Read tshiluba Mâko 15 Bible Online

Mâko 15 - tshiluba bible

Mâko 15

¹Hakatshia butuku, bakuidi banene ne bakulu ne bafundi ne balumbuludi bonso bakasangisha dî diabo, bakasuika Yesu, bakaya nʼandi, bakamufila mu bianza bia Pilato.

²Pilato wakamukonka ne, Wewe udi Mukelenge wa Bena Yuda, anyi? Yesu wakamuambila ne, Bûdi wamba mbulelela.

³Bakuidi banene bakamubanda malu a bungi.

⁴Pilato wakamukonka kabidi ne, Kuena witaba di? Unvua mudibo bakubanda malu a bungi.

⁵Kadi Yesu kakitaba kabidi dî dikuabo; Pilato wakakema.

⁶Mu disanka dia Kuhita kua Yehowa Pilato wakadi ne tshilele tshia kulekelela bantu muena lukanu umue wakalombabo.

⁷Muntu wakadi mu nsubu wa lukanu, dina diandi Balaba, musuika ne batomboke nʼandi; mu batomboki buabo bakadi bashihangane.

⁸Bantu ba bungi bakaya kudi Pilato, bakamuambila ne, Utuenzele bu mudi tshilele tshiebe.

⁹Pilato wakabakonka ne, Nudi basue meme nulekelele Mukelenge wa Bena Yuda, anyi?

¹⁰Yeye wakamanya ne, Bakuidi banene bakumufila bualu bua mukau.

¹¹Kadi bakuidi banene bakenzesha tshisumbu tshia bantu ne, Utulekelele Balaba.

¹²Pilato wakabakonka kabidi ne, Nengenzele unudi nubikila ne, Mukelenge wa Bena Yuda, tshinyi?

¹³Bakela mbila kabidi ne, Umushihe ku mutshi mutshiamakane.

¹⁴Pilato wakabakonka ne, Kadi wakenza bubi kai? Bobo bakatamba kuela mbila ne, Umushihe ku mutshi mutshiamakane.

¹⁵Pilato wakasua kuenzela tshisumbu tshia bantu biakane, wakabalekelela Balaba; hakakumeye Yesu, wakamufila bua kumushihabo ku mutshi mutshiamakane.

¹⁶Masalayi akaya ne Yesu mu luhangu—luolo luakadi nsubu manene wa mukelenge; akabikilangana tshisumbu tshiau tshionso.

¹⁷Akamuluatshisha tshikowelu tshikunze; hakalukau tshifulu tshia meba tshia bukelenge, akamuasatshi ku mutu;

¹⁸akabanga kumunemekela ne, Muoyo, Mukelenge wa Bena Yuda!

¹⁹Akamukuma ne mulangala ku mutu, akamutuila lute, akatua binu hanshi, akamukukuila.

²⁰Hakashikishau kumuseka, akamuvula tshikowelu tshikunze, akamuluatshisha bilulu biandi. Akaya nʼandi bua kumushiha ku mutshi mutshiamakane.

²¹Muntu dina diandi Simona, Muena Kulene, tatu wa Alesandelo ne Lufo, wakadi ufuma ku mpata; hakasangileye nʼabo, masalayi akamuenzesha ku bukole bua kuyeye nʼabo, mutuale mutshi mutshiamakane wa Yesu.

²²Bakalua nʼandi ku muaba, dina diau Gologota, kukudimuna kua muaku ne, Muaba wa Kabalubalu ka mutu.

²³Bakamuha nvinyo musangisha ne mula; kadi yeye wakabenga.

²⁴Bakamukumina milonda mu bianza ne makasa ku mutshi mutshiamakane; bakabanyangana bilulu biandi, bakabielela nshobo bua kumanyabo tshiangata muntu ne muntu.

²⁵Bakamukumina milonda ku mutshi mutshiamakane dinda ha tshitema.

