Read tshiluba Mâko 6 Bible Online

Mâko 6 - tshiluba bible

Mâko 6

¹Wakumuka aku, wakalua mu luseke luandi, bayidi bakamulonda.

²Hakalua dituku dia Lumingu lua Bayuda, wakabanga kuyisha bantu mu nsunagoga; bantu ba bungi bakakema, hakunvuabo mei andi, bakakonka ne, Muntu eu wakuangata malu â kudi kunyi? Lungenyi kai luakuhabo muntu eu? Malu a kukema adiye wenza adi munyi?

³Yeye kena muena mabaya, anyi? Kena muana wa Malia, anyi? Kena muanʼabo ne Yakobo ne Yose ne Yuda ne Simona, anyi? Bana babo ba bakashi kabena munkatshi muetu, anyi? Bakalenduka bua bualu buandi.

⁴Yesu wakabambila ne, Muprofete udi ne butumbi mu miaba yonso, kadi kena nʼabu ku luseke luabo ne munkatshi mua bana babo ne mu nsubu wandi.

⁵Yeye kakamanya mua kuenzaku bualu bua kukema, wakakolesha anu bantu banya-banya bakadi ne mabedi bakalengeye bianza.

⁶Wakakema bualu bua huhidia buabo. Yeye wakendakana mu misoko ubayisha.

⁷Yeye wakabikila bayidi bandi dikumi ne babidi, wakabanga kubatuma ku babidi ku babidi; wakabaha bukole bua kuhita nyuma ya bukoya;

⁸wakabambila bikole ne, Kanuangatshi tshintu tshia kuya nʼatshi mu luendu, anu bibangu; kanuyi ne bidia ne bibombo ne tshiamu tshia mitaku mu mikaba;

⁹nubueshe bisabata ku makasa; kanuluatshi bikowelu bibidi.

¹⁰Yeye wakabambila ne, Hanuabuela mu nsubu, nuikalemu tô ne hanumukamu.

¹¹Luseke luonso luahidia kunuitabusha, kabai bunvua mei enu, hanumukamu, nututule nsenga idi mu makasa enu bu tshimanyishilu ku mesu kuabo.

¹²Bakaya, bakambila bantu bualu bua Nzambi ne, Kudimunai mitshima yenu.

¹³Bakumusha bademon ba bungi, bakela manyi ha ba bungi bakadi ne mabedi, bakabakolesha.

¹⁴Mukelenge Helode wakunvua lumu lua Yesu, bualu bua dina diandi diakamanyibua; wakamba biandi ne, Yone Mubatiji wakubika ku lufu, bua bualu ebu malu a kukema adi enjibua kudiye.

¹⁵Kadi bakuabo bakamba ne, Yeye udi Eliya. Bakuabo bakamba ne, Yeye udi muprofete, anyi bu muprofete.

¹⁶Kadî Helode, hakunvueye lumu luandi, wakamba ne, Yone unakukosa mutu wakubika ku lufu.

¹⁷Bualu bua Helode nkayandi nguakadi mutume bantu bandi, mumukuate, wakamusuika mu nsubu wa lukanu bualu bua Helodia mukashi wa muanʼabo Filipo, wakadi Helode mubake.

¹⁸Yone wakadi mumane kuambila Helode ne, Wewe kuena mumanye mua kuikala ne mukashi wa muanʼenu.

¹⁹Helodia wakadi ne Yone lukuna, wakasua kumushiha, kadi yeye kakamanya mua kuenza nunku;

²⁰bualu bua Helode wakadi Utshina Yone, wakamanya ne, Yeye udi muntu muakane ne wa tshijila, wakamulama bimpe. Hakunvua Helode mei a Yone, wakalubakana, wakunvua mei andi ne disanka.

²¹Hakafikila dituku diakane, dia kuedibua kua Helode, yeye wakalambishila miloho yandi ne tumanda tuandi tua masalayi ne banfumu banene ba mu Galela bidia;

²²hakabuela muana mukashi wa Helodia, yeye wakaja maja, wakasankisha mutshima wa Helode ne ya bakadi bashikame nʼandi ku mesa; mukelenge wakambila muana mukashi ne, Undombe tshintu tshionso tshiudi musue, nenkuhetshi.

²³Wakaditshiha kudiye ne, Tshintu tshionso tshiwandomba, nenkuhetshi, tô ne ku tshituha tshia hankatshi ha bukelenge buanyi.

²⁴Yeye wakumuka, wakakonka mamuʼandi ne, Nemulombe tshinyi? Yeye wakamba ne, Ulombe mutu wa Yone Mubatiji.

²⁵Wakabuela lubilu muakadi mukelenge, wakamulomba ne, Ndi musue umpe mutu wa Yone Mubatiji katataka ha dilonga.

²⁶Mutshima wa mukelenge wakatamba kunyingalala; kadi bualu bua mitshihu yandi ne bua bakadi badia nʼandi bidia, yeye kakasua kuhidia kumuha.

