Read tshiluba Luka 20 Bible Online

Luka 20 - tshiluba bible

Luka 20

¹Dituku dikuabo, hakadiye uyisha bantu mu ntempelo, hakadiye ubambila bualu bua lumu luimpe, bakuidi banene ba Nzambi ne bafundi ne bakulu bakamutukidila;

²bakamukonka ne, Utuambile, udi wenza malu â ne bukokeshi kai? Wakukuha bukokeshi ebu nganyi?

³Yeye wakabakudimuna dî, wakabakonka ne, Meme kabidi nenukonke dî dimue, nungambile,

⁴Dibatiza dia Yone diakufuma kudi kunyi? Mu diulu, anyi kudi bantu?

⁵Bobo bakelangana meshi munda munda ne, Bituamba ne, Mu diulu, yeye neatuebeshe ne, Munyi kanuakamuitabusha?

⁶Kadi bituamba ne, Kudi bantu, bantu bonso nebanshihe ne mabue, bua bobo badi bitabusha ne, Yone udi muprofete.

⁷Bakakudimuna Yesu dî ne, Katuena bamanye kuakufumadi.

⁸Yesu wakabambila ne, Meme kabidi tshiena numanyisha bualu bua bukokeshi bundi ngenza nʼabu malu â.

⁹Yeye wakabanga kuelela bantu lusumuinu elu ne, Muntu wakatentula mionshi ya mamuma a nvinyo mu budimi buandi, wakabushîa mu bianza bia ba bidime, wakaya ku luseke lukuabo kule bua kushikamaku musangu mule.

¹⁰Hakalua tshidimu tshia mamuma, wakatuma muntu wandi kudi ba bidime ne, Bampe mamuma a mu budimi. Kadi ba bidime bakamukuma, bakamuhingisha hatuhu.

¹¹Wakatuma muntu wandi mukuabo; bakamukuma yeye kabidi, bakamuenzela bibi, bakamuhingisha hatuhu.

¹²Wakatuma muisatu; bakamutaha mputa, bakamuihata.

¹³Muena budimi wakadikonka ne, Ngenze tshinyi? Nentume muana wanyi munanga; bumue nebamunemeke.

¹⁴Kadi hakamumona ba bidime, bakambilangana ne, Eu udi muhianyi; tumushihai, buhianyi buikale buetu.

¹⁵Bakamuihata mu budimi, bakamushiha. Muena budimi neabenzele tshinyi?

¹⁶Nealue kushiha ba bidime aba, neahe bakuabo budimi buandi. Hakunvuabo dî edi dia Yesu, bakamba ne, Bualu kabulu nunku.

¹⁷Kadi yeye wakabajosha, wakabakonka ne, Edi ndî kai diakafundabo mu Mukunda wa Nzambi ne, Dibue diakahidiabo kudi bibaki ba nsubu Bakaditeka ku mutu kua ditumba?

¹⁸Wahona ha dibue adi neatshibuke bituha; biahonenadi muntu, nedimuboteshe, nedimutangadishe bu luhuishi.

¹⁹Bafundi ne bakuidi banene ba Nzambi bakasua kumukuata ha diba adi mene, kadi bakatshina bantu; bakamanya ne, Buakueleleye lusumuinu elu mbualu buetu.

²⁰Bakamutentekela, bakatuma batentekedi bua kumukuatabo ku mei, bobo bakadi badinga ne, Tudi bantu bakane, bakasua kumufila mu bianza bia ngovena, muena bukokeshi.

²¹Bakamukonka ne, Muyishi, tudi bamanye ne malu audi wamba ne audi uyisha adi mimpe, kuena ne muntu bualu, wewe udi uyisha bantu nshila wa Nzambi bulelela.

²²Mbimpe tuetu kuha Kaisa mulambu, anyi?

²³Kadi yeye wakamanya budimu buabo, wakabambila ne.

²⁴Nundeshe ndenalio. Udi ne tshindidimbi tshia nganyi, ne mei mafundahu nga nganyi? Bakamba ne, Mbia Kaisa.

²⁵Yeye wakabambila ne, Nuhe Kaisa bintu bia Kaisa, nuhe Nzambi bintu bia Nzambi.

²⁶Kabakamanya mua kumukuata ku mei ku mesu kua bantu; bakakema bua dî diakakudimuneye, bakahua.

²⁷Basadoke bakuabo bakalua kudiye, aba mbadi bamba ne, Dibika dia ku lufu kadienaku;

²⁸bakamukonka ne, Muyishi, Mose wakatufundila ne, Biafua muanʼabo ne muntu, biashîeye mukashi wandi kai ne muana, muanʼabo angate mukashi wandi, alelele muanʼabo wakafua bana.

²⁹Balume ba difu dimue muanda mutekete bakadiku. Muanʼa bute wakabaka mukashi, wakafua biandi, kakashia muana:

³⁰ne muibidi wakenza muomumue;

³¹ne muisatu wakangata mukashi; nunku buonso buabo muanda mutekete kabakasua bana, bakafua.

³²Ku nyima mukashi wakafua biandi.

³³Halua dibika dia bantu ku lufu, yeye neikale mukashi wa nganyi? Yeye wakadi mukashi wa buonso buabo muanda mutekete.

³⁴Yesu wakabambila ne, Bana ba tshikondo etshi batu babaka, batu babakibua;

³⁵kadi bantu bakasungulabo ne, Badi bakane bua kufikila ku tshikondo tshiatshia ne ku dibika dia bantu ku lulu, kabena babaka, kabena babakibua;

³⁶kabena bamanye mua kufua kabidi, badi muomumue ne banjelo; badi bana ba Nzambi, badi bana ba dibika dia ku lufu.

³⁷Mose mene mene wakatumanyisha bua dibika dia bafue mu luseke ludi luamba bualu bua Katshi, yeye udi Ubikila Mukelenge ne, Nzambi wa Abalahama ne Nzambi wa Isaka ne Nzambi wa Yakoba.

³⁸Yeye kena Nzambi wa bafue, udi Nzambi wa badi ne muoyo; bualu bua bonso badi ne muoyo bua bualu buandi.

³⁹Bafundi bakuabo bakamuandamuna ne, Muyishi, wakuamba bimpe.

⁴⁰Bualu bua kabakadi ne bukitu bua kumukonka bualu kabidi.

⁴¹Yeye wakabebesha ne, Badi mua kuamba ne, Kilisto udi muana wa Davidi, munyi?

⁴²Davidi mene mene udi wamba mu Mukanda wa Misambu ne, Mukelenge wakambila Mukelenge wanyi ne, Shikama ku tshianza tshianyi tshia balume

⁴³Tô ne hanateka badi nʼebe lukuna munshi mua makasa ebe.

⁴⁴Nunku Davidi wakamubikila ne, Mukelenge; yeye udi muanʼandi munyi?

⁴⁵Yeye wakambila bayidi bandi, bantu bonso bunvue, ne,

⁴⁶Nudimukile bafundi, bobo badi basue kuendakana baluate bikowelu bile, badi basue bantu babasekelele mu bisalu, badi basue nkuasa minene mu nsunagoga, badi basue miaba minene hayabo ku bidia bia disanka;

⁴⁷bobo kabidi batu banyenga nsubu ya bakashi ba mu lufuila; batu batendelela Nzambi musangu mule anu bualu bua lubombo luabo; kuhila kuabo nekutambe bunene.