Read tshiluba Mâko 12 Bible Online

Mâko 12 - tshiluba bible

Mâko 12

¹Yesu wakabanga kubambila malu mu nsumuinu. Muntu wakatentula mionshi ya mamuma a nvinyo mu budimi buandi, wakelela budimi luhangu lua mitshi idi isasa, wakimbamu dinu dia kukamina mamuma, wakasa nsubu wa batentekedi mule, wakabushîa mu bianza bia ba bidime, wakaya biandi ku luseke lukuabo kule.

²Hakalua tshidimu tshia mamuma, wakatuma muntu wandi kudi ba bidime bua kuangata mamuma a mu budimi buandi kudi ba bidime.

³Kadi bobo bakamukuata, bakamukuma, bakamuhingisha hatuhu.

⁴Wakatuma muntu wandi mukuabo kudibo; bakamutaha mu mutu, bakamuenzela bibi.

⁵Wakatuma mukuabo; bakamushiha; wakatuma bakuabo ba bungi; kadi ba bidime bakakuma bakuabo, bakashiha bakuabo.

⁶Yeye wakadi ne muanʼandi umue mulela, wakadiye munange; wakamutuma kudibo kunshikidilu, wakamba ne, Nebanemeke muanʼanyi.

⁷Kadi ba bidime aba bakambilangana ne, Eu udi muhianyi; tuyai, tumushihe, buhianyi nebuikale buetu.

⁸Bakamukuata, bakamushiha, bakamuimasha mu budimi.

⁹Bua bobo bakenza nunku, muena budimi nenze tshinyi? Yeye nealue kushiha ba bidime, neahe bakuabo budimi buandi.

¹⁰Kanuakubala dî dia mu Mukanda wa Nzambi, anyi, ne, Dibue diakahidiabo kudi bibaki ba nsubu Bakaditeka ku mutu kua ditumba;

¹¹Eu mudimu wa Mukelenge, Udi bu bualu bua kukema ku mesu kuetu?

¹²Hakunvuabo dî idi dia Yesu, bakasua kumukuata, kadi bakatshina bantu; bakamanya ne, Buakueleleye lusumuinu etu mbualu buetu; bakamushia, bakaya.

¹³Bakatuma Bafalese bakuabo ne Bena Helode kudiye bua kumukuata ku mei.

¹⁴Hakaluabo, bakamuambila ne, Muyishi, tudi bamanye ne, Wewe kuena utshina muntu, bualu bua kuena ne bualu ne muntu, wewe udi uyisha bantu nshila wa Nzambi bulelela. Mbimpe kuha Kaisa mulambu, anyi?

¹⁵Netumuhe mulambu, anyi katumuhi? Kadi yeye wakamanya lubombo luabo, wakabambila ne, Nudi nuntetshila munda tshinyi? Luai ne ndenalio kunoko, nmutangile.

¹⁶Bakalua nʼandi. Yeye wakabakonka ne, Tshindidimbi etshi ne mei â adi mafundahu mbia nganyi? Bakamuambila ne, Mbia Kaisa.

¹⁷Yesu wakabambila ne, Nuhe Kaisa bintu bia Kaisa, nuhe Nzambi bintu bia Nzambi. Hakunvuabo dî edi, bakatamba kumukema.

¹⁸Basadoke bakahia kudiye, badi bamba ne, Dibika dia ku lufu kadienaku; bakamukonka ne,

¹⁹Muyishi, Mose wakafundila ne, Biafua muanʼabo ne muntu, biashîeye mukashi wandi kai ne muana, muanʼabo angate mukashi wandi, alelele muanʼabo wakafua bana.

²⁰Balume ba difu dimue muanda mutekete bakadiku. Muanʼa bute wakabaka mukashi, wakafua biandi, kakashila muana;

²¹muibidi wakangata mukashi, yeye wakafua, kakashila muana; ne muisatu kabidi wakenza nunku;

²²buonso buabo muanda mutekete kabakasua bana. Ku nyima kua bonso, mukashi wakafua kabidi.

²³Halua dibika dia bantu ku lufu, yeye neikale mukashi wa nganyi? Wakadi mukashi wa buonso buabo muanda mutekete.

