Read tshiluba Matayo 25 Bible Online

Matayo 25 - tshiluba bible

Matayo 25

¹Dituku adi bukelenge bua mu diulu nebuikale bu mishikankunde dikumi, yakangata minda yai, yakaya kuakidila mubaki wa mukashi.

²Mishikankunde itanu yakadi mihote, minga itanu yakadi ne meshi.

³Hakangata mihote minda yai, kayakaya ne manyi makuabo;

⁴yakadi ne meshi yakaya ne manyi mu mpanza, ne minda.

⁵Mubaki wa mukashi kakalua lubilu, mishikankunde yonso yakadi ibunga tulu, yakalala.

⁶Hakalua mundankulu, bakela mbila ne, Tangilai, mubaki wa mukashi! Luai kumuakidila.

⁷Mishikankunde ai yonso yakabika, yakalongolola minda.

⁸Mihote yakambila yakadi ne meshi ne, Nutuheku manyi bualu bua minda yetu ikadi ijima.

⁹Kadi yakadi ne meshi yakandamuna ne, Tudi tuela meshi ne, Manyi kêna akumbana bualu buetu ne buenu; nudi mua kuya kudi bahanyi, nudisumbile.

¹⁰Hakayai bua kusumba manyi, mubaki wa mukashi wakalua; yakadi ne bintu biai bilongolola yakabuela nʼandi ku disanka dia dibanji; bakinshila tshibi.

¹¹Hashishe, mishikankunde mikuabo yakalua, yakamba ne, Mukelenge, Mukelenge, utunzuluile.

¹²Kadi yeye wakandamuna ne, Bulelela, ndi nuambila ne, Tshiena munumanye.

¹³Dimukai, kanuena bamanye dituku ne ha diba.

¹⁴Bukelenge bua mu diulu budi bu muntu wakamba kuya ku luseke lukuabo, wakabikila bantu bandi, wakafila bintu biandi mu bianza biabo.

¹⁵Yeye wakaha mukuabo ntalanta[10] itanu, mukuabo ntalanta ibidi, mukuabo ntalanta umue, muntu bu mu lungenyi luandi muntu bu mu lungenyi luandi; wakaya ku luendu.

¹⁶Wakadi ne ntalanta itanu wakaya lukasa, wakenda nʼai mushinga, wakaheta minga ntalanta itanu.

¹⁷Nunku wakadi ne ntalanta ibidi wakaheta minga ibidi.

¹⁸Kadi wakadi ne ntalanta umue wakaya biandi, wakimba dina mu buloba, wakasokoka ntalanta wa mukelenge wandi.

¹⁹Hakaleha musangu mule, mukelenge wa bantu aba wakalua, wakabala nʼabo bintu.

²⁰Wakadi muangate ntalanta itanu wakalua, wakatuala ntalanta itanu mikuabo, wakamba ne, Mukelenge, wewe wakampa ntalanta itanu, mona, nakuheta minga itanu.

²¹Mukelenge wandi wakamuambila ne, Bimpe, muana wanyi muimpe ne muntumikidi, wewe wakadi untumikila hawakadi ha mutu ha bintu bikese, nenkuteke ha mutu ha bintu bia bungi, buela mu disanka dia mukelenge webe.

²²Wakadi muangate ntalanta ibidi wakalua, wakamba ne, Mukelenge, wewe wakampa ntalanta ibidi, mona, nakuheta minga ibidi.

²³Mukelenge wandi wakamuambila ne, Bimpe, muana wanyi muimpe ne muntumikidi, wewe wakadi untumina hawakadi ha mutu ha bintu bikese, nenkuteke ha mutu ha bintu bia bungi, buela mu disanka dia mukelenge webe.

²⁴Wakadi muangate ntalanta umue wakalua, wakamba ne, Mukelenge, nakamanya ne, Wewe udi muena tshinyangu, utu wahuola biudi kui mukune, utu wasangisha biudi kui mutangadishe;

²⁵nakatshina, nakaya, nakasokoka ntalanta webe mu buloba, tshintu tshiebe katshitshi.