²⁷Mukelenge wakatuma disalayi diakadi sentedi, wakadiambila ne, Ulue ne mutu wandi; diakaya biadi, diakamukosa mutu mu nsubu wa lukanu,

²⁸diakalua ne mutu wandi ha dilonga, diakauha nsongakashi, nsongakashi wakauha mamuʼandi.

²⁹Hakunvua bayidi ba Yone bualu ebu, bakalua, bakangata tshitalu tshiandi, bakatshijika mu lukita.

³⁰Batangadiki ba Yesu bakadisangisha kudiye, bakamuambila malu onso akadibo benza ne malu onso akadibo bayisha bantu.

³¹Yeye wakabambila ne, Luai bienu nkayenu mu muaba wa hatuhu, nuikishe tshituha. Kabakamanya mua kudia bidia talalâ, bualu bua bantu ba bungi bakadi bahitakana.

³²[1] Bakaya nkayabo mu buatu ku muaba wa hatuhu.

³³Bantu bakabamona baya, ba bungi bakabamanya, bantu ba mu misoko yonso bakayaku lubilu ku makasa, bakadianjila kufika.

³⁴Hakumukeye mu buatu, wakatangila tshisumbu tshinene tshia bantu, wakadi nʼabo luse, bualu bua bobo bakadi bu mikoko yakadi kayi ne mulami; yeye wakabanga kubayisha malu a bungi.

³⁵Hakamba diba kubuela, bayidi bandi bakalua kudiye, bakamba ne, Muaba eu udi tshihela, diba diakumana kuya;

³⁶ubatume, baye mu luseke elu ne mu misoko idi ha buihi, badisumbile bia kudia.

³⁷Yeye wakabandamuna ne, Nuenu nubahe bia kudia. Bakamukonka ne, Netuye kusumba bidia bia ndenalio nkama ibidi, tulue kubaha, badie, anyi?

³⁸Yeye wakabakonka ne, Nudi ne mitanda ya bidia bungi munyi? Yai nutangile. Hakamanyabo, bakamuambila ne, Mitanda itanu ne mishiha ibidi.

³⁹Yeye wakabambila ne, Bonso bashikame, ku tshisumbu ku tshisumbu, mu mashinde.

⁴⁰Bakashikama mu milongo, bantu lukama lukama ne bantu makumi atanu makumi atanu.

⁴¹Yeye wakamema mitanda itanu ne mishiha ibidi, wakatangila mulu, wakatendelela Nzambi, wakatshibula mitanda, wakaifila mu bianza bia bayidi bua kubitekabo ku mpala kua bantu; yeye wakababanyina buonso buabo mishiha ibidi.

⁴²Buonso buabo bakadia, bakukuta.

⁴³Bakangula bihesa bia bidia biakashala bisaka dikumi ne bibidi biule tente, ne bia mishiha kabidi.

⁴⁴Bakadia mitanda nunku bakadi balume binunu bitanu.

⁴⁵Yesu wakabuesha bayidi bandi mu buatu lubilu, badianjile dishia ku mpala kuandi mu Bete-saida, hakatumeye bantu kuabo.

⁴⁶Hakabalayeye, wakaya mu mukuna bua kutendelela Nzambi.

⁴⁷Hakalua butuku, buatu buakadi mu bunene bua dishiba, yeye wakadi mu mpata nkayandi.

⁴⁸Yesu wakabamona batata ne kuita, bualu bua tshihehele tshiakadi tshibahingisha; hakadi diba bu ha inai hatshiatshia, yeye wakalua kudibo, wenda ha mutu ha mai; yeye wakamba kubasesuka;

⁴⁹kadi bobo, hakamumonabo wenda ha mutu ha mai, bakela meshi ne, Mukishi, bakahandalala ne mei makole,

⁵⁰buonso buabo bakamumona, bakatshina. Kadi yeye wakabela dî, wakamba ne, Nukoleshe mitshima yenu, mmeme, kanutshinyi.

⁵¹Wakabuela mu buatu muakadibo, tshihehele tshiakabatama; bobo bakatamba kukema;

⁵²bualu bua kabakajingulula bualu bua mitanda bimpe; mitshima yabo yakadi mikole.

⁵³Hakasabukabo, bakalua ku dilobo dia Genesaleta, bakasuika buatu.

⁵⁴Hakumukabo mu buatu, bantu bakamumanya lukasa,

⁵⁵bakendakana lubilu mu luseke alu luonso, bakatuala bena mabedi ha malalu abo, bakaya kuakunvuabo ne, Yeye udi eku.

⁵⁶Kuonso kuakayeye, mu misoko mikese ne mu bimenga ne mu mpata, bakateka bena mabedi mu bisalu bakamutendekena bua kulengabo ku mubangu wa tshivualu tshiandi; bakadi bamulenga mbobo bakakoleshibua.