Read tshiluba Mâko 14 Bible Online

Mâko 14 - tshiluba bible

Mâko 14

¹Hakahita matuku abidi, disanka dia Kuhita kua Yehowa ne dia bidia bidi kabi ne luevene diakalua; bakuidi banene ba Nzambi ne bafundi bakakeba bua kumukuata mu busokoko ne mua kumushiha;

²bakamba ne, Katuenji nunku mu matuku a disanka dia Kuhita kua Yehowa, diyoyo dia bantu nedijuke.

³Yesu wakadi mu Betania, mu nsubu wa Simona muena nsudi, hakadiye mushikame udia bidia, mukashi wakalua ne mulonda wa alabasta, mu mulondo muakadi mananashi a mushinga mutambe bukole, luenza ne nâdo mulelela; wakatshibula mulondo, wakamuela mananashi ha mutu handi.

⁴Kadi bakuabo bakadi ne tshishi, bakamba ne, Bakunyangila mananashi nunku bua tshinyi?

⁵Bakadi kuhana mananashi au ku mushinga udi mutambe ndenalio nkama isatu ya kuha bantu bahele. Bakamujiana nunku.

⁶Kadi Yesu wakamba ne, Numulekele; nudi numutatshishila tshinyi? Yeye wakungenzela bimpe.

⁷Nudi ne bahele matuku onso munkatshi muenu; nudi bamanye mua kubenzela bimpe dituku dionso dinuasua; kadi kanuena nʼanyi meme matuku onso.

⁸Mukashi eu wakuenza bu muakumanyeye mua kuenza; yeye wakungela mananashi hamʼbidi hanyi kabai banze kunjika.

⁹Bulelela, ndi nuambila ne, Mu miaha yonso ya ha buloba buonso yambabo lumu ela luimpe, nebambe kabidi bualu buakuenza mukashi eu, buikale bu tshivulukidi tshiandi.

¹⁰Yudasa Isakaliote wa mu bayidi dikumi ne babidi wakaya kudi bakuidi banene ba Nzambi bua kumufila kudibo.

¹¹Hakunvuabo bualu abu, mitshima yabo yakasanka, bakamulaya mpalata.[8] Nunku yeye wakakeba tshikondo tshiakane tshia kumufila mu bianza biabo.

¹²Hakalua dituku dia kumudilu dia disanka dia bidia bidi kabi biela luevene, diakashihashihabo bana ba mikoko ya Kuhita kua Yehowa, bayidi ba Yesu bakalua kudiye, bakamuebesha ne, Udi musue tuye kulongolola ha wewe kudila Kuhita kua Yehowa kudi kunyi?

¹³Yeye wakatuma bayidi bandi babidi, wakabambila ne, Yai mu tshimenga, nenusangile ne mulume utuala mulondo wa mai; numulonde;

¹⁴nsubu wabueleye nuambile muena nsubu ne, Muyishi udi ukonka ne, Nsubu wanyi wa buenyi unadila bidia bia Kuhita kua Yehowa ne bayidi banyi udi hanyi?

¹⁵Yeye neanuleshe nsubu munene wa mulu nuimana kulongolola bintu bionso; nuenu nutulongoluelemu.

¹⁶Bayidi babidi bakaya, bakalua mu tshimenga, bakasangana bu muakabambileye; bakalongolola Kuhita kua Yehowa.

¹⁷Hakabuela diba, Yesu wakalua ne bayidi bandi dikumi ne babidi.

¹⁸Hakadibo bashikame badia, Yesu wakamba ne, Bulelela, ndi nuambila ne, Muanʼenu mukuabo neantungile tshitungu, yeye mene udi udia nʼanyi.

¹⁹Mitshima yabo yakabanga kunyingalala, bakamukonka ku muntu ku muntu ne, Meme, anyi?

²⁰Yeye wakabambila ne, Udi biandi wa ba dikumi ne babidi, udi utua nʼanyi tshianza mu dilonga.

²¹Bualu bua Muana wa muntu udi uya bu muakamufundabo, kadi mulau neulue kudi wakutungila Muana wa muntu tshitungu; biakadi bimpe bu muntu eu kai muledibue.

