Read tshiluba Matayo 23 Bible Online

Matayo 23 - tshiluba bible

Matayo 23

¹Hashishe, Yesu wakambila bisumbu bia bantu ne bayidi bandi ne,

²Bafundi ne Bafalese badi bashikama mu nkuasa wa Mose;

³nuenze, nutumikile malu onso adibo banuambila; kadi kanuenji malu adibo benza; bualu bua bobo batu bamba, kadi kabatu benza.

⁴Bulelela, badi basuika majitu manene, bâteka ha maha a bantu, kabena babakuatshisha ne munu umue.

⁵Badi benza malu abo onso anu bualu bua bantu babamone; badi badiundisha nfulakatelio yabo badi badiundisha mibanga ya bikowelu biabo,

⁶hayabo ku bidia bia disanka, badi basue muaba munene, badi basue nkuasa minene mu nsunagoga,

⁷badi basue bantu babasekelele mu bisalu, badi basue bantu bababikile ne, Labi.

⁸Kadi nuenu kanubikidibu ne, Labi, bualu bua nuenu nudi ne muyishi umue, buonso buenu nudi bana ba muntu umue.

⁹Kanubikidi muntu wa ha buloba ne, Tatu wetu, bualu bua nuenu nudi ne Tatu umue, yeye udi mu diulu.

¹⁰Kanubikidibu ne, Bakelenge, bualu bua mukelenge wenu udi umue, Kilisto mene.

¹¹Udi mutambe bunene munkatshi muenu neikale muena mudimu wenu.

¹²Wadibandisha nebamuhuekeshe, wadihuekesha nebamubandishe.

¹³Nuenu bafundi ne Bafalese, nudi bena lubombo, mulau ulualua kunudi, bualu bua nuenu nudi nuinshidila bantu tshibi tshia bukelenge bua mu diulu; nuenu kanuena nubuelamu, kanuena nuitabusha bua bakuabo badi basue kubuela babuele!

¹⁵Nuenu bafundi ne Bafalese, nudi bena lubombo, mulau ulualua kunudi, bualu bua nuenu nudi nunyunguluka mai manene ne buloba bua kuitabushisha nasha muntu umue bualu buenu; kadi bitabusheye, nudi numuvuisha muana wa mu Ngena munutambe nuenu bubi misangu ibidi!

¹⁶Nuenu balombodi bafofo, mulau ulualua kunudi! Nudi nuamba ne, Muntu udi uditshiha mutshihu ne, Ntempelo, kena musuika, kadi muntu udi uditshiha mutshihu ne, Ngolo wa mu ntempelo, udi musuikibue ku mutshihu wandi.

¹⁷Nuenu nudi bafofo bahote, tshintu kai tshidi tshitambe tshikuabo, ngolo anyi ntempelo ngudi uvuisha ngolo wa tshijila?

¹⁸Biaditshiha muntu mutshihu ne, Tshishihelu, kambualu; kadi biaditshiha muntu mutshihu ne, Tshidi tshifila ha tshishihelu, udi musuikibue ku mutshihu wandi,

¹⁹Nuenu bafofo, tshintu kai tshidi tshitambe tshikuabo, tshidi tshifila anyi tshishihelu tshidi tshivuisha tshidi tshifila tshia tshijila?

²⁰Waditshiha mutshihu kudi tshishihelu udi uditshiha mutshihu kudi tshishihelu ne kudi bintu bionso bidihu.

²¹Waditshiha mutshihu kudi ntempelo udi uditshiha mutshihu kudi ntempelo ne kudi utu wikalamu.

²²Waditshiha mutshihu kudi diulu udi uditshiha mutshihu kudi nkuasa wa Nzambi ne kudi utu washikamahu.

²³Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu nuafila tshia dikumi tshia luenyi, ne tshia tshidibiʼa luenyi, ne tshia tshikote, kadi nuakulekela kuenza malu makole a mikenshi ya Nzambi, bulelela ne luse ne ditabusha; biakadi bimpe bia nuenu kuenza malu â a ku nyima, kambimpe nulengulule mua kuenza malu au a ku mpala kabidi.

²⁴Nuenu balombodi bafofo, nudi numusha kishi kakese mu maluvu, nudi numina kamelu!

²⁵Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu nûvua ha nyima ha luhanza ne dilonga, kadi munda muabi mudi bunyengi ne mudi.

²⁶Wewe Mufalese mufofo, diambedi uvua munda mua luhanza ne dilonga, nunku ha nyima hadi kabidi nehikale hatoke.

²⁷Nuenu bafundi ne Bafalese, nudi bena lubombo, mulau ulualua kunudi! Nudi bu nkita mitokesha ha nyima, ha nyima hadi himpe ku mesu, kadi munda muai mudi mule tente ne mifuba ya bafue ne bukoya bua mishindu yonso.

²⁸Nunku nuenu nudi bakane ku mesu kua bantu, kadi munda muenu mudi mûle tente ne lubombo ne tshishiku.

²⁹Nuenu bafundi ne Bafalese, nudi bena lubombo! Mulau ulualua kunudi; bualu bua nuenu nutu mubaka nkita ya baprofete, nutu nulengesha nkita ya bantu bakane,

³⁰nutu nuamba ne, Bu tuetu bikale mu matuku a bankambua betu, katuakadi kubuelakana nʼabo bua kushiha baprofete.

³¹Nudi nudituisha ne, Tudi bana ba bashihi ba baprofete.

³²Ushai bienu tshihimu tshia bankambua benu ne malu mabi.

³³Nuenu nyoka, ne bana ba nyoka, nudi bamanye mua kuhanduka dihila dia mu Ngena munyi?

³⁴Meme ndi nutumina baprofete ne bena meshi ne bafundi: nuenu nenushihe bakuabo tshianana, bakuabo ha mitshi mitshiamakane; nenukume bakuabo mu nsunagoga yenu, nenubalonde bua kubakengesha ku musoko ne ku musoko;

³⁵nunku mashi onso a bantu bakane akumata hanshi nealue ha bianza bienu, mashi a Ebele muntu muakane tô ne mashi a Zekâya, muana wa Balakia, unuakashihela hankatshi ha ntempelo ne tshishihelu.

³⁶Bulelela, ndi nuambila ne, Malu â onso nealue kudi bantu ba tshikondo etshi.

³⁷Wewe Yelushalema, Yelushalema, udi ushiha baprofete, udi ukuma bakukutuminabo mabue! Misangu ya bungi nakasua kusangisha bana bebe bu mudi nsolo usangisha bana bandi mu mahuahua andi, kadi nuenu nuakuhidia.

³⁸Nsubu wenu udi mushale hatuhu.

³⁹Ndi nuambila ne, Kanuena nuntangila tô ne hanuamba ne, Udi ulua mu dina dia Mukelenge udi ne disanka.