Read tshiluba Luka 17 Bible Online

Luka 17 - tshiluba bible

Luka 17

¹Yeye wakambila bayidi bandi ne, Malu adi alenduisha bantu kêna ahanga kulua, kadi mulau ulualua kudi udi wavuisha.

²Biakadi bimpe kumusuika dibue dia kuhela nʼadi mu nshingu, kumuela mu mai manene, diambedi kai muanze kulenduisha umue wabo wa mu bantu aba bahuekele.

³Nudilame bimpe; bienza muanʼenu bibi, umubele; biakudimuneye mutshima wandi, umujimishile bubi buandi.

⁴Biakuenzeye bibi misangu muanda mutekete dituku dimue, biahinganeye kûdi misangu muanda mutekete wamba ne, Nakukudimuna mutshima, wewe umujimishile bubi buandi.

⁵Bapostolo bakambila Mukelenge ne, Udiundishe ditabusha dietu.

⁶Mukelenge wakamba ne, Bu nuenu bikale ne ditabusha bunene bua lutete lua mutada, nuakadi kuambila mutshi eu wa sukamina ne, Ujudibue, ukunyibue mu dishiba; wowo wakadi kutumikila dî dienu.

⁷Umue wenu kai, bikaleye ne muhika wandi udima anyi ulama mikoko, hafumeye ku budimi, neamuambile ne, Lua katataka, ushikame ku mesa?

⁸Nasha, neamuambile ne, Undongoluele bia meme kudia, usuike mukaba, umpeshe meme bidia tô ne hanashikisha kudia ne kunua; hashishe wewe neudie, neunue.

⁹Yeye neasakidile muhika wandi bua yeye wakuenza malu akumuambileye, anyi?

¹⁰Nuenu kabidi nudi nunku; hanuashikisha kuenza malu onso akunuambilabo, nuambe ne, Tudi bahika ba tshianana, tuakuenza anu malu atuakadi nʼau bua kuenza.

¹¹Hakadibo baya mu nshila wa ku Yelushalema, wakahitshila mu nseke ya Samalea ne Galela.

¹²Hakambeye kubuela mu musoko mukuabo, bena nsudi dikumi bakasangila nʼandi, bakadi bimane ha bule.

¹³Bakela mbila ne, Mukelenge Yesu, utufue luse.

¹⁴Hakabamoneye, wakabambila ne, Yai, nudimueneshe kudi bakuidi ba Nzambi, Hakadibo baya, bakalengeshibua.

¹⁵Mukuabo, hakamoneye ne, Nakulengeshibua, wakahingana utumbisha Nzambi ne dî dikole;

¹⁶wakadihonena, wakatua mpala wandi hanshi ku makasa a Yesu, wakamusakidila; yeye wakadi Muena Samalea.

¹⁷Yesu wakakonka ne, Bantu dikumi kabena balengeshibue, anyi? Ahu tshitema tshidi hanyi?

¹⁸Munyi kabakutangila muntu mukuabo muhingane bua kutumbisha Nzambi, anu muntu eu wa bende?

¹⁹Wakamuambila ne, Bika, ya biebe; ditabusha diebe diakukusungila.

²⁰Bafalese bakamukonka ne, Bukelenge bua Nzambi nebulue dituku kai? Yeye wakabakudimuna dî ne, Bukelenge bua Nzambi kabuena bulua ku mesu kua bantu babutangile;

²¹kabena bamba kabidi ne, Kabuobu aha! Anyi, Kabuobu kuakua! Monai, bukelenge bua Nzambi budi munda muenu.

²²Yesu wakambila bayidi bandi ne, Matuku nealue anuasua kutangila dituku dimue dia mu matuku a Muana wa muntu, kadi kanuena nuditangila,

²³Nebanuambile ne, Kayeu kuakua! Kayeu aha! Kanuyi, kanubalondi.

²⁴Bu mudi muele wa nvula uhenya ku luseke lukuabo lua diulu, ukenkela ku lunga luseke lua diulu, Muana wa muntu neikale nunku halua dituku diandi.

²⁵Kadi diambedi budiye nʼabu mbua kukengeye makenga a bungi ne bua kumuhidiabo kudi bantu ba tshikondo etshi.

²⁶Bualu bua matuku a Muana wa muntu nebuikale bu muakadibu mu matuku a Noa.

²⁷Bakadi badia, bakadi banua, bakadi babaka, bakadi babakibua tô ne hakalua ditutu diakabuela Noa mu buntu bunene, hakalua mai a bungi, hakafuabo buonso buabo.

²⁸Bualu buakadi nunku kabidi mu matuku a Lota; bakadi badia, bakadi banua, bakadi basumba, bakadi bahana, bakadi bakuna, bakadi bibaka;

²⁹kadi dituku diakahatuka Lota mu Sodoma, kahia ne soufre biakafuma mulu, biakabashiha bonso;

³⁰bualu nebuikale nunku halua dituku diamueneka Muana wa muntu.

³¹Dituku adi udi ha mutu ha nsubu, ne bintu biandi bidi mu nsubu, katuluki bua kuyeye nʼabi; udi mu budimi muomumue, kahinganyi.

³²Vulukai ha mukashi wa Lota.

³³Wasua kuangata muoyo wandi neaujimishe, wajimisha muoyo wandi neausungile.

³⁴Ndi nuambila ne, Butuku abu balume babidi nebikale mu bulalu; nebangate munga, nebashie mukuabo.

³⁵Bakashi babidi nebikale bahela; nebangate munga, nebashie mukuabo. [

³⁷Bayidi bakamuebesha ne, Mukelenge, kudi kunyi? Yeye wakabambila ne, Bikololo bitu biadisangisha hadi tshintu tshibole.