Read tshiluba Matayo 22 Bible Online

Matayo 22 - tshiluba bible

Matayo 22

¹Yesu wakabandamuna, wakabelela nsumuinu kabidi, wakamba ne,

²Bukelenge bua mu diulu budi bu mukelenge wakalambishila muanʼandi bidia bia dibanji;

³wakatuma bantu bandi bua kubikila bakalayileye diambedi bua disanka dia dibanji; bakahidia kulua.

⁴Yeye wakatuma bantu bandi bakuabo kabidi ne, Nuambile bantu banakalayila diambedi ne, Nakulongolola bidia, ngombe yanyi idi mishiha ne bana ba ngombe ba manyi, bintu, bionso biakuhua, luai ku disanka dia dibanji.

⁵Kadi bobo bakalengulula di diandi, bakaya ku malu abo, mukuabo ku budimi buandi, mukuabo ku kuenda mushinga;

⁶banga bakakuata bantu ba mukelenge, bakabenzela bibi, bakabashiha.

⁷Mukelenge wakadi ne tshishi, wakatuma masalayi andi, wakashiha batahianganyi aba, wakosha musoko wabo.

⁸Hashishe, yeye wakambila bantu bandi ne, Bintu bia dibanji bidi bilongolola, kadi bantu banakulayila kabena bimpe.

⁹Yai bienu mu masanga a misesu, nubikile banuamona ku disanka dia dibanji.

¹⁰Bantu bandi bakaya mu misesu, bakasangisha bantu bonso bakamonabo, babi ne bimpe; mu nsubu wa disanka dia dibanji muakadi benyi tente.

¹¹Kadi hakabuela mukelenge bua kumona benyi, wakamonamu muntu wakadi kai ne tshilulu tshia dibanji.

¹²Mukelenge wakamukonka ne, Ka, mulunda, wakubuela munomo, kui ne tshilulu tshia dibanji? Muntu wakahua.

¹³Mukelenge wakambila bantu bandi ne, Numusuike ku bianza ne ku makasa, numuimashe ha bula mu midima. Muadi newikalemu ne kusumakana menu.

¹⁴Bualu bua bantu ba bungi badi babikidibua, kadi banya-banya badi basungudibua.

¹⁵Hashishe, Bafalese bakaya, bakasangisha mei abo ne, Netumukuate ku mei andi munyi?

¹⁶Bakatuma bayidi babo kudiye ne Bena Helode, bakamuambila ne, Muyishi, tudi bamanye ne, Wewe udi muena bushua, udi uyisha bantu nshila wa Nzambi bulelela, wewe kuena utshina bantu, bualu bua kuena ne bualu ne muntu;

¹⁷utuambile mûdi wamba munda muebe: Mbimpe kuha Kaisa mulambu, anyi?

¹⁸Kadi Yesu wakamanya budimu buabo, wakabakonka ne, Nuenu bena lubombo, nudi nuntetshila munda tshinyi?

¹⁹Nundeshe tshidibo balambula nʼatshi. Bakalua ne ndenalio.

²⁰Yeye wakabakonka ne, Tshindidimbi etshi ne mei â adi mafundahu mbia nganyi?

²¹Bakamuambila ne, Mbia Kaisa. Yeye wakabambila ne, Nuhe Kaisa bintu bia Kaisa, nuhe Nzambi bintu bia Nzambi.

²²Hakunvuabo dî edi, bakakema, bakamushîa, bakaya.

²³Dituku adi Basadoke bakalua kudi Yesu, badi bamba ne, Dibika dia ku lufu kadienaku; bakamukonka ne,

²⁴Muyishi, Mose wakamba ne, Biafua mulume, kai ne bana, muanʼabo abake mukashi wandi, alelele muanʼabo wakufua bana.

²⁵Munkatshi muetu muakadi balume muanda mutekete ba difu dimue; wa kumudilu wakabaka mukashi, wakafua biandi, kakadi ne bana, wakashîa mukashi wandi mu bianza bia muanʼabo;

²⁶muibidi wakadi nʼandi nunku, ne muisatu tô ne wa muanda mutekete.

²⁷Hakafua buonso buabo, mukashi wakafua.

²⁸Balume bakadi muanda mutekete; yeye neikale mukashi wa mulume kai, halua dibika dia ku lufu? Bualu bua bakadi nʼandi buonso buabo.

²⁹Kadi Yesu wakabandamuna ne, Nudi nuhambuka, kanuena bamanye Mukanda wa Nzambi ne bukole buandi.

³⁰Halua dibika dia ku lufu, kabena babaka, kabena babakibua, badi bu banjelo ba mu diulu.

³¹Bualu bua dibika dia bafue ku lufu nuenu kanuakabala dî diakanuambila Nzambi, anyi, ne,

³²Ndi bianyi Nzambi wa Abalahama, ne Nzambi wa Isaka, ne Nzambi wa Yakoba? Nzambi kena wa bafue, udi wa badi ne muoyo.

³³Hakunvua bisumbu bia bantu dî edi, diyisha diandi diakabakemesha.

³⁴Hakunvua Bafalese ne, Yesu wakahuisha Basadoke, bakadisangisha hamue.

³⁵Munkatshi muabo muakadi mumanyi wa mikenshi, yeye wakakonka Yesu bua kumuteta munda ne,

³⁶Muyishi, mukenshi kai udi mutambe mikuabo yonso?

³⁷Yesu wakamuambila ne, Sua Mukelenge Nzambi webe ne mutshima webe wonso ne muoyo webe wonso ne lungenyi luebe luonso.

³⁸Ke mukenshi munene, udi wa kumudilu.

³⁹Muibidi udi mufuanangane nʼau ne, Sua mukuenu bu mûdi mudisue.

⁴⁰Mikenshi yonso ya Mose ne mei a baprofete bidi bikudika ku mikenshi ei ibidi.

⁴¹Hakadi Bafalese badisangisha nunku, Yesu wakabakonka ne,

⁴²Nudi nuamba munda muenu ne, Kilisto udi nganyi? Yeye udi muana wa nganyi? Bakamuambila ne, Yeye udi muana wa Davidi.

⁴³Yesu wakabakonka kabidi ne, Davidi udi umubikila mu Nyuma Muimpe ne, Mukelenge, munyi? Wakamba ne,

⁴⁴Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanateka badi nʼebe lukuna munshi mua makasa ebe.

⁴⁵Biamubikila Davidi ne, Mukelenge, yeye udi muanʼandi munyi?

⁴⁶Kakuakadi muntu wakamanya mua kumukudimuna dî, dituku adi tô tshiendelele muntu kakadi ne bukitu bua kumukonka bualu.