Read tshiluba Luka 3 Bible Online

Luka 3 - tshiluba bible

Luka 3

¹Mu tshidimu tshia dikumi ne itanu tshia bunfumu bua Tibelio Kaisa, hakadi Ponto Pilato ngovena wa Yudaya, ne hakadi Helode muloho wa Galela, ne hakadi muanʼabo Filipo muloho wa luseke lua Itulaya ne Takoniti, ne hakadi Lusania muloho wa Abilene,

²ne hakadi Ana ne Kayafa bakuidi banene, dî dia Nzambi diakalua kudi Yone, muana wa Zakâya, mu tshihete.

³Yeye wakalua mu luseke luonso luakadi ha buihi ne Yadene, wenda wambila bantu bualu bua dibatiza dia kukudimuna kua mitshima bua mibi yabo ijimishibue;

⁴bu muakafundabo mu mukanda wa mei a Yeshaya muprofete ne, Dî dia muntu udi wela lubila mu tshihela ne, Longololai nshila wa Mukelenge, Nululamishe nshila yandi.

⁵Nebalandakashe mpongo yonso, Nebabatamishe mikuna yonso, minene ne mikese, Nebaludike nshila mikonyangale, Nebaseneshe nshila idi bizakala bizakala;

⁶Bantu bonso nebamone luhandu lua Nzambi.

⁷Yeye wakakonka bisumbu bia bantu biakalua kudiye bua yeye kubabatiza ne, Nuenu bana ba nyoka, wakunudimusha bua kunyema ku mulau ulualua kunudi nganyi?

⁸Nukuame mamuma adi makanangane ne dikudimuna dia mitshima yenu, kanuhangi kudiamba mu mitshima yenu ne, Tuetu tudi ne Abalahama tatu wetu; meme ndi nuambila ne, Nzambi udi mumanye mua kubisha mabue â alue bana ba Abalahama.

⁹Katataka tshisui tshidi tshiladika ha muji wa mutshi wonso; mutshi wonso udi kawi ukuama mamuma mimpe nebaushimbule, nebawele mu kahia.

¹⁰Bantu bakamukonka ne, Ahu netuenze tshinyi?

¹¹Wakabambila ne, Udi ne bikowelu bibidi aheshe udi kai nʼatshi tshinga; udi ne bia kudia enze muomumue.

¹²Basangishi ba mulambu kabidi bakatua kubatijibua, bakamukonka ne, Muyishi, tuetu netuenze tshinyi?

¹³Yeye wakabambila ne, Kanuangatshi mulambu mutambe wakunuambilabo.

¹⁴Masalayi kabidi akamukonka ne, Ne tuetu, netuenze tshinyi? Yeye wakambila ne, Kanunyengi tshintu tshia muntu ku bukole, kanusonguedi muntu tshianana; nuitabusha difutu dienu ne disanka.

¹⁵Hakadibo batekemena bualu, ne hakadibo buonso buabo belangana meshi a Yone mu mitshima yabo ne, Yeye udi Kilisto, anyi?

¹⁶Yone wakabandamuna buonso buabo ne, Bulelela, ndi nubatiza ne mai, kadi udi muntambe meme ulualua, tshiena ne buakane bua kusulula mionshi ya bisabata biandi; yeye neanubatize mu Nyuma Muimpe ne mu kahia;

¹⁷tshihehudi tshiandi tshidi mu tshianza, yeye neatokeshe tshituilu tshiandi bimpe, neasangishe mponda mu mudiba wandi, kadi yeye neoshe bisote mu kahia kadi kakai kajima tshiendelele.

¹⁸Yeye wakambila bantu lumu luimpe ukoleshe mitshima yabo ne mei makuabo a bungi;

¹⁹kadi muloho Helode wakadiye mubele bualu bua Helodia, mukashi wa muanʼabo, ne bualu bua malu mabi onso akenza Helode;

²⁰yeye wakatentekesha bualu ebu bukuabo ha mutu ha malu au onso: wakabuesha Yone mu nsubu wa lukanu.

²¹Hakabatizabo bantu bonso ne Yesu kabidi, hakadiye utendelela Nzambi, diulu diakabuluka,

²²ne Nyuma Muimpe wakahueka hamʼbidi handi ne mubidi bu wa nyunyu wa nkutshi; di diakafuma mu diulu ne, Wewe udi Muana wanyi munanga, udi unsankisha bimpe.

²³Hakabanga Yesu mene kuyisha bantu, yeye wakadi bu bidimu makumi asatu, bantu bakadi belangana meshi ne, yeye udi muana wa Yosefe, muana wa Heli,

²⁴muana wa Matata, muana wa Lewi, muana wa Meleki, muana wa Yana, muana wa Yosefe,

²⁵muana wa Matana, muana wa Amosa, muana wa Nahuma, muana wa Eseli, muana wa Nagai,

²⁶muana wa Mâta, muana wa Matatia, muana wa Semei, muana wa Yoseke, muana wa Yoda,

²⁷muana wa Yoanana, muana wa Lesa, muana wa Zelubabela, muana wa Shalatiele, muana wa Neli,

²⁸muana wa Meleki, muana wa Adi, muana wa Kosama, muana wa Elemadama, muana wa Ele,

²⁹muana wa Yesu, muana wa Eliezê, muana wa Yolima, muana wa Matata, muana wa Lewi,

³⁰muana wa Shimeona, muana wa Yuda, muana wa Yosefe, muana wa Yonama, muana wa Eleyakima,

³¹muana wa Melea, muana wa Mena, muana wa Matata, muana wa Natana, muana wa Davidi,

³²muana wa Yishai, muana wa Obeda, muana wa Boaza, muana wa Salamona, muana wa Nashona,

³³muana wa Aminadaba, muana wa Ani, muana wa Heselona, muana wa Pelese, muana wa Yuda,

³⁴muana wa Yakoba, muana wa Isaka, muana wa Abalahama, muana wa Tela, muana wa Nahô,

³⁵muana wa Seluga, muana wa Leu, muana wa Pelege, muana wa Ebê, muana wa Shela,

³⁶muana wa Kenana, muana wa Afashada, muana wa Sheme, muana wa Noa, muana wa Lemeke,

³⁷muana wa Metushela, muana wa Hanoka, muana wa Yalede, muana wa Mahalalêle, muana wa Kenana,

³⁸muana wa Enosha, muana wa Shete, muana wa Adama, muana wa Nzambi.