²⁶Mukelenge wandi wakamuandamuna ne, Wewe udi muhika mubi, udi mufuba, wewe udi mumanye ne, Meme ntu ngahuola bindi tshi mukune, ntu ngasangisha bindi tshî mutangadishe;

²⁷biakadi bimpe bia wewe kufila mpalata[11] wanyi mu bianza bia basombeshanganyi, nunku hanakulua, nakadi kuangata ntalanta wanyi ne tshia kasombela.

²⁸Numunyenge ntalanta, nuhe udi ne ntalanta dikumi.

²⁹Udi ne bintu nebamuhe binga bintu, neikale ne bia bungi; udi kai ne tshintu nebamunyenge tshidiye nʼatshi.

³⁰Imashai muhika mulembakane mu mîdima, muadi newikalemu ne kusumakana menu.

³¹Halua Muana wa muntu mu butumbi buandi ne banjelo bonso, neashikame mu nkuasa wa butumbi buandi;

³²bisamba bionso nebisangakane ku mpala kuandi, yeye neabatahulule bu mudi mulami utahulula mikoko ne mbushi;

³³neateke mikoko ku tshianza tshiandi tshia balume ne mbushi ku tshianza tshiandi tshia bakashi.

³⁴Hashishe, Mukelenge neambile badi ku tshianza tshiandi tshia balume ne, Luai, nudi nusankishibua kudi Tatu wanyi, nuhiane bukelenge buakunulongoluelabo ku tshibangidilu tshia buloba;

³⁵bualu bua nakadi ne nsala, nuakampa bia kudia; nakadi ne nyota, nuakampa bia kunua; nakadi bianyi muenyi, nuakambuesha mu nsubu;

³⁶nakadi butaka, nuakanduatshisha; nakadi nsama, nuakalua kunsombesha; nakadi mu nsubu wa lukanu, nuakalua kundi.

³⁷Hashikisheye kubambila nunku, bantu bakane nebamukonke ne, Mukelenge, dituku kai dituakakutangila ne nsala, tuakudisha? Ne nyota, tuakunuisha?

³⁸Dituku kai dituakakutangila mulue muenyi, tuakubuesha mu nsubu? Ne butaka, tuakuluatshisha?

³⁹Dituku kai dituakakutangila usama ne mu nsubu wa lukanu, tualua kûdi?

⁴⁰Mukelenge neabambile ne, Bulelela, ndi nuambila ne, Bualu bua nuenu nuakenzela umue wa mu bana betu badi batambe kuhuekela nunku, nuakangenzela meme.

⁴¹Yeye neambile kabidi badi ku tshianza tshia bakashi ne, Umukai kundi, nudi ne mulau, nuye mu kahia ka tshiendelele kadi katemeshela diabolo ne banjelo bandi;

⁴²nakadi ne nsala, kanuakampa tshia kudia; nakadi ne nyota, kanuakampa tshia kunua;

⁴³nakadi bianyi muenyi, kanuakambuesha mu nsubu; nakadi butaka, kanuakanduatshisha; nakadi nsama, nakadi mu nsubu wa lukanu, kanuakalua kunsombesha.

⁴⁴Bobo kabidi nebamukonke ne, Mukelenge, dituku kai dituakakutangila ne nsala ne nyota ne buenyi ne butaka ne disama ne mu nsubu wa lukanu, tuahanga kukukuatshisha?

⁴⁵Yeye neabambile ne, Bulelela, ndi nuambila ne, Bualu bua nuenu kanuakenzela umue wa mu bantu aba badi batambe kuhuekela nunku, kanuakangenzela meme.

⁴⁶Bantu aba nebaye mu dikenga dia tshiendelele, kadi bantu bakane nebaye mu muoyo wa tshiendelele.