Read tshiluba Matayo 24 Bible Online

Matayo 24 - tshiluba bible

Matayo 24

¹Yesu wakumuka mu ntempelo, wakadi uya mu nshila, bayidi bandi bakalua kudiye bualu bua kumulesha nsubu ya ntempelo.

²Kadi yeye wakabambila ne, Nudi nutangila bintu ebi bionso, anyi? Bulelela, ndi nuambila ne, Kabena bashîa dibue dimue ha mutu ha dikuabo, nebâsasule buonso buau.

³Hakadiye ushikama ku mukuna wa Oleve, bayidi bakalua kudiye nkayabo, bakamukonka ne, Utuambile dituku dialua malu â; utuambile tshimanyinu tshia hawalua tshiakabidi; ne tshia kunshikidilu kua tshikondo etshi.

⁴Yesu wakabandamuna ne, Nuende badimuke, muntu kanuhambuishi.

⁵Bualu bua ba bungi nebalue mu dina dianyi, bamba ne, Meme ndi Kilisto; nebahambuishe bantu ba bungi.

⁶Nenuamue bualu bua nvita ne ngumu ya nvita; dimukai, kanuhampakanyi: malu au nealue bulelela, kadi nshikidilu kena muanze kulua.

⁷Tshisamba tshikuabo netshiluangane ne tshinga, bukelenge bukuabo nebuluangane ne bunga biole nebikaleku ne buloba nebukanke ku nseke ne ku nseke.

⁸Kadi malu â adi tshibangidilu tshia kanyinganyinga.

⁹Nebanufile mu dikenga, nebanushihe; bisamba bionso nebikale nʼenu lukuna bua dina dianyi.

¹⁰Hashishe, ba bungi nebalenduke, nebafilangane ku bilumbu, nebikalangane ne lukuna.

¹¹Baprofete badi ne mashimi ba bungi nebabike, nebahambuishe ba bungi,

¹²Dinanga dia ba bungi nedikehe, bualu bua tshishiku tshiakudiunda munda muabo.

¹³Kadi wananukila tô ne kunshikidilu neasungidibue.

¹⁴Nebambile bantu bonso ba ha buloba lumu luimpe elu lua bukelenge buanyi, neluikale tshimanyishilu ku bisamba bionso; hashishe, nshikidilu nealue.

¹⁵Nunku hanuamona tshinyanga tshia dibutuka, tshiakambabo kudi muprofete Danyele, tshimane mu muaba wa tshijila (udi ubala bualu ebu amanye biandi),

¹⁶ku tshikondo atshi badi mu Yudaya banyemena ku mikuna;

¹⁷udi ha mutu ha nsubu katulukl bua kumusha bidi mu nsubu;

¹⁸udi mu budimi kahinganyi bua kuangata tshvualu tshiandi.

¹⁹Kadi dikenga dikole nedikale kudi badi ne mafu ne kudi badi bâmusha bana mabele mu matuku au.

²⁰Nulombe Nzambi ne, Kunyema kuetu kakulu mu tshidimu tshia mashika ne mu dituku dia Lumingu;

²¹hualu bua ku tshikondo etshi dikenga dinene nedilue; ku tshibangidilu tshia buloba tô ne katataka kakuakadi dikenga bu adi nunku, kadiena dilua kabidi tshiendelele.

²²Bu matuku au kâi makeheshibue kudi Nzambi, nasha muntu wakadi kuhanduka; kadi Yeye neateheshe matuku au bualu bua badibo basungula kudi Nzambi.

²³Bianuambila muntu ne, Kilisto udi aha, anyi, haha; kanumuitabushi.

²⁴Bualu bua ba-Kilisto ba mashimi nebalue, ne baprofete ba mashimi, nebaleshe bantu bimanyinu binene ne malu a kukema bualu bua kuhambuisha badi basungula kadi Nzambi mene mene; biamanyabo mua kuenza nunku.

²⁵Unvuai! nakunuambila diambedi.