²²Hakadibo badia, yeye wakamema mutanda wa bidia; hakatendeleleye Nzambi, wakautshibula, wakabaha, wakamba ne, Angatai bienu, etshi tshidi mubidi wanyi

²³Wakamema luhanza; hakasakidileye Nzambi, wakabahalu; buonso buabo bakanua.

²⁴Yeye wakabambila ne, Etshi tshidi mashi anyi a dihungila, akamatshila bantu ba bungi.

²⁵Bulelela, ndi nuambila ne, Tshiena nua maluvu kabidi tô ne halua dituku dinanua maluvu mahia-mahia mu bukelenge bua Nzambi.

²⁶Hakimbabo musambu, bakaluhuka, bakaya mu mukuna wa Oleve.

²⁷Yesu wakabambila ne, Buonso buenu nenulenduke; bua bakafunda ne, Nenshihe mulami wa mikoko, mikoko neitangadike.

²⁸Kadi hanabika, nenye ku mpala kuenu mu Galela.

²⁹Kadi Petelo wakamuambila ne, Bialenduka bakuabo bonso, meme tshiena ndenduka.

³⁰Yesu wakamuambila ne, Bulelela, ndi nkuambila ne, Lelu, butuku ebu mene, tshitala katshi tshianze kusama misangu ibidi, wewe neumpidie misangu isatu.

³¹Kadi Petelo wakamba ne bulobo ne, Bikala bualu bunkuata bua kufua nʼebe, tshiena nkuhidia. Buonso buabo bakamba nunku kabidi.

³²Bakalua mu muaba wakadibo babikila ne, Getesemane; yeye wakambila bayidi bandi ne, Shikamai aha, hanatendelela Nzambi.

³³Wakaya biandi ne Petelo ne Yakobo ne Yone, wakabanga kukema bikole, mutshima wandi wakatamba kunema.

³⁴Yeye wakabambila ne, Mutshima wanyi udi utamba kunyingalala, lufu ludi luntonda; nushale aha, nutabale.

³⁵Wakaya biandi ku mpala tshituha, wakadikuma hanshi, wakatendelela Nzambi, wakamba ne, Biwamanya mua kuenza nunku, tshituha etshi tshia diba tshimpite.

³⁶Wakamba kabidi ne, Aba, Tatu, wewe udi mumanye mua kuenza malu onso; ungumushile luhanza elu; kadi bualu buenjibue bu mûdi musue, kabuenjibu bu mundi musue.

³⁷Wakalua, wakabasangana balale tulu, wakakonka Petelo ne, Simona, udi mulale tulu? Wewe kuakumanya mua kutabala tshituha tshimue tshia diba?

³⁸Nudimuke, nutendelele Nzambi; nunku kanuhonyi mu mateyi; mutshima udi musue nunku, kadi mubidi udi mutekete.

³⁹Wakaya tshiakabidi, wakatendelela Nzambi, wakadi wamba mei momumue.

⁴⁰Wakalua kabidi, wakabasangana balale tulu, bualu bua mesu abo akadi maneme ne tulu; kabakamanya mua kumukudimuna dî.

⁴¹Wakalua biandi musangu muisatu, wakabambila ne, Nudi nulala nuikisha! Kuakushika; diba diakufika! Muana wa muntu udi mufila mu bianza bia bantu babi.

⁴²Bikai, tuye; tangilai, muntungidi udi ha buihi.

⁴³Hakatshidi Yesu wamba nunku, Yudasa, mukuabo wabo wa ba dikumi ne babidi, wakalua ne tshisumbu tshinene tshia bantu, bakadi ne miele ne bibonge bafume kudi bakuidi banene ba Nzambi ne bafundi ne bakulu.

⁴⁴Mutungidi wa Yesu wakabaha tshimanyinu ne, Unatuangana nʼandi mishiku, nyeye; numukuate, nuye nʼandi bimpe.

⁴⁵Hakalueye, wakaya kudi Yesu lukasa, wakamba ne, Labi; wakatuangana nʼandi mishiku.

⁴⁶Bakamulenga bianza, bakamukuata.

⁴⁷Kadi mukuabo wa bakadi bimane ha buihi wakatula muele wandi; wakataha muntu wa muakuidi munene, wakamukosa ditshu.

