Read tshiluba Luka 15 Bible Online

Luka 15 - tshiluba bible

Luka 15

¹Basangishi ba mulambu bonso ne bantu habi bakadi balua ha buihi nʼandi bua kunvua muakadiye wamba.

²Kadi Bafalese ne bafundi bakajiana ne, Muntu eu udi witabusha bantu babi, udi udia nʼabo.

³Yeye wakabelela lusumuinu elu ne,

⁴Muntu kai wa munkatshi muenu, bikaleye ne lukama lua mikoko, hajimisheye mukuabo, kena ushîa minga makumi tshitema ne tshitema mu tshihela wenda ukeba udi mujimine tô ne haumoneye?

⁵Haumoneye, neawambule ha diaha ne mutshima usanka.

⁶Hahinganeye kuandi, neabikile balunda bandi ne bena mutumba nʼandi neabambile ne, Nusanke nʼanyi, bua nakumona mukoko wanyi wakadi munjimine.

⁷Ndi nuambila ne, Nunku kabidi disanka dia mu diulu bua muntu umue mubi wakukudimuna mutshima wandi neditambe disanka bua bantu bakane makumi tshitema ne tshitema badi kabai ne bua kukudimuna mitshima yabo.

⁸Mukashi kai, bikaleye ne mpalata[4] dikumi, hajimisheye umue, kena Utemesha muinda, akombe mu nsubu, akebe bimpe tô ne hamumoneye?

⁹Hamumoneye, neabikile balunda bandi ne bena mutumba nʼandi, neabambile ne, Nusanke nʼanyi, bua nakumona mpalata wakadi mujimine.

¹⁰Ndi nuambila ne, Nunku kabidi disanka didi ku mesu kua banjelo ba Nzambi bualu bua muntu umue mubi wakukudimuna mutshima wandi.

¹¹Yesu wakamba ne, Muntu wakadiku, wakadi ne bana balume babidi.

¹²Muana muakunyi wakambila tatu wandi ne, Tatu, umpe luanyi luseke lua biuma lualua kundi. Yeye wakabatahuluila bintu biandi bionso.

¹³Hakahita matuku makese, muana muakunyi wakasangisha bintu biandi bionso, wakaya mu luendu kule ku luseke lukuabo; wakatangadishaku bintu biandi bionso ku malu mabi akenzenzeye.

¹⁴Hakamaneye bintu bionso, tshiole tshinene tshiakalua ku luseke alu; wakabanga kukengela bintu.

¹⁵Wakaya, wakadilamika kudi muntu wa ku luseke alu; muntu au wakamutuma mu madimi andi bua kudisheye ngulube.

¹⁶Yeye wakasua kûsha difu diandi tente ne bihusu biakadi ngulube idia. Kakuakadi muntu wakamuha tshintu.

¹⁷Hakakatamuteye, wakadikonka munda ne, Bena mudimu ba tatu wanyi hadi bungi munyi badi ne bia kudia bia bungi ne bintu bikuabo bisambuke ha mutu kabidi, kadi meme ndi nfua ne nsala kunoko?

¹⁸Nembike, nenye kudi tatu wanyi, nemuambile ne, Tatu, nakuenzela diulu bibi, nakuenza bibi ku mesu kuebe kabidi.

¹⁹Tshiena bianyi muimpe kabidi bua kumbikilabo ne, Muanʼebe, umbueshe mu mudimu bu bena mudimu bebe bakuabo.

²⁰Yeye wakabika, wakalua kudi tatu wandi. Hakadiye kuakua, tatu wandi wakamumona, luse luakamukuata, wakanyema lubilu, wakamuela tshituha ku nshingu, wakamutuatua mishiku.

²¹Muana wakamuambila ne, Tatu, nakuenzela diulu bibi, nakuenza bibi ku mesu kuebe kabidi; tshiena bianyi muimpe kabidi bua kumbikilabo ne, Muanʼebe.

²²Kadi tatu wandi wakambila bantu bandi ne, Nulue lubilu ne tshilulu tshidi tshitambe buimpe, munuluatshishetshi; numuele kakanu ku munu ne bisabata ku makasa.

²³Nulue ne muana wa ngombe udi ne manyi, numushihe, tudie bietu, tusanke bietu,

²⁴bualu bua muana wanyi eu wakadi mufue, udi ne muoyo kabidi; wakadi mujimine, wakamueneka. Bakabanga kusanka.

²⁵Kadi muanʼandi muanʼa bute wakadi mu budimi; hakadiye ulua, ukadi ufika hehi ne nsubu, wakunvua mutoyi wa biombelu ne maja.

²⁶Yeye wakabikila muena mudimu, wakamuebesha ne, Abu mbualu tshinyi?

²⁷Wakamuambila ne, Muanʼenu wakulua; tatu webe wakushiha muana wa ngombe wa manyi, hua yeye wakumuangata mukole.

²⁸Kadi yeye wakadi ne tshishi, wakahidia kubuela mu nsubu; tatu wandi wakaluhuka, wakamusengelela.

²⁹Yeye wakandamuna tatu wandi ne, Ahu bidimu ebi bia bungi bindi mukukuatshile mudimu webe, tshiena muhidie di diebe; kadi wewe kuena mumpe kana ka mukoko bua meme kusanka ne balunda banyi;

³⁰kadi bakulua muana webe eu, wakutangadisha bintu biebe kudi bakashi ba masandi, wewe wakumushihela muana wa ngombe wa manyi.

³¹Tatu wandi wakamuambila ne, Muanʼanyi, wewe udi nʼanyi tshiendelele, bintu bianyi bionso mbiebe.

³²Biakadi bimpe bia kusaba ne kusanka, bualu bua muanʼenu eu wakadi mufue, udi ne muoyo kabidi; wakadi mujimine, wakumueneka.