²⁶Bakafunda bubandi buakamubandabo ha mutu handi ne: MUKELENGE WA BENA YUDA.

²⁷Bakakumina nʼandi banyengi babidi milonda mu bianza ne ku makasa ku mitshi mitshiamakane, mukuabo ku tshianza tshiandi tshia balume, munga ku tshianza tshiandi tshia bakashi. [

²⁸][9]

²⁹Bahitshi ba mu nshila bakamuhenda, bakakuha mitu yabo, bakamba ne, Ka kia! Wewe muhudi wa ntempelo ne mumuibaki wa matuku asatu,

³⁰udisungile, utuluke ku mutshi mutshiamakane.

³¹Bakuidi banene ne bafundi bakamuseka nunku kabidi, bakamba ne, Yeye wakadi usungila bakuabo, kena mumanye mua kudisungila.

³²Kilisto, Mukelenge wa Isalele, atuluke biandi ku mutshi mutshiamakane, bua tuetu tumone, tumuitabushe. Bakadi nʼandi ha mitshi mitshiamakane bakamuhenda.

³³Midima yakadi ha buloba buonso munda munya tô ne diba ha isatu.

³⁴Hakafika diba ha isatu, Yesu wakela dî diandi bikole ne, Eloi, Eloi, lama sabakatani? Kukudimuna kua muaku ne, Nzambi wanyi, Nzambi wanyi, wakundekela tshinyi?

³⁵Bakuabo bakadi bimaneku, hakunvuabo dî edi, bakamba ne, Yeye udi Ubikila Eliya.

³⁶Mukuabo wakaya lukasa, wakûsha musukulampampa tente ne nvinega, wakaubuesha ku mulangala, wakaha Yesu ne, Nua; wakamba ne, Lekela, tumone Eliya ne walua bua kumutulula hanshi.

³⁷Yesu wakela dî diandi bikole, wakahuola muoyo wandi.

³⁸Tshilulu tshiakadi tshikudika mu ntempelo tshiakahandika bihesa bibidi ku mutu kuatshi tô ne kunshi;

³⁹kapitene ka masalayi lukama wakadi wimana ha buihi ne Yesu; hakamoneye ne, Yesu wakuhuola muoyo, wakamba ne, Bulelela, muntu eu wakadi Muana wa Nzambi.

⁴⁰Bakashi bakadiku kabidi, batangidile ha bule; munkatshi mua bakashi aba muakadi Malia wa ku Magadala, ne Malia mamu wa Yakobo mukese ne wa Yose, ne Salome.

⁴¹Hakadiye mu Galela, bakashi aba bakadi bamulonda, bamukuatshisha; bakashi bakuabo ba bungi bakadiku, bakabanda nʼandi ku Yelushalema.

⁴²Hakamba diba kubuela, bualu bua dituku adi diakadi Dilongolola, diakadi ku nyima kua Lumingu lua Bayuda,

⁴³Yosefe wa ku Alimataya wakalua; yeye wakadi mulumbuludi wa butumbi, wakadi mutekemene bukelenge bua Nzambi; wakaya kudi Pilato ne dikima mu mutshima, wakamulomba tshitalu tshia Yesu.

⁴⁴Pilato wakakema ne, Ukadi mufue katataka; wakabikila kapitene ka masalayi lukama, wakamukonka ne, Ukadi mufue musangu mule, anyi?

⁴⁵Hakamumanyisha kapitene ka masalayi bualu abu, yeye wakafila tshitalu kudi Yosefe.

⁴⁶Yeye wakasumba tshilulu tshia line; hakamutululeye hanshi, wakamujingila tshilulu, wakamuladika mu lukita lumbula mu dibue; wakabunguluisha dibue dinene, wakadijibika ku mushiku wa mbelu wa lukita.

⁴⁷Malia wa ku Magadala ne Malia mamu wa Yose bakamona hakamuladikabo.