Read tshiluba Luka 21 Bible Online

Luka 21 - tshiluba bible

Luka 21

¹Yeye wakabanduluka, wakamona bantu babanshi bela diha diabo mu tshibutshilu.

²Wakamona mukashi muhele wa mu lufuila wela tukuta tubidi.

³Yeye wakamba ne, Bulelela, ndi nuambila ne, Bintu biakuela mukashi eu muhele wa mu lufuila bidi bitambe biakuela bakuabo bonso,

⁴bualu bua buonso buabo bakuela bintu mu mushete wa Nzambi biakadibo kabai nʼabi bualu, bia ha mutu; kadi mukashi eu wakuela bintu biakadiye nʼabi bualu, bintu biandi bionso ma kudia mene meme.

⁵Hakadi bakuabo bamba bua ntempelo ne, Udi mulengesha ne mabue mimpe ne bintu bifila kudi bantu,

⁶Yesu wakamba ne, Nudi nutangila bintu ebi, kadi matuku nealue ikalabo kabai bashîa dibue dimue ha mutu ha dikuabo, nebâsasule buonso buau.

⁷Bakamukonka ne, Muyishi, malu â nealue dituku kai? Tshimanyinu tshia malu â ne akadi ha kulua ntshinyi?

⁸Yeye wakamba ne, Nuende badimuke, muntu kanuhambuishi; ba bungi nebalue mu dina dianyi, bamba ne, Meme nyeye mene; bamba kabidi ne, Dituku diakulua; kanubalondi.

⁹Hanunvua bualu bua nvita ne mayoyo kanutshinyi; budi malu â nʼabu mbua kulua diambedi, kadi nshikidilu kena ulua lukasa.

¹⁰Yeye wakabambila ne, Tshisamba tshikuabo netshiluangane ne tshinga, bukelenge bukuabo nebuluangane ne bunga,

¹¹buloba nebutambe kutaka, biole ne bihuhu nebikale ku nseke ne ku nseke, malu a buowa ne bimanyinu binene nebifume mulu.

¹²Kadi malu â onso kâi manze kulua, nebanukuate, nebanukengeshe, nebanufile mu nsunagoga ne mu nsubu ya lukanu, nebalue nʼenu ku mesu kua banfumu ne bangovena bua dina dianyi.

¹³Malu au nealue kunudi bu tshimanyishilu.

¹⁴Nukoleshe mitshima yenu ne, Katuedianganyi meshi diambedi a dî ditudi basue kubakudimuna;

¹⁵meme nenuhe mukana ne lungenyi bidi badi nʼenu lukuna kabai bamanye mua kutantamana ne mua kukudimuna dî.

¹⁶Nebanutungile tshitungu kudi baledi benu mene ne bana benu ne ba tshiota tshienu ne balunda benu; nebashihe bakuabo benu.

¹⁷Bantu bonso nebikale nʼenu lukuna bua dina dianyi.

¹⁸Lusuki lumue lua ku mitu yenu kaluena lujimina.

¹⁹Nenudiangatshile mioyo yenu bualu bua dinanukila dienu.

²⁰Hanuatangila bena nvita banyunguluke musoko wa Yelushalema, mimanye ne dibutuka diau diakulua.

²¹Badi mu Yudaya mu tshikondo atshi banyemene ku mikuna; badi mu musoko bahatuke; badi mu ntshiamba kabahinganyi mu musoko.

²²Bualu bua â adi matuku a disombuela, bua kushikisha malu onso akafundibua mu Mukanda wa Nzambi.

²³Kadi mulau mukole newikale kudi badi ne mafu ne kudi badi bâmuisha bana mabele mu matuku au; bualu bua dikenga dikole nedikale ha buloba, lukuna neluikale kudi bantu aba.

²⁴Nebahone ku muele wa nvita, nebaye nʼabo bakuata mu bisamba bionso; bantu ba bisamba bia bende nebadiate Yelushalema munshi mua makasa abo tô ne hashika tshikondo tshia bantu ba bisamba bia bende.

²⁵Bimanyinu nebikale mu diba ne mu ngondo ne mu mitoto; ha buloba nehikale dikenga dikole dia bantu, nebatshine tshiona tshinene tshia mai manene ne tshia mavuala;

²⁶bantu nebafue tshihuka bua buowa ne bua ditekemena dia malu alua ha buloba; bualu bua nebanyukule makole a mu diulu.

²⁷Hashishe nebamone Muana wa muntu ulua mu ditutu ne bukole ne butumbi bunene.

²⁸Habanga malu â kulua, nubanduluke, nutangile mulu, bualu bua bunuhikudi buenu budi ha buihi.

²⁹Yeye wakabelela lusumuinu ne, Tangilai mutshi wa nfigi ne mitshi yonso;

³⁰hasampilai, hanuamona bualu ebu, nenumanye ne, Tshidimu tshia mayowa tshidi ha buihi.

³¹Nuenu kabidi, hanuatangila malu â alua, mimanye bienu ne, Bukelenge bua Nzambi budi ha buihi.

³²Bulelela, ndi nuambila ne, Bantu ba tshikondo etshi kabena bashika tô ne hashika malu â onso.

³³Diulu ne buloba nebijimine, kadi mei anyi kêna ajimina.

³⁴Nudilame bimpe, bua mitshima yenu kainemi ne mudiu ne dibuluka dia maluvu ne malu a ha buloba, ne bua dituku adi kadilu kunudi lukasa bu buteyi?

³⁵Bualu bua dituka adi nedilue kudi bonso badi bashikame ha buloba buonso.

³⁶Tabalai misangu yonso, nutendelele Nzambi mua kuikala ne bukole bua kuhanduka mu malu â onso alua, ne bua kuimana ku mesu kua Muana wa muntu.

³⁷Yeye wakadi uyisha bantu mu ntempelo ku dituku ku dituku; butuku wakalubuka, wakalala mu mukuna udibo babikila ne, Oleve.

³⁸Bantu bonso bakadi balua mu ntempelo dinda bua kunvua dî diandi.