⁴⁸Yesu wakabakonka ne, Nuakulua ne miele ne bibonge bua kunkuata bu mudibo bakuata munyengi munyi?

⁴⁹Nakadi nʼenu mu ntempelo ku dituku ku dituku, nyisha bantu, kanuakankuata; kadi malu â akulua bua kushikisha mei adi mafunda mu Mukanda wa Nzambi.

⁵⁰Bayidi bandi bonso bakamushia, bakanyema.

⁵¹Nsongalume mukuabo wakamulonda, mudiele tshilulu tshia line ha makaya, mubidi wakadi mutuhu; bakamukuata;

⁵²kadi yeye wakashîa tshilulu tshiandi tshia line, wakanyema butaka.

⁵³Bakaya ne Yesu kudi muakuidi munene; bakuidi banene ne bakulu ne bafundi bakalua kusangisha nʼandi.

⁵⁴Petelo wakadi ulonda Yesu ha bule ha bule, wakabuela mu luhangu lua muakuidi munene; yeye wakadi ushikama hamue ne tuhalai, ku dinkenka dia kahia, wota.

⁵⁵Bakuidi banene ne balumbuludi bonso bakakeba bualu bua kubandabo Yesu bua kumushihesha; kabakabumona.

⁵⁶Ba bungi bakamudingila, kadi mei abo kâkakanangana.

⁵⁷Bakuabo bakimana, bakamudingila ne,

⁵⁸Tuakunvua wamba ne, Nembumbule ntempelo eu udi muasa ne bianza; nengibake mukuabo udi kai muasa ne bianza matuku asatu.

⁵⁹Mei abo kâkakanangana kabidi.

⁶⁰Muakuidi munene wakimana munkatshi muabo, wakakonka Yesu ne, Wewe kuena witaba dî? Bualu ebu budi munyi budi bamonyi aba bakubanda?

⁶¹Kadi yeye wakahua, kakamba dî. Muakuidi munene wakamukonka ne, Wewe udi Kilisto, Muana wa Mutumbe, anyi?

⁶²Yesu wakamba ne, Nmeme; nenumone Muana wa muntu mushikame ku tshianza tshia balume tshia Bukole, ulua biandi ne matutu a mu diulu.

⁶³Muakuidi munene wakadihandila bilulu biandi, wakamba ne, Tudi ne bualu bua bamanyi kabidi kudi kunyi?

⁶⁴Nuakunvua bihendu bidiye uhenda nʼabi Nzambi; nudi nuamba tshinyi? Buonso buabo bakumuhisha ne, Mbimpe bamushihe.

⁶⁵Bakuabo bakabanga kumutuila mate, bakamubuikila ku mesu, bakamukuma bisusu, bakamuambila ne, Amba bualu bûdi umona; tuhalai tuakamuangata, tuakamukuma mikumu.

⁶⁶Hakadi Petelo mu luhangu, umue wabo wa bakashi benji ba mudimu wa muakuidi munene wakalua;

⁶⁷hakamoneye Petelo wota kahia wakamujosha talalâ, wakamuambila ne, Wewe kabidi wakadi ne Yesu, Muena Nazaleta.

⁶⁸Kadi yeye wakayila ne, Tshiena mumanye bualu, tshiena ngunvua mûdi wamba: yeye wakaluhuka, wakaya ha mbelu; tshitala tshiakasama.

⁶⁹Mukashi muenji wa mudimu wakamumona, wakabanga kuambila bakadi bimane ne, Eu nguabo.

⁷⁰Kadi yeye wakayila kabidi. Hakahita tshituha tshihi kabidi, bakadi bimane ha buihi bakambila Petelo ne, Bulelela, wewe udi wabo, bualu bua wewe udi Muena Galela.

⁷¹Yeye wakabanga kudiela mulau ne kuditshiha ne, Tshiena mumanye muntu eu unudi nuamba.

⁷²Hakambeye di edi, tshitala tshiakasama tshiakabidi. Petelo wakavuluka dî diakamuambila Yesu ne, Tshitala katshi tshianze kusama misangu ibidi, wewe neumpidie misangu isatu. Hakelanganeye meshi a bualu ebu, wakabanga kudila bikole.