²⁶Bianuambilabo ne, Yeye udi mu tshihela, kanuyi; anyi ne, Yeye udi mu tusubu tua tshisokomenu, kanuitabushi.

²⁷Bu muele wa nvula udi uhenya ku esete, ne udi umueneka ku wesete; kulua kua Muana wa muntu nekuikale nunku.

²⁸Bikololo bitu biadisangisha hadi tshintu tshibole.

²⁹Hashika dikenga dia matuku au, diba nedifikuluke, ngondo kena ukenka, mitoto neituke mûlu, neihone, nebanyukule bukole buakadi buendesha bintu ebi mu diulu;

³⁰hashishe, tshimanyinu tshia Muana wa muntu netshimueneke mu diulu; bisamba bionso bia ha buloba nebidile, nebimone Muana wa muntu ulua ha matutu a mu diulu ne bukole buandi ne butumbi buandi bunene.

³¹Yeye neatume banjelo bandi ne mpungi wa dî dikole, nebasangishe bakusunguleye ba ku mpehele inai, kunfudilu kukuabo kua diulu tô ne kukuabo.

³²Nuyile lusumuinu lua mutshi wa nfigi; hatoloka lutonga luau lutekete, hasampila mabeshi alu, nenumanye ne, Tshidimu tshia mayowa tshidi ha buihi;

³³nunku nuenu kabidi, hanuamona malu â onso, nenumanye ne, Yeye udi ha buihi, udi ku mbelu mene mene.

³⁴Bulelela, ndi nuambila ne, Bantu ba tshikondo etshi kabena bashika tô ne hashika malu â onso.

³⁵Diulu ne buloba nebijimine, kadi mei anyi kêna ajimina.

³⁶Kadi bua dituku adi ne ha diba adi kakuena muntu udi mumanye, banjelo mene mene ba mu diulu kabena bamanye, Muana kena mumanye, anu Tatu udi mumanye.

³⁷Kulua kua Muana wa muntu nekuikale bu muakadi ha matuku a Noa.

³⁸Ha matuku au, nvula ya bungi kayi mianze kulua, bantu bakadi badia, bakadi banua, bakadi babaka, bakadi babakibua tô ne hakalua dituku diakabuela Noa mu buatu bunene,

³⁹kabakamanya bualu tô ne hakalua nvula ya bungi kubabutula; kulua kua Muana wa muntu nekuikale nunku.

⁴⁰Dituku adi balume babidi nebikale mu budimi; nebangate mukuabo, nebashie mukuabo;

⁴¹bakashi babidi nebikale bahela, nebangate mukuabo, nebashîe mukuabo.

⁴²Dimukai, bualu bua kanuena bamanye dituku dialua Mukelenge wenu.

⁴³Nudi bamanye ne, Bu muena nsubu mumanye diba dialua muibi butuku, wakadi kutabala, nsubu wandi kakadi kutubuka disoso.

⁴⁴Nunku nuenu kabidi nudilongolole, bualu bua Muana wa muntu nealue ha diba dinudi kanui belangane meshi.

⁴⁵Muhika kai udi ulamata nfumu wandi, udi ne meshi? Nfumu wandi wakamuteka ha mutu ha bantu bandi bualu bua kubaha bia kudia halua dituku diabi.

⁴⁶Muhika au neikale ne disanka, hahingana nfumu wandi, hamusanganeye wenza nunku.

⁴⁷Bulelela, ndi nuambila ne, Yeye neamuteke ha mutu ha bintu biandi bionso.

⁴⁸Kadi biamba muhika au mubi munda munda ne, Nfumu wanyi kena ulua katataka;

⁴⁹biabangeye kukuma bahika nʼandi, biadieye bidia, bianueye mitutu hohamue ne badi bakuatshike maluvu,

⁵⁰nfumu wa muhika au nealue dituku didiye kai mutekemene ne ha diba didiye kai mumanye,

⁵¹neamukose hankatshi, neamuteke mu luseke lua bena lubombo; muadi newikalemu ne kusumakana menu.