Read tshiluba Matayo 4 Bible Online

Matayo 4 - tshiluba bible

Matayo 4

¹Hashishe Nyuma wa Nzambi wakalombola Yesu mu tshihela bua diabolo amuteye.

²Hakajileye bia kudia minya makumi anai ne mafuku makumi anai, wakadi ne nsala.

³Muteyi wakalua, wakamuambila ne, Biwikala Muana wa Nzambi, amba mabue â andamuke mitanda ya bidia.

⁴Kadi yeye wakamuandamuna ne, Bakafunda dî ne, Muntu kikadi biandi ne muoyo bualu bua bidia nkayabi, ikale hiandi nʼau bualu bua mei onso adi aluhuka mukana mua Nzambi.

⁵Hashishe diabolo wakaya nʼandi mu musoko wa tshijila; wakamushikika ha musonga wa ntempelo,

⁶wakamuambila ne, Biwikala Muana wa Nzambi, udiele hanshi, bualu bua bakufunda ne, Yeye neakufile mu bianza bia banjelo bandi; Nebakutuale mu bianza biabo Bua wewe kukumi dikasa diebe ku dibue.

⁷Yesu wakamuambila ne, Bakufunda kabidi ne, Kuteyi Mukelenge Nzambi webe.

⁸Diabolo kabidi wakaya nʼandi ku mutu kua mukuna wakadi mule be, wakamulesha makelenge onso a ha buloba ne butumbi buau;

⁹wakamuambila ne, Nenkuhe bintu ebi bionso, biwatua binu biebe hanshi, biwankukuila.

¹⁰Yesu wakamuambila ne, Satana, umuka; bualu bua bakuanda dî ne, Kukuila Mukelenge Nzambi webe, umuenzele yeye nkayandi mudimu.

¹¹Hashishe diabolo wakamushîa; ne monai, banjelo bakalua, bakadi bamukuatshisha ne biakadiye nʼabi bualu.

¹²Hakunvueye lumu ne, Bakukuata Yone, wakaya biandi mu Galela;

¹³wakumuka mu Nazaleta, wakalua kushikama mu Kapênuma, musoko eu udi hehi ne dishiba, udi ku mukalu wa Zebuluna ne Nafatale;

¹⁴bua kushikisha dî diakambabo kudi muprofete Yeshaya ne,

¹⁵Buloba bua Zebuluna ne buloba bua Nafatale, Nshila wa hehi ne dishiba, dishia dia Yadene, Galela wa bisamba bia bende,

¹⁶Bantu bakadi bashikame mu midima Bakatangila dinkenka dinene, Munya wakatemena bantu bakadi bashikame mu muaba wa lufu Ne mu mundidimbi walu.

¹⁷Ku tshikondo atshi Yesu wakabanga kuambila bantu bualu bua Nzambi ne, Kudimunai mitshima yenu; bualu bua bukelenge bua mu diulu budi hehi.

¹⁸Hakadiye wenda hehi ne dishiba dia Galela, wakamona balume babidi, bana ba muntu umue, Simona, udibo babikila ne, Petelo, ne muanʼabo Andele, bakadi bela kahamba mu dishiha; bualu bua bobo bakadi bilembi.

¹⁹Yeye wakabambila ne, Luai ku nyima kuanyi, nenuvuishe bilembi bia bantu.

²⁰Bakashîa tuhamba tuabo hanshi lukasa, bakumulonda.

²¹Hakadiye uya ku mpala, wakamona banga balume babidi, bana ba muntu umue, Yakobo muana wa Zebedayo, ne muanʼabo Yone, bakadi mu buatu ne tatu wabo Zebedayo, balukulula tuhamba tuabo; yeye wakababikila.

²²Bakashîa buatu ne tatu wabo lukasa, bakamulonda.

²³Yesu wakendakana mu luseke luonso lua Galela, uyisha bantu mu nsunagoga yabo, ubambila lumu luimpe lua bukelenge bua mu diulu; ukolesha bantu bakadi ne mabedi ne matekete onso.

²⁴Lumu luandi luakatangadika mu luseke luonso lua Sulia; bakalua kudiye ne bantu bonso bakadi basame, bakuabo bakadi bakuatshike mabedi a bungi ne didinyenga, bakuabo bakadi bakuatshike kudi bademon, bakuabo bakadi ne tshiseke, bakuabo bakadi ne tuneke; yeye wakashikisha masama abo.

²⁵Bisumbu bia bantu bia bungi bia mu Galela biakamulonda, ne bia mu Dekapoli ne bia mu Yelushalema ne bia mu Yudaya ne bia dishia dia Yadene.