nzambi anyi, ne, Dibue diakahidiabo kudi bibaki ba nsubu Bakaditeka ku mutu kua ditumba; Eu mudimu wa Mukelenge, Udi bu bualu bua kukema ku mesu kuetu?

⁴³Ndi nuambila ne, Nebanunyenge bukelenge bua Nzambi, nebabuhe tshisamba tshidi tshikuama mamuma abu.

⁴⁴Wahona ha dibue edi neatshibuke; biahonenadi muntu, nedimutangadishe bu luhuishi.

⁴⁵Hakunvua bakuidi banene ba Nzambi ne bafalese nsumuinu yandi, bakamanya ne, Yeye udi utuamba tuetu.

⁴⁶Hakasuabo kumukuata, bakatshina bantu, bualu bua bobo bakamuitabusha ne, Udi muprofete.