²⁴Yesu wakabambila ne, Ebu mbualu bunudi nuhambukila mu nshila, kanuena bamanye Mukanda wa Nzambi ne tukole buandi.

²⁵Habika bantu ku lufu kabena babaka, kabena babakibua; badi bu banjelo ba mu diulu.

²⁶Kadi bualu bua bantu bafue ne bua dibisha diabo ku lufu, kanuakubala mukanda wa Mose mu luseke lua bualu bua Katshi, anyi? Nzambi wakamuambila ne, Ndi bianyi Nzambi wa Abalahama, ne Nzambi wa Isaka, ne Nzambi wa Yakoba.

²⁷Yeye kena Nzambi wa bafue, udi Nzambi wa badi ne muoyo; nuenu nuakutamba kuhambuka.

²⁸Mufundi mukuabo wakalua, wakuntua muakadibo bakonkangana; hakamanyeye ne, Yesu wakubandamuna bimpe, wakamukonka ne, Mukenshi kai udi mutambe mikuabo yonso?

²⁹Yesu wakandamuna ne, Mukenshi wa kumudilu udi nunku: Unvua, Isalele, Mukelenge Nzambi wetu, Mukelenge udi umue;

³⁰sua Mukelenge Nzambi webe ne mutshima webe wonso ne muoyo webe wonso ne lungenyi luebe luonso ne bukole buebe buonso.

³¹Mukenshi muibidi udi nunku: Sua mukuenu bu mûdi mudisue. Kakuena mukenshi mukuabo udi mutambe ei.

³²Mufundi wakamuambila ne, Bulelela, Muyishi, wewe wakuamba bimpe ne, Yeye udi umue; yeye udiku nkayandi;

³³kumusua ne mutshima wonso ne lungenyi luonso ne bukole tuonso, kusua kabidi mukuabo bu mudiye mudisue kudi kutamba milambu yonso ya kuosha ne nyama mishiha.

³⁴Hakamanya Yesu ne, Yeye wakuandamuna dî dia lungenyi, Yesu wakamuambila ne, Wewe udi ha buihi ne bukelenge bua Nzambi. Hakashika bualu ebu, kakuakadi muntu wakadi ne bukitu bua kumukonka bualu.

³⁵Hakadi Yesu uyisha bantu mu ntempelo, yeye wakabakonka ne, Bafundi badi bamba ne, Kilisto udi muana wa Davidi, munyi?

³⁶Davidi mene wakamba mu Nyuma Muimpe ne, Mukelenge wakambila Mukelenge wanyi ne, Shikama ku tshianza tshianyi tshia balume Tô ne hanateka badi nʼebe lukuna munshi mua makasa ebe.

³⁷Davidi wakamubikila ne, Mukelenge, yeye udi muanʼandi munyi? Kadi bantu ba tshianana ba bungi bakadi bunvua mei andi ne disanka.

³⁸Hakadiye ubayisha, wakabambila ne, Nudimukile bafundi, bobo badi basue kuendakana baluate bikowelu bile, badi basue bantu babasekelele mu bisalu,

³⁹badi basue nkuasa minene mu nsunagoga, badi basue miaba minene hayabo ku bidia bia disanka;

⁴⁰bobo kabidi batu banyenga nsubu ya bakashi ba mu lufuila; batu batendelela Nzambi musangu mule anu bualu bua lubombo luabo; kuhila kuabo nekutambe bunene.

⁴¹Yesu wakashikama buludiludi ne tshibutshilu, wakadi utangila bu muakadi bantu bela mpalata[7] mu tshibutshilu; bantu babanshi ba bungi bakela mpalata ya bungi.

⁴²Mukashi muhele wa mu lufuila wakalua, wakelamu tukuta tubidi, tuakadi bu nsantima ibidi.

⁴³Yesu wakabikila bayidi bandi, wakabambila ne, Bulelela, ndi nuambila ne, Bintu biakuela mukashi eu muhele wa mu lufuila bidi bitambe bidi bakuabo bonso bela mu tshibutshilu;

⁴⁴buonso buabo bakuela bintu biakadibo kabai nʼabi bualu, bia ha mutu; kadi mukashi eu wakuela bintu biakadiye nʼabi bualu, bintu biandi bionso bia kudia mene mene.